آية شعيب وكل ما يتعلق بالصحة النفسية في برنامجها “موقف السلام” على منصة الساحة

الكلام عن الأمراض النفسية، والتعبير عن الحقيقة وعن أكبر الصراعات في حياتنا مش بس وسيلة للشفاء، هو برضو دليل يومي على أن الصراع النفسي جزء طبيعي من الحياة. النهارده, في منصات بتتكلم عن قصص إنسانية و صراعات الحياة كثيرة  وواحد منهم هو برنامج “موقف السلام”، على منصة الساحة اللي أطلقته آية شعيب ، صانعة محتوى عندها خبرة غنية في عالم الصحافة والإعلام

.قعدنا مع آية عشان نتعرف عليها اكتر

إزاي بقيتى شخص متعمق في علم النفس؟

انا في الاول مكنتش متعمقه في علم النفس لحد ما جالي اكتئاب لمدة ٣ سنين. أول سنه و نص مكنتش فاهمه حاجه و مش فاهمة إيه اللي بيحصل لي. لجأت لاكثر من طبيب نفسي بس حسيت إن في فجوة، كان عندي أسئله كتيره و مش لاقيه إجابتها

.بدأت ابحث و اقرأ، و باقيت عارفه إيه المصادر الموثوق فيها. كنت بحاول الاقي الإجابات للأسئلة الموجودة في مخي

 هل البحث ده كان بعمق؟

أى حاجه كانت بتقع في طريقي كنت بقراها، اوقات كنت بستعين بأصدقاء في المجال. اكثر حاجة فادتني كانت المقالات و الأبحاث لأنها موثوق فيها طبياً

احكي لنا عن بدايات شغلك مع منصة الساحة؟

 انا أطلقت برنامجي “موقف السلام”، و بعدها بكام شهر صديقي كان شغال في الساحة و طلب مني اعمل فيديو عن تجربتي مع الجواز والطلاق والعنف الأسري. ومن هنا تعرفت على المنصة. أكتر حاجة شدتني ليها هي القصص الإنسانية التي يناقشونها على المنصة

.بعدها بفتره كلموني، كان “موقف السلام” اتعرف أكتر، وشافوا المحتوى وكانوا مهتمين بيه

هل شايفه إن التعاون ده مفيد؟

التعاون اكيد فادني لاني عليت بمستوى الإنتاج من كل النواحي، السكريبت، الضيوف و البحث. انا في الاول مكنتش حاطه جهد كبير في المحتوى، بس دايما بقول لنفسي :آيه انتي ممكن تعملي احسن من كده

الساحة ساعدتني جدا فى ده، المعلومات متراجعة من أكثر من شخص وهما عندهم متطلبات ومعايير معينة اجبرتني اني اشتغل بشكل معين. وده اكيد هيوصل للناس. هيحسوا إن كل كلمه بتتقال في البرنامج دقيقة جداً. وده أضاف لي كتير كصانعة محتوى، اني اقدر اعمل محتوى مؤثر ومفيد في شكل برنامج إحترافي

“احكي لنا اكثر عن برنامجك “موقف السلام

المنصة في الأول كانت واخده إتجاه إن البرنامج يفضل زي ماهو، بس انا كنت عايزه أطور من البرنامج و التطوير في الوقت ده كان إني أجيب ناس تتكلم عن تجاربهم لاني شخص مر بالتجربة دي، كان بيبقي نفسي في برنامج في ناس بتشارك تجاربهم

الموضوع مكنش سهل عشان الناس عندهم تخوفات منطقية وهي بتتكلم عن التروما وعن مشاكلهم الشخصية. بس إحنا كنا شايفين إن وجود الضيف بيقرب المواضيع الثقيلة للناس و بيعمل توازن

إزاي كنتى بتواصلي مع الناس عشان يتكلموا عن المواضيع التقيلة دي؟

في الأول كنت يعتمد على أصدقائي انهم يوصلونى بالضيف لأن ناس كتير كانت بترفض. كان في حلقات الناس بتغير رأيها في الأخر و طبعاً مكنتش بضغط علي حد. لانى طبعا مقدرش اضغط على حد يتكلم فى حاجة لو هو مش مرتاح تماما لده، كنت بعرض فكره الحلقه على السوشل ميديا و اشوف لو في حد مستعد يكون ضيف

احكيلنا عن ردود الفعل الإيجابية والسلبية عن المحتوى

فى اكتر من حلقة مميزة وكان عليها ردود فعل مؤثرة بالنسبالي. وفي نفس الوقت في حلقات الناس بتحس فيها إن الكلام دسم ويحتاجوا يشوفوا الحلقة اكتر من مرة عشان يقدروا يستوعبوا المعلومات الي فيها 

لحد دلوقتي غطيتي مواضيع كبيرة و مهمة جدا فى البرنامج. ايه هي المواضيع التانية اللي ممكن نتوقعها في المستقبل؟

    في حلقتين، حلقة عن (قصف الحب) لما تنزل هتعجب الناس لأنهم سهل جدا يتوصلوا معاها

في حلقة تانية إسمها “خطوات تضمن لك حالة التعافي” ودي عن الحاجات الي ممكن تعملها عشان نتعافى من الصدمات الكبيرة و منخرجش منها بخسائر كبيرة

ايه هي المشاريع القادمة التانية اللي مخطط لها في المستقبل؟

.عاوزه أعمل برنامج طبخ

انا كان عندي مطعم وكنت شيف. بحب فكرت إنك تعملي اكل وتاكلي الناس وينبسطو منه. فنفسي ارجع اطبخ و يكون قدام الكاميرا، وهندخل فيه الكلام عن الصحة النفسية