ترجمة: نوران العشري
إن البنت تبقى موديل ده في الغالب بيحتاج مواصفات محددة وبنلاقي صورة معينة اترسمت في دماغنا لما نسمع كلمة “موديل” بس نهوت علي كسرت كل القواعد والصور دي لما قررت تبقى موديل لأول مرة وهي عندها 48 سنة.
أول صورة شفناها لنهوت كانت من كواليس جلسة تصوير المصمم مهند كوجاك وقالت نهوت، “الوقت مش متأخر على إنك تعمل أي حاجة. أنا فعلًا مش حاسة إني كبيرة وبحب الأناقة والأزياء فبعتت صوري لكوجاك عشان أجرب أبقى موديل.”
خلفية نهوت بعيدة عن الأزياء، فهي مديرة مكتب رئيس مجلس إدارة الجونة وكانت من فترة للتانية بتهزر مع صحابها وولادها على رغبتها في إنها تكون موديل بس مكانتش فاكرة إنها هتعمل كدة فعلا وهي عندها تمانية وأربعين سنة. “حبيت تجربة قياس الفساتين وجلسة التصوير، التجربة مختلفة تمامًا عن شغلي. كان مبهر بالنسبة لي كمية الحب والشغف اللي لقيتها من فريق العمل الشباب في التصوير،” قالت نهوت.
نهوت حكت إن الناس خلال جلسة التصوير كانوا مُشجعين ومنبهرين إن دي الجلسة الأولى ليها. “مهند كوجاك وفريقه، سالي راشد اللي عملت المكياج وكلهم كانوا حلوين،” قالت نهوت.
نهوت مش أم تقليدية على الإطلاق حكتلنا إن ولادها كانوا مبسوطين وهما شايفينها بتخوض التجربة دي. “ابني الكبير بالذات كان فخور جدًا وولادي الاتنين قالولي انتي أم جميلة،” قالت نهوت.
“ابني الكبير بالذات كان فخور جدًا وولادي الاتنين قالولي انتي أم جميلة”
شعرها الأبيض سايب وبيطير في التصوير وقالت عنه نهوت إنها بتحب شعرها الأبيض ومش بتصبغه. “بطلت أصبغ شعري من عشر سنين عشان حساسية عندي. أنا حباني كدة،” قالت نهوت.
الأم الجميلة لولدين عاشت معظم حياتها بين الغردقة والجونة وحكتلنا إنها غيرت فكرتها عن الحياة من تلات سنين.”في نقطة معينة من حياتي بدأت أقول لنفسي، “أنا بحبني.” حتى شكلي الخارجي غيرت فيه وخسيت وبدأت أحب اللبس تاني،” قالت نهوت.
“في نقطة معينة من حياتي بدأت أقول لنفسي، “أنا بحبني.”
نهوت الجريئة مش بتآمن إن في ألوان معينة مرتبطة بالسن. “أنا بحب دايمًا ألبس pink، فبدأت ألبسه أكتر.”
زمايل نهوت في الشغل شجعوها إنها تعمل أكاونت على انستجرام وتنزل عليه صورها وده اللي هي عملته بالفعل.
“بيتهيألي في رسالة نقدر نوصلها للناس اللي بتقرا الكلام ده أو للستات اللي بيمروا بمرحلة تجربة حاجة جديدة للمرة الأولى: أتمني إنهم يقدروا يصدقوا تاني في نفسهم.” قالت نهوت.