صوت حلو، جمال، مغامرة، تحدي، تعب، تركيبة غريبة و مختلفة و مش كل يوم هنلاقيها، بس لاقيناها في ميريل مختار البنت المصرية اللي على طبيعتها، اللي عاشت ست سنين في كندا بتستمتع بمغامرة مختلفة و بتكسر خوف جواها من الجبال و بتثبت انها تقدر.
ميريل عملت أول تعاون لها مع الموزع هشام خرما في أغنية (حلّق معي) و كلمات نسمة الشاذلي .
Afro Mountain Girl اسم مختلف و جديد جاتلك منين فكرة الأسم؟
الاسم جالي بالصدفة لما روحت فانكوفر في كندا. و هنا كانت المفاجأة بالنسبالي لما لاقيت كل منطقة كولومبيا البريطانية في كندا حواليها جبال و كمان فانكوفر كانت حواليها كلها جبال. فكانت حاجة مختلفة جدًا اني اصحى كل يوم لمدة تلات سنين و ألاقي حواليا جبال في كل مكان، ده خلاني اني اتدرب كتير على تسلق الجبال في كولومبيا، و في يوم و أنا بحاول اطلع الجبل لاقيت نفسي بقول (I’m a mountain girl) و انا كمان شعري Afro لاقيت نفسي بقول I’m afro mountain-girl و من ساعتها و الاسم معايا.
احكيلنا عن تجربتك مع تسلق الجبال.
الموضوع بدأ لما كان بقالى ست شهور عايشة في فانكوفر فقررت في يوم اني عايزه اجرب الممشى اللي كان موجود منه كتير بالمناسبة في المنطقة دي. بس للأسف كانت لياقتي ضعيفة، فرجعت البيت مضايقة جدًا عشان معرفتش استمتع بالمناظر الحلوة دي كلها. و من اليوم ده و أنا بتسلق ممشى الجبل تلات مرات في الأسبوع و بقى من الأماكن اللي بحب أهرب فيها من كل حاجة.
احكيلنا عن رحلتك الأخيرة في باريس من الناحيتين الشخصية و العملية.
دي تقريبًا أكتر حاجة عفوية عملتها من فترة. الحكاية بدأت لما كلمتني”نسمة الشاذلي” صاحبتي و هي كمان بالمناسبة اللي كتبت أغنية “حلق معي” و قالتلي يالا نروح باريس، محستش بنفسي إلا و أنا وهي بعدها بأربع ايام في المطار و حقيقي كنا محتاجين الرحلة دي جدًا عشان نرتب حاجات كتير في حياتنا و على الجانب العملي زُرنا متاحف و حضرنا حفلات موسيقى عالمية كتير خصوصًا حفلة One Republic اللي فرقت معايا كمغنية و فرقت مع نسمة ككاتبة أغاني.
اوصفيلنا مشاركتك في منتدى شباب العالم، و كان ايه رد فعل الجمهور؟
كانت تجربة حلوة جدًا و كان ليا الشرف اني أشارك في حدث بالحجم ده. كان في أيام بتدرب فيها على الاغاني من 7 بالليل ل 5 الصبح. و كان أحلى جزء مشاركتي في أوبريت حفل الإفتتاح في المنتدى قدام أكبر عدد من الجمهور وقفت قدامه في حياتي. رد الفعل كان أكبر مكسب في الموضوع، كلهم حبوا الأغاني و قالوا لنا بعد العرض أد ايه الأغنية حمستهم و حركتهم.
ازاي تعاونك مع عدد من الموسيقيين زي هشام خرما أضاف ليكي كمغنية صغيرة في السن؟
بحترم و بحب هشام خرما جدًا على المستويين الشخصي والعملي. الشغل معاه كان زي حلم من أحلامي و بقى حقيقة. الحقيقة أنه آمن بيا كموهبة صغيرة في السن و اتعلمت منه كتير جدًا و لسا بتعلم منه في الشغل، و برجعله في اي نصيحة في حياتي الشخصية أو العملية.
تفتكري عندنا أماكن كفاية في مصر للمواهب عشان يعرضوا مواهبهم زي ساقية الصاوي؟
للأسف في مواهب كتير بس عدد قليل من الأماكن الموجودة عشان يعرضوا فيها مواهبهم. أتمنى أن قريب يبقى عندنا أماكن اكتر و نستضيف مغنيين عالميين.
من رأيك الجمهور مستعد أنه يقابل فنانين و مغنين زيك شكلهم مختلف و جرئ عكس الصورة اللي كانت موجودة من 10 سنين مثلاً؟
أتمنى ان ده يحصل. عشان اكون صريحة لما كنت في فترة المراهقة كنت دايمًا بحب شعرى مفرود ومش على طبيعته، و ناس كتير في الوقت ده اقنعوني اني اسيب شعري زي ما هو لحد فعلًا ما عملت كده و رأيي أن الجمال موجود في الإختلاف و ان الشخص يكون على طبيعته.