قبل ما أستلم شغلي الجديد بأسبوع، مديري اتصل بيا علشان يتعرّف عليا أكتر لحد ما نتقابل. رديت عليه وروحت أوضة تانية هادية علشان أعرف أخوض معاه مكالمة ناضجة من غير زن ودوشة بعيد عن ولادي. ولادي خدو لعبهم وراحوا ورايا، حاولت أبعد عنهم لكن هما أصروا يفضلوا ماشيين ورايا. وده كان أول تاوصل مع مديري وكان لازم أسيب إنطباع كويس مبدئياً. كان لازم أفضل هادية وأمسك أعصابي لحد ما المكالمة تخلص. وأخيراً عرفت أدخل أوضة وأقفل على نفسي الباب، بس فضل جزء من عقلي مركز في المكالمة والجزء التاني في ولادي اللي عمالين يعيطوا في الناحية التانية من الباب!
الحقيقة، الأطفال كلهم مزعجين وصوتهم عالي وطلباتهم مابتخلصش. علشان كدة هاتفضل دايما في مكالمة تليفون مش عارفة تردي عليها، إيميل مش عارفة تبعتيه، أو أكل لازم تطبخيه ومش عارفة. خدت وقت على ما قدرت استنتج حلول أقدر أعملها في مواقف زي دي. لازم تعرفيهم إنك هاتكوني مشغولة لمدة معينة من الوقت. اتأكدي إنك تفهميهم إنتي هاتعملي إيه وهاتعمليه فين. وحطي توقعات لتصرفاتهم هاتكون عاملة إزاي خلال الوقت ده وإديلهم حاجات مُسليّة يشغلوا نفسهم بيها. وماتفتكريش أبداً إنهم هايعرفوا يسلّوا نفسهم بنفسهم لإن ده مستحيل يحصل! علشان كدة كتبتلك شوية نشاطات تقدري تشغلي وقتهم بيها وتنجزي اللي وراكي من غير أي عقبات:
1- لعبة الكُبايات
هاتي دستة كبايات بلاستيك وإديهم لأولادك علشان يلعبوا بيها يبنوا بيها هرم أو برج، ويفاجئوكي بخيالهم وإبداعهم
2- ريسايكل كراتين مناديل الحمام
احتفظي بعلب المناديل أو الكرتونة اللي بتبقى في آخر بكرة مناديل الحمام وعلقيهم على الحيطة علشان أولادك يرموا جواها حاجات. خليكي مبتكرة في الحاجات اللي هايرموها، وهاتنبهري قد إيه وقتهم إنشغل بيها وقد إنبسطوا بيها.
3- الحظاظات المطاطية الملونة
كل الأولاد بيحبوها. إدي ولادك علب بلاستيك فاضية علشان يلفوها بالأربطة والحظاظات الملونة، وسيبيهم مع نفسهم شوية
4- بوفيه الأكلات السريعة والنقنقة
جهزي مائدة كبيرة مكونة من أشكال وألوان من الأكلات السريعة للنقنة. فاكهه متقطعة، خضار، صوابع فراخ… هاتخلي إيديهم، بؤهم، وبطنهم مشغولة.
5- موعد للعب
اعزمي صحاب أولادك المقربين علشان يقضوا اليوم معاهم. هايفضلوا قاعدين يلعبوا مع بعض وهايسيبولك مساحتك تنجزي مهامك.
6- وقت القراءة
كتب مصوّرة، كتب تعليمية، كتب هزلية، أو كتب صوتية.. حسب سن طفلك. في كتاب مناسب لكل طفل من أولادك. إشتريه وعلمي أولادك إن يكون ليهم هادي يقعدوا يقروا فيه كتابهم المفضل مع لعبتهم المفضلة.
7- حفلة رقص
شغلي أغاني أطفال هما بيحبوها وخليهم يقوموا يرقصوا ويهيصوا.
8- التكنولوجيا
استغلي التكنولوجيا في حاجة مفيدة، نزليلهم ألعاب تعليمية على التابلت. بس ماتنسيش تظبطي المنبه بعد وقت معين، علشان أول ما يرن يسيبوا التابلت فوراً ويروحوا يعملوا أي نشاط تاني.
9- خبي الألعاب
الأطفال بيملّوا من ألعابهم بسهولة. حاولي تخبي شوية من اللعب لفترة من الوقت، علشان لما تطلعيهم تاني، يكونوا متحمسين يلعبوا بيها
10- لعبة الصناديق
املي الصناديق بكنوز تناسب شخصية كل طفل من أطفالك فوم أو حروف أبجدية مغناطيسية وأرقام علشان يعلقوها على التلاجة، عرايس الصوابع، ورق ملون، أقلام تلوين، بازل. الفكرة هي إنك تخبي الحاجات دي كلها في علبة أو صندوق وتطلعيهم وقت ما تبقي عايزة تشغلي وقت أطفالك شوية.
جرّبي الأفكار دي واستمتعي وإنتي بتشوفي أطفالك إزاي بيشغلوا وقتهم. وافتكري دايماً الطفل السعيد هو الطفل اللي بيلاقي حاجة يشغل بيها وقته. ها قررتي تشغلي وقت أطفالك بإيه النهاردة؟
ترجمة: تسنيم عبدالله