ترجمة: نوران العشري
بنسمع كتير جملة إن “الحياة رحلة علم” وإن الواحد لازم يفضل يتعلم حاجات جديدة لحد أخر يوم بس مايسة علي، 55 سنة، أم وجدة، بتطبق المقولة دي بالمعنى الحرفي بتاعها وعمرها ما بطلت تتعلم وعُمرها ما شافت إن تطور الذات ممكن سن يوقفه.
لما بنتها خلصت مدرسة وكانت مايسة عندها أربعين سنة ساعتها، قررت إنها تدخل الجامعة لأول مرة. في الوقت ده، مايسة كان معاها دبلومة سكرتارية وفتحت ورشة خاصة بيها. بس تفكيرها في الرجوع للدراسة جه بعد ما اشتغلت في شركة للتطوير العقاري واحتلت منصب إداري فيها وحست إنها عايزة تدرس حاجة ليها علاقة بشغلها.
قالت مايسة، “مكنش الهدف الأساسي هو رجوعي للجامعة. هدفي في الأساس كان تحضير ماجستير وده اللي كنت عايزة أعمله وكنت محتاجة أدرس في الجامعة عشان أوصله.”
عشان كدة، مايسة بدأت تدرس تجارة في الجامعة العربية المفتوحة لمدة أربع سنين وكانت ماشية بالتزامن مع دراسة بنتها بالظبط. كانت مفاجأة بالنسبة لها نظام التعليم دلوقتي ولقت إنه مش زي التعليم زمان زي ما هي فاكرة، حضور وحفظ أعمى وبس. قالت مايسة، “المذاكرة في سن كبير ممتعة جدًا، لأني بذاكر لأسباب مختلفة وبتعمق أكتر. بتبدأ تذاكر حاجات على أرض الواقع والموضوع عملي أكتر.”
“كل أساتذتي كانوا أصغر مني وساعات فرق السن بيبقى كبير. بس أكيد بيبقى في احترام وتعاون متبادلين. اتعلمت حاجات كتير مكنتش متخيلة اني هتعلمها”
رغم فرق السن، لكن مايسة اتعلمت كتير من أساتذتها الأصغر منها. “كل أساتذتي كانوا أصغر مني وساعات فرق السن بيبقى كبير. بس أكيد بيبقى في احترام وتعاون متبادلين. اتعلمت حاجات كتير مكنتش متخيلة اني هتعلمها،” قالت مايسة. كان أصعب تحدي بالنسبة لمايسة هو إتقان اللغة الإنجليزية لكنها قدرت تتعلمها في الآخر وتحبها لأنها ساعدتها كتير في شغلها.
بعد حصولها على بكالوريوس تجارة، أبواب تانية اتفتحت لمايسة وبدأت تاخد شهادات أكتر فعملت ماجستير في إدارة الأعمال في الأكاديمية البحرية للعلوم والتكنولوجيا وعملت دبلومة في التصميم الداخلي. لما احتاجت تسوق لشغلها، اتعلمت حاجات في التسويق وبعدها درست تسويق إلكتروني وبتفكر حاليًا تحضر دكتوراه.
لما سألنا مايسة عن رأيها في جملة #عيب_على_سنك، ضحكت. “أنا بسمع الجملة دي كتير حتى لو بتريقة، بس هي بتزود التحدي عندي. أنا بدأت أتعلم السباحة وبشجع صحابي إنهم ييجوا معايا، الموضوع حلو جدًا،” قالت مايسة.
المقال رائع.. شكرا ليكم فرحتوني