ممكن حاجات بسيطة جدًا تفرق في تفاصيل مسلسل أو أي عمل درامي أو سينمائي و تخليه يحقق نجاح كبير جدًا، و ده اللي حصل في مسلسل ب 100 وش، بلمسات دنيا صدقي و فريقها قدروا فعلًا يقنعونا ان الماكياج السينمائي مش حاجة سهلة و انها ليها دور كبير في رسم الشخصيات.
احكيلنا عن النقلة بين دراستك للرسم المتحرك في معهد السينما وبين شغلك في الماكياج السينمائي؟
الموضوع ابتدى من و أنا صغيرة خالص كان كل شغفي وحبي للماكياج بس عمري ما اتخيلت في الوقت ده اني ممكن اشتغل ميكاب ارتيست، خصوصًا أن في الوقت ده ماكانش في الثقافة إن الناس تتقبل شغلى كميكب أرتيست. لما قررت اني ادخل معهد السينما ماكنتش عارفه ان دي ممكن حاجة تفيدني في شغلي سواء في رسمي للشخصيات أو حتي تكوينها و الطريقة اللي هتظهر بيها.
ايه سبب اتجاهك للنوع ده من الماكياج بالرغم من المجهود الكبير اللي بيحتاجه؟
من و أنا صغيرة كنت بحب جدًا اني اغير في ملامح الشخصيات و انا بحطلها ماكياج حتى كنت لما كنت اجرب في نفسي كنت على طول ببقي عايزة اجرب حاجات جديدة و اعرف بتتعمل ازاي، زي الماكياج الخليجي مثلًا، ازاي اخلي واحدة تبان كأنها مدمنة أو تعبانة. فده على طول كان من الحاجات اللي انا مهتمة بيها، بس للأسف ماكانش في وقتها الخامات اللي كانت تخليني انفذ ده بطريقة صح ومظبوطة.
ازاي اتعلمتي الماكياج السينمائي؟
اقدر اقول اني بشكل أساسي علمت نفسي بنفسي، كنت بجيب صورة للماكياج اللي عايزه اعمله و احطها قدامي و ابدأ اشوف ايه الطريقة اللي ممكن اعمله بيها و عايزاه يطلع إزاي، بس في ناس كتير اشتغلت معاهم مقدرش انكر فضلهم، كل واحد فيهم علمني حاجة مختلفة، لحد ما قابلت شريكي في الشغل دلوقتي “إسلام” اللي اعتمدنا في طريقتنا في الشغل على النجاح و الفشل، فاقدر ألخص كل ده انه في الماكياج العادي مجهود ذاتي مني، و في الماكياج السينمائي مجهود مني و من إسلام.
احكيلنا عن أخر تجربة ليكي في مسلسل 100 وش مع آسر ياسين و نيللي كريم؟
تجربة 100 وش كانت من أقرب التجارب لقلبي لأنها فعلًا ركزت على دورنا كميكب ارتيست في السينما، لأن الناس مش بتبقي فاهمة اوي طبيعة شغلنا، مع ان في كل عمل فكرة تصميم الشخصية دي بتبقى موجودة، بس 100 وش من أكتر الأعمال اللي ركزت على دورنا و شغلنا و عرفت الناس أكتر أهمية شغلنا و ازاي بيفرق في أي شخصية في العمل.
بتقضي وقت أد ايه عشان تعملى ماكياج الشخصية؟
تعتمد أكتر على الشخصية اللي بنصممها ، في شخصيات بتاخد نص ساعة و في شخصيات ممكن توصل لأربع ساعات.
أصعب الشخصيات اللي عملتلها المكياج بتاعها في مسلسل ب100 وش؟
كانت نيللي كريم في دور البولندية، عشان كنا بنتحدى كذا حاجة مع بعض، نحافظ على شكلها و انها تبان أجنبية وفي نفس الوقت ماتتعرفش و كمان الوقت كان قصير جدًا، فكرتها كلها جات اني كنت ماشية في الشارع مع “إسلام” شريكي في الشغل و لاقينا ست روسية استأذنّاها اننا نصورها و من هنا ابتدينا اننا نحاول نقرب شكل نيللي كريم للست الروسية.
الشخصية التانية: شخصية عم سامح، لانه كان عنده شنب و راكور و حواجب تقيلة، فكان صعب اننا نغطي كل ده في مساحة صغيرة.
ايه اكتر التحديات اللي بتواجهك في شغلك؟
من اهم الحاجات كانت اني أول ما بدأت الشغل في المجال كان لازم أقنع الصنّاع و المشاهدين باهمية اللي بقدمه و أد ايه ممكن يفرق في العمل، من التحديات التانية بتاعتنا هي الخامات اللي بنستخدمها، كمان صناع العمل مش بيبقوا فاهمين سبب تكلفة الخامات و انها بتمر بوقت طويل جدًا لحد ما توصل و نقدر نستخدمها.