تخيل احساسك وانت بتدور على قشة تتعلق بيها، أو منقذ يخلصك، ويكون الرد ‘ما تعوم’. آخر حاجة اللي بيغرق هيكون عايز يسمعها هي كلمة ‘ما تعوم’، وكأنه مختار انه ميعومش، أو مختار إنه يصارع ويغرق بإرادته. للأسف ده الرد اللي بنرده كتير على اي حد بيصارع مع اضطراب القلق.
لأنه ببساطة بيكون سهل جدًا علينا ننصح، ونحكم على الطرف التاني من بره، بدون أي محاوله مننا عشان نفهم اللي قدامنا بيعاني من إيه او بيصارع إزاي. محاولة حقيقية اننا نحط نفسنا مكانه ونحس بمشاعره وصراعه عشان نقدر نساعده.
إيه هو القلق؟
القلق هو اضطراب. الشخص مش بيختار إنه يعاني، مش بيختار إنه يقلق على كل حاجة وأي حاجة.
الشخص مش بيختار إنه يفضل يعيش سيناريوهات سوداوية، ولا إنه ميبطلش تفكير في كل التفاصيل.
مش بيختار إنه يعاني من اضطرابات في النوم، والشهية، ولا قلة تركيز.
الشخص مش بيختار يعاني من ضربات سريعة في القلب، ولا صعوبة في التنفس، ولا رعشة في جسمة. القلق مرض. زيه زي أي مرض، مينفعش نلوم حد إنه تعبان.
View this post on Instagram
نساعد إزاي؟
المرة الجاية قبل ما تقول كلمة ‘ما تعوم’ حاول تفهم اللي بيعاني من اضطراب القلق بيمر ب إيه ومحتاج إيه فعلًا.
فبلاش كلام زي إجمد، او إنشف، او إن مفيش حاجة تخوف او تقلق
بلاش كلام زي إن انت اللي مكبر الدنيا، والموضوع بس في دماغك.
كلام زي ان إيمانك ضعيف وإنك محتاج بس تقرب من ربنا اكتر وتصلي اكتر.
بلاش كلام كله لوم. الكلام ده مؤذي جداً للشخص، لأنه بيخليه حاسس إنه مُقصر، إن الحل والطريق واضح قدامه وهو اللي مش عايز يمشي فيه.
الكلام ده بيحسس الشخص انه ضعيف او هش الشخصية. بيحس إنه مش كويس كفاية عشان كده بيقلق.
اللي عنده اضطراب القلق محتاج إيه؟
اللي بيغرق محتاج طوق نجاه، محتاج حد يشده من وسط الميه،مش يلومه انه مبيعرفش يعوم.
نفس الكلام محتاجه الشخص اللي بيعاني من القلق.
محتاج يحس اننا فاهمين يعني ايه قلق، فاهمين صراعه، فاهمين هو بيعدي ب ايه.
يحس اننا بنحترم مشاعره بدون تقليل او سخرية منها.
محتاج يتسمع بدون وعظ أو احكام. محتاج يحس اننا جنبه وانه مش لوحده.
نطمنه إنه هيعدي وهيطلع من حفرة القلق. محتاج نساعده يفهم أكتر عن القلق وإنه اضطراب.
محتاج نساعده يفهم إن القلق له مخرج مش حكم نهائي
لازم يحس إننا مزهقناش منه، أو تعبنا لأنه مش عارف لسه يتغلب على قلقه. محتاج يحس إنه مش عبء علينا. محتاج أفهم طريقة وشكل المساعدة اللي الشخص محتاجها، عشان أقدم مساعدة باللغة اللي الشخص هيفهمها، مش اللغة اللي انا عارفها وخلاص. محتاج نشجعه على طلب المساعده المتخصصة لو محاولاته للخروج من دايرة القلق فشلت.
مساعدة شخص بيعاني من القلق مش حاجة سهلة، محتاجين اننا نفهم ونفكر نفسنا دايما ان دورنا هو المساعدة. دورنا مش اننا نتحكم في حياة الشخص وناخد قرارات بالنيابة عنه ولا إننا نعالجه.
مهم دايما نفكر نفسنا ونفكره إننا بنبذل كل جهدنا، وده هيساعدنا نتجنب إحساس الذنب المزيف إننا مُقصرين.