التدخين مضر جداً لصحتك، لإنه ممكن يسبب أمراض خطيرة جداً زي السرطان، أمراض القلب، الجلطات، وأمراض اللثة. وكمان ممكن يسبب أمراض في العين بتوّصل للعمى. ده غير إنه عامل مهم في تأخر الحمل.
في الحمل، التدخين مش بس بيبقى مضر ليكي، ده كمان بيبقى مضر لتكوين الطفل خلال فترة الحمل، لما بتدخني وإنتي حامل الجنين بيتنقله كل السموم والكيماويات الخطيرة الموجودة في السيجارة زي النيكوتين وأول أكسيد الكربون والقطران، الكيماويات دي بتقلل نسبة الأكسجين اللي واصلة للجنين واللي بيحتاجه عشان ينمو بشكل صحي.
الأطفال المولدين لأهمات كانوا بيدخنوا خلال فترة الحمل، في أغلب الأحيان بيتولدوا بمشاكل صحية وعيوب خلقية، بالإضافة إنهم بيتولدوا بدري عن معادهم وكمان وزنهم بيبقى ناقص، وده بيعرضهم لمشاكل صحية أكبر زي العاهات المستديمة، وفي بعض الحالات الوفاة.
التدخين السلبي:
انك تتنفسي في الهوا اللي بيدخن فيه حد مؤذي جداً، وتأثيره مش أقل من تأثير التدخين نفسه؛ لان الهوا اللي بيدخلك فيه نفس الكيماويات اللي بتدخل للمدخن لكن بنسبة أقل شوية، ورغم إن النسبة دي مش كبيرة بس تأثيرها قوي جداً ومُدمّر.
أسباب تخليكي تبطلي تدخين:
كل ما بطلتي تدخين بدري كل ما صحتك وصحة طفلك بقت أحسن. أنسب وقت تبطلي فيه تدخين هو قبل الحمل على طول، بس لو حملتي فحملك هايكون دافع كبير ليكي وفرصة تستغني عن العادة المميتة دي.
في أسباب كتير تخليكي تبطلي تدخين، زي إنك مش هاتبقي مضطرة تدوري على مكان بعيد تشربي سيجارة فيه، نفَسك هايبقى ريحته منعشة أكتر، سنانك مش هاتبقى صفرا، إيدك مش هايبقى فيها بقع، وشك مش هايبقى مجعد، هاتبقي أنشط وأقوى وقادرة تتحركي أحسن.
إزاي تبطلي؟
لازم تفكري نفسك بخطورة التخدين عموماً وبالذات في فترة الحمل، والحاجات اللي هاتتغير للأحسن لو بطلتي، اتخلصي من كل السجاير الموجودة عندك والولاعة وأي اكسسوارات تخص التخدين، امشي كتير، واشربي مياه أكتر، اشغلي نفسك طول اليوم، ابعدي عن صحابك ومعارفك المدخنين، كلي فاكهة وخضار كتير، بجانب الأدوية اللي ممكن تساعدك تبطلي.
ممكن أشرب كحوليات وأنا حامل؟
الدكاترة مايعرفوش بشكل دقيق إيه الكمية الآمنة على جنينك وإيه اللي لو زاد عنها يعرضه ويعرضك للخطر، فالأفضل إنك توقفي المشروبات الكحولية أول ما تقرري تاخدي خطوة الحمل.
ليه الكحول مشكلة؟
الكحول بيعتبر مادة سامة، لإنه بيوصل بسرعة للجنين من الدم المنقول له عن طريق المشيمة. وخلال الحمل الكحول ممكن يدمر خلايا جنينك بشكل دائم، وده بيأثر على شكل وش طفلك، وأعضاءه، ونمو دماغه، وجاهزه العصبي وبالتالي هايواجه صعوبات في الفهم ومشاكل في الحركة طول حياته.
خطورة الكحول مش بتبقى بس في أول 3 شهور، الخطورة بتفضل موجودة ولازم تخلي بالك من الكميات اللي بتشربيها، خصوصاً في آخر 3 شهور لأن دي بتكون فترة اكتمال نمو جنينك وتطوره.
إيه هي البدايل الممكنة؟
إنك توقفي الكحوليات من قبل بداية الحمل هايسهل عليكي إنك تمنعيها طول فترة الحمل، ولو كنتي بتلجأي للكحوليات علشان تحسني من مودك في بدايل تانية كتير لده صحية ومش مضرة زي حمام سخن، موسيقى هادية، عصير ليمون، جلسة مساج، تمارين، يوجا، أو قراية.
صحة جنينك واكتماله بشكل سليم هاتديكي القوة والإرادة إنك تبطلي أي عادات سيئة كنتي بتعمليها قبل الحمل.