رحلة إسراء محمد مع التدريس بدأت من وهي عندها 16 سنة، وقتها كانت بتدور على شغلانة سهلة تشتغلها في الصيف وقررت تبقى مدرسة مساعدة في حضانة انترناشونال، بعد كدة اكتشفت انه مع ان التعامل مع الأطفال الصغيرين مهمة مستحيلة الا انها لقت شغفها الحقيقي، الرحلة دي كملت لمده سبع سنين وبعدين غيرت مجال شغلها لمدة خمس سنين ودخلت مجال العمليات ووصلت انها بتشتغل مدير العمليات في شركة أوركاز، وبما انها كان عندها وقت فاضي فهي كمان كانت بتدرس عربي لطلبة المدارس الانترناشونال، ودلوقتي باستخدام معرفتها باللغة العربية والانجليزية والفرنسية إسراء اسست سوبر ابلة، منصة لتدريس اللغة العربية بطرق مبتكرة، بنقعد معاها عشان نتكلم ونعرف اكتر عنها.
بأهدف اني ابقى سفيرة للغة العربية واني ابقى مثال ايجابي عن ازاي احد اصعب واكثر اللغات تعقيدا تبقى سهلة ومشوقة.
احكي لنا عن سوبر أبلة وايه الهدف اللي نفسك تحققيه من خلالها.
سوبر أبلة بتعلم العربي من خلال الحكايات والألعاب والاستخدام الحديث لكلمات عربي يومية من خلال إبراز اللغة العربية العامية، بأهدف اني ابقى سفيرة للغة العربية واني ابقى مثال ايجابي عن ازاي احد اصعب واكثر اللغات تعقيدا تبقى سهلة ومشوقة.
انتي ذكرتي صراعك الشخصي في المدرسة بسبب المدرسين الغير مرنين، ازاي ده أثر على طريقة تدريسك في سوبر أبلة؟
انا كنت بحفظ عن طريق الرقص والغنا وتمثيل مسرحيات عن المنهج، كنت بكره المنهج، الروايات المملة والقواعد النحوية، وانا صممت منهج مبني على كل طالب عشان يشتغل على نقاط ضعفه المحددة.
ايه اللي لازم يتغير في نظام التعليم بتاعنا عشان يبقى احسن؟
رأي الطلاب لازم يكون ليه قيمة، مالهوش معنى أن القصص اللي كانت بتتدرس لنا من 20 سنة لسة بتتدرس النهاردة، لازم ندخل الدراما والحكايات في شرح الدروس، وكمان لازم نتأكد ان المدرسين نفسهم على دراية باحتياجات واهتمامات الأطفال عشان نقدر نسد الفجوة اللي ما بين الأجيال.
في تجربتك ازاي اهالي الأطفال اللي عندهم مشاكل في الدراسة ممكن يساعدوهم في انهم يعبروا عن، ويحلوا، مشاكلهم الدراسية؟
عن طريق انهم يقولوا لهم دايما انهم في ضهرهم، ويدعموا اختياراتهم ويفهموهم الغلط فين، عن طريق انهم يقولوا لهم مايقولوش ابداً “ماقدرش” ويقولوا “هحاول” والأهل دايماً هيلاقوا طرق كتير للشرح.
حلمي اني اأسس مدرستي واطور المنهج الخاص بيا اللي يقدر يوري لكل الناس قد ايه العربي لغة غنية ومثيرة للإهتمام
ايه خططك المستقبلية لسوبر أبلة؟
حلمي اني اأسس مدرستي واطور المنهج الخاص بيا اللي يقدر يوري لكل الناس قد ايه العربي لغة غنية ومثيرة للإهتمام.
أجمل سوبر ابله في الدنيا
طريقتها جميله و مشوقة جدا ما شاء الله
و الفيديوهات اللي بتنزلها روعة و الاطفال بتحبها جدا
ربنا يوفقها دايما و من نجاح لنجاح
ابني ست سنوات وتابع سوبر ابله و كل فييديو جديد ينزل يعيد كل اللي قبله وفعلا لاحظت ان المعلومه ماشاء الله بتثبت معاه
مستنين فيديوهات اكترً وبالتوفيق😍😍
انا شوفت كل الفيديوهات لسوبر ابله الاسلوب رائع و طريقه مبدعه و تشد اي حد انه يتفرج. انا ابتديت احب اللغه العربيه علي ايديها. بجد سوبر سوبر ابله