مقابلة الشغل أول مرة بتبقى موترة لناس كتير وبنحتاج إننا نسيب فيها إنطباع كويس وما يتنسيش، مش بس في الإجابات اللي بنقولها في الإنترفيو بس كمان في الشكل والثقة اللي بنرد بيها. جزء من ثقتنا في نفسنا بييجي من شكلنا وعشان كدة في حاجات معينة ممكن تعملوها في الميك أب بتاعكوا هتساعدكوا تسيبوا إنطباع حلو في المقابلة الأولى وتزود ثقتكوا بنفسكوا.
اللوك
خلينا نتفق على قاعدة عامة وهي إننا نحاول اللوك كله يبقى طبيعي على قد ما نقدر ومافيهوش أي حاجة أوفر أو ألوان قوية. الميك أب الهادي بيبقى أنسب عامةً الصبح وكمان هتبقوا محتاجين تدوا إنطباع طبيعي، إنكوا مش مستخبيين ورا ميك أب كتير وإن دي شخصيتكوا الطبيعية. كمان، اللوك لازم يبقى رسمي عشان يدي إنطباع بالجدية لأن في الأول والأخر دي مقابلة شغل.
الكونسيلر
منطقة العين هي الأهم يوم المقابلة عشان معظم الوقت هيبقى في تواصل بالعين كبير ومن قريب عشان كدة الكونسيلر لازم يكون من الأساسيات اللي تحطوها يوم المقابلة. الكونسيلر هيديكوا شكل فايق ونشيط أكتر هيساعدكوا يبقى عندكوا ثقة أكبر وانتوا بتتكلمو وحد باصصلكوا.
الكحل
يُفضل دايمًا إن ميك أب العين يبقى هادي وبسيط وعشان كدة قلم الكحل هيديكوا الشكل الرسمي والبروفيشونال للمقابلة في نفس الوقت مش هيبقى أوفر.
الرموش
يستحسن تبعدوا عن تركيب الرموش في اليوم ده. أولًا هيدي إنطباع إنكوا مش طبيعين وتاني حاجة ممكن يزود التوتر بإن رمش يقع أو حاجة تبوظ. ممكن تحطوا ماسكرا أحسن بس تتأكدوا إنها مظبوطة ومفيهاش كلكعة في حتت معينة. افتكروا دايمًا إن التواصل في الإنترفيو هيبقى من خلال االعين أكتر حاجة ومحتاجين تبقوا متأكدين إن شكلهم مظبوط وواثقين منهم.
الروج
ممكن تبقى درجة هادية وقريبة من لون البشرة عشان ماتبقاش كتير وتفضلي محافظة على اللوك الشيك وفيه رسمية. درجات ال nude مناسبة جدًا للصبح وللإنترفيو.