لو انتوا من الناس اللي بتركز في كلمات كل أغنية جدًا فغالبًا هتبدأوا تسمعوا الأغاني الفترة دي بشكل مختلف وتتخيلوها في وقت الحجر والكورونا هتبقى عاملة إزاي. ده مش هسهس، انتوا هتبقوا كويسين، هي بس الفترة دي من كتر الأخبار اللي بنسمعها الموضوع بيطلع في كل حاجة والأغاني ماسلمتش من ده. بالنسبة لنا، في 5 أغاني سمعناهم بشكل تاني بعد ما عرفنا الكورونا.
قرب حبيبي
هو ده بالظبط اللي منظمة الصحة العالمية بقالها شهر بتهاتي فيه. ماينفعش يقرب حبيبي. ده هيزود احتمالية العدوى وبالتالي انتشار المرض وهيترتب عليه حاجات كتير احنا في غنى عنها. لو مشاعركوا خدتكوا في أي لحظة وسمعتوا نجم الجيل وهو بيقول قرب حبيبي، ماتسمعوش كلامه. هو كان بيغنيها في زمن تاني خالص وكان ممكن يقرب عادي من غير خوف.
مش نظرة وابتسامة
مع احترامنا الكبير للفنانة سيمون بس هو الموضوع فعلًا المفروض يتوقف على نظرة وابتسامة مش أكتر. صدقيني أكتر من كدة هتزعلي وهنزعل كلنا. خلينا الفترة دي نقضيها نظرة وابتسامة من بعيد، ده بعد إذن الحب طبعًا، ولما نعدي الفترة دي نبقى نشوف الحاجات الكتير ياما اللي كنتي بتتكلمي فيها.
خد بالك عليا
الاهتمام بيتطلب عادي على فكرة وبيتطلب أكتر من مرة والفنانة إليسا مأكدة علينا ده. في الفترة اللي كلها توتر دي، حقيقي احنا كبنات بنحتاج جرعة أزيد من الاهتمام. فخد بالك عليا عادي. اتطمن عليا، ابعتلي بكرتين منديل وازازة تلات خمسات أو سبراي كحول. محتاجين نطلع من الفترة دي بأقل خساير. خد بالك عليا ياريت عشان لو فركشنا في عز الحجر ده هنزهق جدًا.
لو بكرة نهاية العالم
والله هو الأستاذ أمير عيد كان بيسأله بتلقائية جدًا وكان واخد الموضوع بشكل فرفوش خالص بس السؤال بدأ يقلب جد ولجل الأمانة بقينا نفكر فيه كلنا يا أمير. الواحد كان بيسمع الأغنية دي قبل كدة ويتبسط ويتخيل نفسه مع الشخص اللي بيحبه على موتوسيكل وطايرين بس دلوقتي الأغنية بقت مخيفة وبقينا بنقول “بعد الشر” بعد أول جملة فيها.
يا ستار
دي الخلاصة. غير إن قلب حماقي ولع نار، بس ده اللي بندعيه كلنا الفترة دي حتى من غير ما نسمع الأغنية. الفترة مش سهلة وحماقي كان عنده مخاوفه من فترة واحنا مخدناش بالنا. فكل اللي بنقوله الفترة دي فعلًا هو “يا ستار” وربنا يعدي الأيام دي على خير.
