ممكن تغسلي لإبنك أيده أكتر من خمس مرات في اليوم بديتول، وتعقمي البيت كل شوية، بس برضه بتلاقيه عنده برد طول الوقت، إيه السبب؟ التعقيم لوحده مالوش أي دور من غير مناعة قوية. في أكلات معينة لازم تتضاف لنظامك ونظام عيلتك الغذائي عشان تقوي مناعتهم وتقلل من إصابته بالافنلونزا والأمراض.
الزبادي:
الزبادي فيها باكتيريا صحية الليبتخلي القناة الهضمية والأمعاء خالية من الباكتيريا والجراثيم اللي بتسبب الأمراض.
الشوفان والشعير:
الشوفان والشعير بيحتووا على البيتا جلوكان وهو نوع من الألياف اللي بيحتوي على مضادات الاكسدة ومضادات الميكروبات، وبيقوي المناعة، وبيسرّع التئام الجروح. الجرعة: لازم على الأقل يكون من ضمن وجبة واحدة من ال3 وجبات في اليوم.
الثوم:
الثوم بيحتوي على الأليسين، واللي بدوره بيحارب العدوى والباكتيريا، وبيقلل من نسبة الإصابة بالسرطانات.
المأكولات البحرية:
فواكه البحر زي الكابوريا وبلح البحر فيها كميات كبيرة من السيلينوم اللي بيساعد خلايا الدم البيضا إنها تنتج السيتوكينات اللي بدورها بتطرد فيروسات الإنفلونزا برا الجسم. السلامون، الماكريل، والرنجة كلها أسماك غنية بالأمويجا 3 اللي بتقلل الإلتهابات، وبتحمي الرئة من البرد والعدوى. الجرعة: مرتين في الأسبوع.
شوربة الفراخ:
أثناء طبخ الفراخ بيخرج منها الأمينو أسد اللي بيقوم بدور أدوية إلتهاب الشعب الهوائية؛ مرقة الشوربة المالحة دورها مشابه لدور أدوية الكحة، بالإضافة للبهارات والثوم والبصل اللي بيتضافوا للشوربة بيقووا المناعة.
الشاي:
الناس اللي بتشرب شاي خمس مرات في اليوم لمدة أسبوعين، قوة مكافحة جسمهم للفيروسات أعلى 10 مرات من اللي بيشربوا أي مشروبات تانية ساخنة. لأن الشاي بيحتوي على الأمينو أسيد اللي بيقوي المناعة.
اللحمة:
اللحمة بتحتوي على الزنك وهو مهم جداً لتطوير وإنتاج خلايا الدم البيضا أهم جزء في الجهاز المناعي اللي بتدمر أي باكتيريا ضارّة، أو فيروسات أو أي شيء غريب دخل الجسم.
البطاطا الحلوة:
يمكن ماتفتكريش إن جلدك وبشرتك ليهم علاقة بجهازك المناعي، لكن الحقيقة إنهم أول وأهم عضو فيه، لأن الجلد بيغطي الأعضاء التانية كلها وبيحميها من دخول أي باكتيريا أو أجسام ضارة. وعلشان يفضل جلدك قوي وصحي بيحتاج فيتامين أ اللي له دور رئيسي في إنتاج الأنسجة الضامة المكونة للجلد؛ البطاطا فيها بيتا كاروتين اللي الجسم بيحولوا لفيتامين أ.
المشروم:
المشروم بيزوّد إنتاج ونشاط خلايا الدم البيضا، وبيخليها قوية وعدائية أكتر. ودي حاجة كويسة جداً لجهاز المناعة علشان يحارب الجراثيم والباكتيريا والعدوى بشكل أحسن.
كتب: د/ الحسيني الشناوي، ترجمة: تسنيم عبدالله