محمود عزت كاتب موهوب وشغله مؤثر، اشتغل على فيلم فيلا 69 مع المخرجة آيتن أمين، ودلوقتي تم اعلان آخر فيلم ليه (اللي برضه من اخراج آيتن أمين) سعاد من ضمن الأختيارات الرسمية في مهرجان كان للسينما في 2020! محمود كمان شغال على مسلسل ما وراء الطبيعة على نتفليكس، المسلسل مبني على قصص الكاتب الراحل أحمد خالد توفيق اللي بتحمل نفس الأسم.
احنا قعدنا مع محمود عشان نتكلم معاه عن الكتابة والأفلام وطبعاً سعاد!
دي تاني مرة محمود يتعاون فيها مع آيتن أمين، والتجربة كانت مثمرة جداً، “قبل ما اشتغل مع آيتن أمين ومحمد الحاج على فيلا 69 ماكانش عندي اهتمام اوي في اني اكتب للسينما، كنت فاكر انه نوع تاني من الفن محتاج سنين مذاكرة وتدريب،” محمود يكمل، “لكن حبيت السينما من ساعتها، وبدأت في استكشاف النوع ده من الفن ودخلت فيه بكل جوارحي.”
شغفه الجديد بكتابة السيناريو خلاه يشتغل على فيلم سعاد، سعاد أخد وقت كتير ومجهود أكتر عشان يطلع للنور، “مش ممكن اوصف كم الشغل اللي اتعمل على سعاد وأوفيه حقه،” محمود بيقول، الفيلم اخد خمس سنين عشان يكمل، “خمس سنين من البحث والفرجة على مراجع ومناقشات طويلة مع آيتن وناس تانية، وسفر لمواقع التصوير، وكتابة واعادة الكتابة واعادة الكتابة،” يشرح لنا محمود، محمود وصف لنا الوضع اللي كان حاصل وإن كان في مسودات من السيناريو لسة بتطلع لحد آخر دقيقة في التصوير، بس أخيراً كل ده جاب نتيجة “كل اللي كنت بتمناه هو اني اشوف الفيلم خلصان وعلى الشاشة، فلما عرفت أن الفيلم هيروح كان كنت مبسوط قوي،” يكمل محمود “واول فكرة خطرت لي كانت ‘انت تستحق ده، انت وكل اللي آمنوا بالمشروع ده على مر السنين من غير سبب غير حبهم في السينما وسعاد.‘”
محمود مؤمن جداً بأهمية البحث للكتابة، “انا حضرت لسعاد بأني اعمل ابحاث كتير، قراية وفرجة وكلام مع الناس اللي تقدر تديني فكرة،” يستطرد محمود، “مايفرقش إذا كان الكاتب راجل وبيكتب قصص محورها الستات او العكس، مادام في مذاكرة واستكشاف للموضوع ومادام طريقة السرد قوية و مقنعة.” لكن برضه محمود مؤمن بأهمية الإٍستكشاف في شغله، “انا بحب أنواع مختلفة من الكتابة، بالشكل ده بيبقى عندي طرق مختلفة للتعبير عن مشاعري، أنا مازلت بستكشف فماقدرش اقول ايه النوع المفضل بالنسبة لي،” يقول محمود.
النوع ده من الاستكشاف والفضول تجاه الكتابة مهم اوي في رأي محمود، “اقروا سيناريوهات على قد ما تقدروا، اقروا عن كتابة السيناريو على قد ما تقدروا، اتفرجوا على افلام على قد ما تقدروا واغمروا نفسكم في الفن قد ما تقدروا واستمتعوا بالرحلة دي،” بيقول محمود، بالنسبة للمستقبل، محمود لسة مركز مع السينما، ” انا بشتغل على سيناريو فيلم جديد واتمنى ان على ما اخلصه يكون جاله التمويل اللي محتاجه واهتمام من المنتجين،” يختتم محمود.