لما بندخل في علاقة حب، بنبقى مستنيين حاجة تفرحنا وتدعمنا عشان تساعدنا نعدي بأي حاجة تانية ممكن تتعبنا في حياتنا. بس مش دايمًا ده اللي بيحصل. ساعات بندخل في علاقات تأذينا أكتر وتتعبنا حتى لو احنا مش حاسيين بده قوي، وفي الغالب كل اللي حوالينا بيبقوا شايفين ده. في علامات في العلاقة لو حصلت، ده معناه إنها مش أكتر حاجة مريحة وفي الغالب بنحتاج إننا نبص تاني على العلاقة من منظور مختلف ونسأل نفسنا، هل ده فعلًا اللي أنا محتاجاه؟
على طول بيحبطك
لما يكون بيركز في السلبيات دايمًا ومش شايف إنك بتعملي حاجة كويسة أبدًا وعلى طول بيدي تعليقات تحبطك.
بيحسسك إنك مش كفاية
لما يكون بيحسسك إنك مش كفاية مهما حاولتي تعملي وبيقلل من قيمة نفسك.
بتدي ومش بتاخدي
لما تلاقي نفسك بتدي كتير في العلاقة من غير مقابل. بتدي مشاعر واهتمام ومش بتلاقي زي اللي بتديه.
التحكم
لما يكون في تحكم زايد في كل الأفكار والتصرفات لدرجة تخليكي مش لاقية نفسك الحقيقية.
مافيش طاقة
لما تحسي إن معندكيش طاقة وإن على طول طاقتك مستنزفة من العلاقة والمشاكل اللي فيها.
قلة احترام
لو مافيش احترام متبادل بين الطرفين يبقى دي أكيد علاقة انتي ماتستحقيهاش.
خناقات طول الوقت
أي علاقة بيبقى فيها اختلافات وخناقات ومشاكل، بالذات في الأول وكل واحد بيفهم لسه التاني وإيه اللي بيضايقه. بس لو العلاقة كلها خناقات ومشاكل ومش بنلاقي حل لمشاكلنا دي يبقى دي علاقة موتّرة وصعبة.
مافيش تواصل
أسهل طريق لحل مشكلة بين اتنين هي التعبير. لو حد اتضايق من حاجة يتكلم في ده مع الطرف التاني عشان نوصل لحل والمشكلة متتكررش. لو مش عارفين تتفاهموا مع بعض وتعبّروا وتتواصلوا بطريقة أو تانية، هيبقى صعب جدًا تحلوا معظم مشاكلكوا وهتفضل تكبر معاكوا مع الوقت.
قلة ثقة
عمر العلاقة ما هتبقى مريحة لو في قلة ثقة بين الطرفين. دايمًا هيبقى في شك ومشاكل سببها الأساسي انعدام الثقة ودي علاقة مرهقة نفسيًا للطرفين ومصيرها الفشل لو ماتحلتش المشكلة دي.