الجواز
فى سنة 2020 كان فى 902,000 جوازة في مصر
وبرضو في 2020 كان في 218,000 حالة طلاق في مصر
نسبة الطلاق في مصر السنة الي فاتت كانت 24%
والسنة دي لسة فى ناس بتسأل “النجف على مين؟”
ونقاشات لا متناهية عن قضية كتابة قايمة من عدمه
النجف والطلاق
إيه يا ترى السر فى إن حال الجواز إتدهور ونسب الطلاق فى تزايد لكن الطريقة الي المجتمع بيفكر فيها في قضية الجواز زي ما هي؟ إمتى هينزلنا السوفت وير أبديت الي هيخلي الأهالي يبطلوا يتعاملوا مع الجوازة على إنها صفقة؟
وخليني أوضح نقطة هنا قبل ما تخشوا عليا ببوستات الشاب الي جاب دبلة صفيح وعمل فرح على 2 متر نجيلة صناعي ويلا بينا نخليها سهلة عشان ماعناش فلوس ونخلف أطفال نشحت بيهم!
السيناريوهات يا إما كلها مصالح ومنطق إنتفاعي يا إما مشاعر كتيرة ومعازيم قليلة عشان الحد الأدنى من الإمكانيات المادية مش موجود! وما بين ده وده مفيش حد عرف يعمل إيه.
كائن الجواز
المشكلة الأساسية إن كائن الجواز في الواقع المصري بقى مسخ مالوش معالم. لا إحنا عارفين نمشيها على سنة الله ورسوله والست تاخد مهرها وتيجي ببجامتها ولا إحنا عارفين نبقا زي الأجانب الي لو عرفوا إن العريس عليه النجف والمطبخ والعروسة عليها السجاد والستاير هيعملوا من الكوميكس بتاعتنا بطاطس محمرة!
السؤال المهم هنا هو “أنا بتجوز ليه؟” وهل “أنا أصلا مؤهل أتجوز ولا عبيط والشارع كله عارف؟” طول ما إحنا بنتجوز عشان الناس بنتجوز وعشان مبقاش فاتني القطر وقعدت في أول ديسك وخدت الخازوق من أوله لآخره مش هنطلع من الدوامة دي أبدًا! الجواز ده قرار كبير ومصيري ولما بنعرف إحنا بناخده ليه بنقدر يبقى عندنا رؤية لتنفيذه.
الجوازات الي باظت عشان خلاف في الماديات أكتر بكتير من الجوازات الي باظت عشان خلافات على المستوى الإنساني! طيب لو الجواز صفقة كده لسه في أطراف بترفض حق الست في إنها تشترط شروط معينة في عقد الجواز؟ وليه الناس بتكتب مهر أقل من الي إتدفع عشان الجمرك الي هيتدفع على المهر! شفتو لما الكلام بيتقال بالمفتشر بيبقى دمه تقيل إزاي؟ أنا بقولكم كلام سمعته بوداني وعشته بنفسي ومع أصحابي.
ييجي وحش الطلاق يخبط على الباب بقى الوعود تتنسى والكلام يتلحس والقايمة تضيع والمؤخر يتاكل والمماطلة تشتغل والحقوق بتفضل حلوة لما بنكون على البر بس لما بنيجى نغرق كل واحد بيقول يلا نفسي. أنا أعرف واحدة وهي بتطلق جوزها قالها ترجع لخالته الهدية الي كانت جايباها ليها! أه ونبي وإتكلها على السين كدهون! الي هو هاتي صوري وجواباتي ودباديبي والصندل الي خالتي كانت جايباهولك!
أتمنى في 2021 الرؤية تتحرك عشان يبدأ التطور ده ينعكس على نسب الطلاق. قولوا لبناتكم إن الجواز مش مهمة رسمية ولا واجب عليها وقولوا لولادكم إن الذكورة بالولادة بس الرجولة بالمواقف.
أنا ريجينا عنانى لايف كوتش وبركز أكتر على مواضيع اللايف ستايل والكاريير. أنا من HR الطيبيين وإشتغلت في شركات مختلفة جوّة وبرة مصر.
عندي إدمان للكتب وشرب القهوة! أنا بحب أقدم محتوى مختلف مبنى على خبرتي.
إيه أكتر حاجة نفسي فيها؟ نفسي أشوف ستات اكتر فى مناصب مؤثرة وعندهم فرص لامتناهية في النمو والنجاح.