“مطلوب سكرتيرة حسنة المظهر لا يزيد سنها عن 30 سنة”. اتكلمنا كتير عن الإيجابية الجسدية في الحياة بشكل عام وتأثيرها على نفسيتنا و على كل جوانب حياتنا. طيب، ماذا عن الإيجابية تجاه شكل جسمنا في الشغل؟ ولا ميصحش على أساس إننا بنروح الشغل بمخنا ونسيب جسمنا متعلق على الشماعة في البيت؟ عامة أنا بحب أتكلم أوي على الحاجات اللي وأنا صغيرة كانوا بيقولولي ميصحش أتكلم فيها!
في فرق كبير بين اللائق في الشغل وينفع يتلبس وإننا نشجع كل الناس من كل الأحجام إنهم يبقى ليهم حق متساوى في فرص العمل طالما عندهم المؤهلات المطلوبة للوظيفة. عمره ما هيبقى طبيعى إني أروح الشغل بالمايوه إلا لو بشتغل على البحر فنحط النقطة دى على جمب بسرعة كدة ونتحرك!
الشغل ملوش مقاس
هحكيلكم قصة من تراث الإتش آر بتاعي…
الحكاية دى حصلت من 10 سنين بس فاكراها كأنها كانت إمبارح. كنت بشتغل في شركة وكانت بتدور على شاب يشتغل في تكنولوجيا المعلومات عشان تجهيز المواقع الجديدة وحل مشاكل توصيلات الشبكات وخلافه. عملت إنترفيو لشاب طلوقة وكنت متحمسة جدًا ليه.
المدير رفضه عشان “تختوخ” ومش هيقدر يعمل المجهود الحركي المطلوب للوظيفة.
طبعًا حلفتله بشرف أمي إن مفيش علاقة وإن في 3 شهور نجرب فيهم الشاب طبقًا لقانون العمل، رفض. المهم أنا قلت “روح يا شيخ ربنا يديك على قد نيتك!”
المهم بعدها عّين شاب فورمة والبايسب بتاعته أد الكنتالوبة. أومال إيه هيعمل جيم في الشبكات ويحرق الجيجابيتات والسعرات… طلع بقى إيه؟ كسول! ومبيجيش الشغل عشان بيسهر بليل ويغيب بالأيام واترفد في أول 3 شهور برضو!
الكفاءة بتتحدد إزاي؟
الاعتقاد إن في شخص جاد أكتر تجاه شغله عشان وزنه شيء حقير جدًا.
وكم من أشخاص وعلى يدى (بصوت فؤاد المهندس) قدروا إنهم يخدعوا شركات كاملة بإنهم مؤهلين لمجرد إنهم “المقاس المقبول” مش المؤهل الصح!
الضغط اللي الفكرة دي بتحطه علينا كستات شيء محبط جدًا وكأني هكافح في فرص العمل 100 مرة عشان واحدة ست و”أكيد عايزة تروح بدرى عشان عيالها” وكمان “دى مقاس إكس لارج المكتب مش هيكفيها!” عيب بجد!
رسالة لكل ست
مش من حق أي حد إنه يحسسك إن جسمك أو حجمك جزء من مؤهلاتك لأن إنتى مش سلعة ولا فازة.
وللسبب ده أنا صورتى مش في السى ڤي بتاعى وعمرها ما هتبقى في السى ڤي عشان زهقت من رغبة أي صاحب عمل في إنه يتطمن إنى مش محجبة!
رسالة لكل شركة بتمارس التمييز ضد أي شخص لمجرد إن مقاسه مش مقبول بنسبالهم:
إنتم بتضيعوا على نفسكوا فرص مع أشخاص مؤهلين لأنكم مش فاهمين يعنى إيه مؤهل ولا عارفين إنتم بتدوروا على إيه في الموظفين اللي ممكن يبقوا شركاء في نجاحكم ويكبروا الشركة معاكم.
أنا ريجينا عنانى لايف كوتش وبركز أكتر على مواضيع اللايف ستايل والكاريير.
أنا من HR الطيبيين وإشتغلت في شركات مختلفة جوّة وبرة مصر. عندي إدمان للكتب وشرب القهوة! أنا بحب أقدم محتوى مختلف مبنى على خبرتي.
إيه أكتر حاجة نفسي فيها؟ نفسي أشوف ستات اكتر فى مناصب مؤثرة وعندهم فرص لامتناهية في النمو والنجاح.