مفيش أحلى من انك تبقي في عيلة دايمًا بتدعمك و تشجعك انك تحققي كل اللي نفسك فيه، خصوصًا لو عيلة فيها ستات طموحة زي ناردين و دانا، بين جلسات التصوير و السفر و التدريبات أكيد الروابط العائلية بينهم مرت بصعوبات، بس هما قدروا يتغلبوا عليها.
دانا اللي عندها 16 سنة دلوقتي بدأت تلعب كرة قدم من و هي عندها 5 سنين، و انضمت لنادي تشيلسي الإنجليزي لمدة أسبوعين السنة قبل اللي فاتت.
وكلنا عارفين ناردين كمقدمة برنامج The Voice Kids وفقرات من Arabs Got Talents وقدمت كمان حفل ختام مهرجان الجونة السنة قبل اللي فاتت.
قابلنا دانا و ناردين عشان يحكوا لنا أكتر عن إنجازاتهم و يقولولنا اعترافات ماتقالتش قبل كده قدام الكاميرا.
ايه الحاجة اللى خبيتيها عن مامتك و لسه متعرفش عنها لحد اللحظة دي؟
دانا: اني جبت C في الفيزياء بس جبت A في الرياضيات، كنت عايزة أقول لك لما رجعت من المدرسة بس انت ماكنتيش في مود حلو.
ايه الحاجة اللى خبيتيها عن دانا و متعرفش عنها لحد اللحظة دي؟
ناردين: لما باباكي بيبقى عايز يعرف حاجة عنك و مش بيعرف ياخد المعلومة منك بيخليني أعرفها أنا منك و بقعد أقولك مش هقول لبابا بس بقول له، بصراحة على حسب الموضوع.
ايه السؤال اللي ماكنتيش عارفه تجاوبيها عليه و اضطريتي تخترعي أي قصة؟
ناردين: الجيل ده غيرنا، هم عارفين كل حاجة مش محتاجين إجابتنا على حاجة، هي أصلًا ساعات بتقول لي على حاجات انا ماعرفهاش، بيرجعوا لنا بس لو في حاجة شاكّين فيها، ساعتها بنقول لهم اللي نعرفه و اللي مانعرفهوش بس دانا غير كده، هي مستقلة فبتعتمد على نفسها.
كان ايه رد فعلك لما عرفتي شغف دانا بكرة القدم؟
ناردين: اهتمامها بالكرة بدأ و هي عندها 5 سنين كهواية و بعدين لاقيتها مهتمة بالموضوع اكتر، عرفت وقتها ان هي دي الحاجة اللي عايزة تعملها و كنت دايمًا بقول لها و آخرتها ايه الكرة هنفضل نلعب بيها كده زي الولاد؟
قولت لباباها ساعتها اني مش عايزة ده يبقى الكارير بتاعها، لحد ما في يوم قالت لي ان ده حلمها وشغفها ووقتها اخدت بالي هي أد ايه شاطرة، باباها اخدها لتشيلسي عشان يتاكد انها علي الطريق الصح، أنا مش عايزة اقف في سكتها عشان ماترجعش تلومني في يوم عشان كده أنا بدعمها في كل خطوة.
إزاي عيلتك واصحابك بيدعموكي؟
دانا: بصراحة كلهم بيدعموني و بيشوفوا كل ماتشاتي، بس بابا هو أكتر حد بيشجعني و بيشوف كل ماتشاتي و بيسجلها عشان نرجع نشوفها تاني مع بعض، و كمان بنشوف كل ماتشات الكرة سوا.
أنتوا الاتنين مختلفين تمامًا عن بعض، ده بيعمل مشاكل و لا بيقربكوا أكتر من بعض؟
دانا: أكيد عندنا تحديات، انا بفكر بطريقة مختلفة تمامًا، مثلًا في الطريقة اللي بعمل بيها شعري أو طريقة لبسي، و كمان بنختلف انهي أهم الكرة ولا المذاكرة.
ناردين: على الرغم اننا فعلًا مختلفين في حاجات كتير بس في حاجات مشتركة بينا، زي اننا طموحين و ان دانا عارفة كويس هي عايزة ايه و دي حاجة كويسة جدًا لإنها يومها متعب جدًا بتصحي للمدرسة الساعة 5.30 الصبح و بتقضي 4 ساعات في طريقها للتمرين فمافيش حد ممكن يستحمل كل ده لو مش محدد هو عايز ايه.