مع بداية الصيف، بترجع تاني مشاكل البشرة والشعر، علشان كدة جمّعنالك مجموعة زيوت، مفعولها زي السحر لبشرتك وجمالك؛ سهل جداً تشتريها من عند العطار.
زيت الزيتون:
غني بفيتامين A و فيتامين E، زيت الزيتون بيطرب البشرة، وبيساعد على تجديد خلايا الوش ونضارتها.
الاستعمال:
- على جسمك: بعد الشاور، ادهني كام نقطة من الزيت على جسمك كله.
- لضوافرك: انقعي ضوافرك في زيت الزيتون لمدة عشر دقايق، مرتين في الإسبوع.
- ماسك لوشك: اخلطي نقط من زيت الزيتون مع عصير الليمون، وحطي الخليط على وشك لمدة 5-10 دقايق، بعد كدة إغسلي وشك بمياه دافية، وبعدين اغسليه بمياه ساقعة علشان تقفلي المسام.
زيت جوز الهند:
غني بالبروتينات، بيحافظ على صحة البشرة، غني بفيتامين e اللي بدوره بينعم البشرة، ومرطب قوي للبشرة الجافة.
الاستعمال:
- مرطب شفايف: تقدري تحطيه على شفايفك، بيقلل من نسبة التشققات فيها، وكمان طعمه حلو.
- للرجل: زيت جوز الهند له مفعول قوي ومرطب، على كعب الرجل لو متشقق أو ناشف.
- مزيل للميك أب: تقدري تخلطي نقط من زيت جوز الهند، مع نقط من مياة الورد، وتستعملي الخليط علشان تشيلي الميك أب.
زيت اللوز:
غني بفيتامين e، بيستعمل للبشرة الحساسة علشان مابيسببش أي حساسية، تقدري تحطي نقط منه على وشك قبل النوم، وهاتصحي تلاقي بشرتك ناعمة جداً ومشرقة.
الاستعمال:
- للوش: زيت اللوز بيقلل التجاعيد وعلامات تقدم السن، وبينوّر البشرة.
- للعين: لو عندك سواد تحت عينيكي أو انتفاخ، حطي من زيت اللوز تحت عينيك قبل ما تنامي، وهاتلاحظي فرق كبير خلال أسبوعين.
زيت الجوجوبا:
فوايده مشابه لفوايد جوز الهند، وكمان تقدري تستخدميه كغسول، بينضف البشرة من الزيوت والدهون المضرّة.
الاستعمال:
- للوش: استخدمي من 4-6 نقط من زيت الجوجوبا على وشك للتطريب.
- لآثار الحبوب: زيت الجوجوبا بيحتوي على مادة الأيودين، اللي بدورها بتحارب الباكتيريا اللي بتسبب الحبوب، والرؤوس السوداء.
- للشعر: بيتخلص من القشرة، ومفيد جداً لفروة الشعر الجافة.
- للتجاعيد: مضادات الأكسدة الموجودة في الزيت بتساعد على تنعيم الخطوط والتجاعيد. حطي من الزيت في قطنة ومرريها حوالين عينيكي، شفايفك، ورقبتك، علشان توصلي لبشرة شابة، ومشرقة.
زيت الروزماري
بيشد البشرة، وبيمنع ظهور الخطوط والتجاعيد.
زيت الليمون: بيفتح المناطق الغامقة، وبيمنع ظهور الخطوط والتجاعيد.
نصايح للحفاظ على بشرتك:
- أتاكدي تشيلي الميك أب كل يوم قبل ما تنامي
- اشربي مياه كتير
- افتكري إن أي حاجة هاتكليها هاتأثر على بشرتك
- ماتستخدميش منتجات كتير على بشرتك، كل ما استعملتي منتجات أبسط كل ما تأثيرها كان أقوى
- نضفي بشرتك دايماً.
