رانيا مميزة من ساعة ما اتولدت، اتولدت بمرض اسمه Osteogenesis Imperfecta، المعروف لينا بمرض هشاشة العظام، والمرض ده بيخلي عظم البني آدم يتكسر بسهولة وبيسبب نقص في هرمون النمو، رانيا كانت هشة لدرجة انها كانت بتتكسر وهي لسة في بطن مامتها.
بعد ما عملت بوست على فيسبوك بتقول فيه ان نفسها تبقى مشهورة، روحها الجميلة وكلامها المبهج حركوا مشاعر آلاف المصريين، بنت الإسكندرية بقت مشهورة ومن ساعتها بتنشر طاقتها الإيجابية دي لكل اللي بيحتاجها، بنقعد معاها ونتكلم عن رحلتها دي.
كلنا فاكرين البوست اللي خلاكي مشهورة، حياتك اتغيرت ازاي من ساعة ما عملتي البوست ده؟
عمري ما كنت اتخيل رد الفعل ده، انا عملت صفحة فيسبوك بعدها وبدأت اعمل فيديوهات، أهم جزء من ده كله اني بدأ يجيلي رسايل من ناس عندها ظروف صحية شبهي، بعضهم اهاليهم ماكانوش قادرين يتقبلوا انهم في كرسي متحرك، انا مبسوطة اني أثرت بشكل ايجابي على حياتهم، قالوا لي انهم قبلوا الكرسي المتحرك وبطلوا يتكسفوا منه واني انا مسؤولة عن التغيير ده.
بس انتي عمرك ما كان عندك مشكلة انك تتكسفي من الكرسي مش كدة؟
لا، عمري ما اتكسفت.
بتحلمي بأيه كمان؟
احب جداً اني يكون ليا فقرة في برنامج تليفزيوني، حاسة ان دي حاجة ممكن تزود ثقة الناس في نفسها لو شافوني بقدم فقرة، هيعرفوا ان مافيش حاجة مستحيلة.
ايه هي الرسالة اللي بتحاولي توصليها في مدونتك وفيديوهاتك؟
اهم حاجة هي الأمل، ان الواحد يكون عنده أمل وعمره ما ييأس، افضل حاول لحد ما توصل لحلمك حتى لو وصلت له وانت عندك 60 سنة.
ايه اكتر رسالة مشجعة وصلتلك؟
في مرة وصلتني رسالة في 2017 لما كنت في برنامج على التليفزيون من بنت، البنت قالت انها كانت هتنتحر وغيرت رأيها بعد ما شافتني، كنت مصدومة، انك توقف حد عن انه ينتحر دي حاجة كبيرة اوي.
انتي شايفة ان مجتمعنا دلوقتي عنده وعي واحترام اكتر للناس ذوي القدرات المختلفة؟
في تحسن حوالي 60% لو الأطفال اتعودوا على انهم يتقبلوا الناس المختلفة من وهم اطفال مش هيبقى في مشكلة اصلاً، هما مش متعودين يشوفوهم، خصوصاً ان بعض اهالي الناس ذوي القدرات المختلفة بيخبوهم عشان مكسوفين.
ذوي القدرات المختلفة محتاجين ايه في مصر؟
اول حاجة محتاجين تشجيع، وطبعاً ان المواصلات والطرق تبقى ميسرة اكتر ليهم عشان مايحتاجوش حد، اوقات بيجيلي رسايل من ناس بتستخدم كراسي متحركة بيقولوا لي انهم ماشافوش الشارع من شهور، لو ساكنين في دور عالي وحجمهم مش لازم يكون صغير زيي، مابيقدروش ينزلوا من غير اسانسير، انتي متخيلة؟
ازاي الناس المفروض تتعامل مع اصحابهم وافراد عيلتهم ذوي القدرات المختلفة؟
شجعوهم انهم يفضلوا يعملوا اللي بيحبوه، شجعوهم وماتحسسوهمش انهم اقل من غيرهم وماتشفقوش عليهم، ادعموهم لحد ما يوصلوا لهدفهم.