كتبت: تسنيم عبد الله
النوبة مدينة ساحرة، مفيش حد في مصر أو حتى برّه مصر مابيسمعش عن النوبة وجوّها وألوانها، وشكل البيوت. مدينة مختلفة تماماً، وليها روح تاني، ومختلفة عن كل مدن مصر. علشان كدة ندي الحلفاوي مؤسسه مشروع جنوبي، قررت تستغل جمال وسحر النوبة، وتنتج منه تصاميم مبهجة ومليانة ألوان. اتكلمنا مع ندى علشان نعرف منها أكتر عن مشروع جنوبي.
ندى الحلفاوي -27 سنه- اتخرجت من اكاديميه الفنون قسم تصميم داخلي وديكور 2013 – وبعدها درست دبلومه جرافيك وتخصصت في مجال تصميم الجرافيك، من النوبة، أسوان.
إزاي جتلك فكرة مشروع جنوبي؟ وليه؟
الفكره كانت نابعه من اصولي، واللي اتعلق بيه قلبي وأثر في رسوماتي اللي عجبت ناس كثير، وتشجيع اللي حواليا إني أعمل جاليري فيه منتجات فيها نفس الروح اللي اتميزت بيها.
ليه اخترتي الموديلات الجنوبية عموما؟
اخترت الاسلوب ده لانه مبهج، علشان بيجمع بين الرموز والاشكال المختلفة ولانه يستحق ان يكون له علامه تجاريه خاصه به تجمع ثقافاته المخلتفه والفريده من السودان واسوان و جنوب افريقيا والفن اللي بيميز كل بلد منهم من البيوت والأزياء.
ليه شايفة ان فكرة بيع منتجات ملهمة من الثقافة حاجة مهمة؟
مهم اننا تكون ملابسنا مختلفه وخصوصا ان ثقافه الجنوب بتجمع الكثير من الاشياء المميزه اللي ليها طابع مبهج وبتضيف لملابسنا البهجه كمان، واستخدام ثقافه كل منطقه منهم بشكل عصري و مواكب للموضه، وترسيخ ثقافه الجنوب عن طريق الفن والرسومات المعبره لكل ثقافه منهم. فبنلاقي إن الناس اللي مش من الجنوب اعجبوا بالتصاميم وعايزين يلبسوها هما كمان.
بتعرضوا على صفحتكوا على انستجرام Models مختلفين وبتعرضوا أنواع مختلفة من الجمال بطريقة طبيعية جدا، ليه شايفة ان ضروري يبقى في دائما models أو أشكال مختلفة من الجمال لتمثل البنات عموما؟
حبيت اكمل تصميمات جنوبي باختياري لعارضات عندهم نفس صفات و طابع الجنوب الجميل و الملامح الطبيعيه لاهل الجنوب علشان تكتمل الفكره للمشاهد.
امتى فتحتي المشروع، وايه وضعه في السوق حاليا؟
مشروع جنوبي بدأ من سنه، الوضع ممتاز اكثرمن توقعاتنا له، وكمان عليه اقبال من مختلف البلاد اللي حابين وعايزين يشتروا منتاجتنا.
ايه هي تطلعاتك وطموحاتك المستقبلية؟
تطلعاتي الفتره الجاية هي فتح الجاليري الخاص بينا وانتاج كميات أكتر من المنتجات المختلفه اللي تناسب مختلف الاعمار والاذواق؛ وعايزين ننتج تصميمات للرجالة والاطفال كمان.
كام حد بيشتغل في جنوبي والتصميمات بتكون تصميم مين؟
إحنا اتنين لحد دلوقتي، والتصميمات والتنفيذ بالكامل من انتاج ندي الحلفاوي مؤسسه المشروع.