ترجمة : تسنيم عبد الله
إحنا ممتنين جداً للعالم الرقمي، لإن بفضله قدرنا نشوف مواهب عبقرية، بننبهر بغُناهم وطبقات صوتهم. وأول اسم بيتربع عرش قائمة المواهب دي هي ندى أيوب أو NäP. موهبة المغنية والمؤدية المصرية المميزة ندى شافت النور ونجحت من خلال ظهورها في برنامج صاحبة السعادة. ومن وقتها ما زالت ندى بتفاجئنا بألحان المبتكرة وجديدة بتضيف روح فريدة ومثيرة لمزيكتها. ولإنها موهبة فذة كان لازم مانفوتش الفرصة ونقابلها ونتكلم معاها عن المزيكا والفن والتحديات اللي واجهتها في بداية مشوارها الفني.
بقالك قد إيه بتغني، وإيه اللي خلاكي تبدأي مشوارك الموسيقي؟
بغني وأنا عندي 14 سنة؛ بس بدأت الغُنا الإحترافي من سنتين. كنت بغني في فرقة المدرس، وغنيت في معسكرات فنية مختلفة، ومسارح صغيرة في هنغاريا –لحد ما جاتلي ضربة الحظ في برنامج “صاحبة السعادة”. أهلي نمّوا جوايا حبي للمزيكا: بابا مثلاً كان بيسمّعني أغاني فرانك سيناترا، وUB40، ومايكل جاكسون؛ وماما كانت بتحب تشغلّي بينك فلويد وكرانبيريز في العربية وأنا رايحة المدرسة. أنا حالياً شغالة على ألبوم، بس الفئة اللي بتسمع موسيقى أجنبية في مصر محدودة جداً؛ ولو بيسمعوا فـ دايماً بيختاروا يسمّعوا الموسيقى التجارية مش الفنية.
مين من الموسيقيين مؤثر فيكي فنياً؟
محلياً، بحب رامي دي جي، نسمة محجوب، هاني مصطفى، ودعاء السباعي. عالمياً، جورجا سميث، هانز زيمر، Guns and Roses، Evanescence، Fka Twigs، بيونسيه، Eurythmics، وطبعاً ويتني هيوستن. هما مجموعة مختلفة، بس كلهم بيلهموني لأسباب كتير. لو هاتكلم عنهم المقال هايبقى أطول من 400 صفحة.
إنتي مش بتغني إنتي كمان بترقصي، واجهتي أي تحديات بسبب كونك راقصة curvy في مصر؟
أنا مش مؤمنة بفكرة إن البنت لازم تبقى رفيعة؛ أنا مؤمنة بفكرة إنها تكون عندها لياقة بدنية. أجسامنا هي أقوى حاجة فينا وهي اللي بتشيلنا في مشوارنا في الحياة، لكن مع الأسف، الميديا بتضغط علينا علشان نشوف الدنيا بشكل تاني. في شركة عالمية قررت تشيل مشاهدي كلها من مشروع صغير كان المفروض أشارك فيه، لإني curvy. كانت شركة مشروبات غازية، بس هما بيفضلّوا يخلّوا الناس تتخن وجسمها مايبقاش صحي على إنهم يبينوا ده في إعلانتهم. كوني راقصة curvy ماكانش عائق بالنسبالي أبداً؛ بالعكس ده أداني القوة إني أشتغل وأحارب أكتر. خلّاني عندي لايقة بدنية وقادرة أتحكم في جسمي، ودايماً بسمع إطراءات من الناس على خفة جسمي ورشاقتي برغم وزني.
في رأيك المجتمع المصري بيشوف الست الـ curvy إزاي؟ وهي بيبقى إحساسها إيه؟
الحقيقة إنه بيبقلها بشكل كبير مقارنةً بدول تانية. بما إني هنغارية، دايماً بحس إن في كلام وإساءات وأحكام على أي ست مش رفيعة في الدول الأوروبية على عكس مصر. بس أحياناً بيبقى صعب لإن في دايماً مؤثرات خارجية بتقولنا إيه هي معايير الجمال، وعُمرنا ما بنركز على الجمال الداخلي. علشان في بنات كتير بيغيروا في شكلهم واستايلاتهم كل شوية علشان بس يرضوا وينالوا إعجاب المجتمع.
من وجهة نظرك ليه الناس في مصر بيفتقدوا ثقافة تقبّل الجسد؟
إحنا بنفتقد ثقافة تقبّل الإختلاف لإن أي حاجة مش متعودين عليها بتبقى خطر بالنسبالنا. زي مثلاً الشعرالكيرلي دلوقتي بقى تريند –مع إنه من كام سنة كدة كان بيُعتبر شعر مش مُهتمة بيه ومش مترطب، وشكله وحش. تقبّل الجسد ماينفعش يعتمد على المظاهر. تقبّلك لجسمك في وضعه الطبيعي حاجة أنا مؤمنة بيها بقوة. المهم بس إنه يكون جسم صحي وقوي.
إمتى قدرتي تقبلي جسمك؟ ولا كان عندك دايماً الإحساس ده؟
هابقى بكذب عليكي لو قلتلك إني بقبل جسمي دايماً. أنا كنت دايماً عارفة إني بنت مليانة. أنا خسيت لإني مابسمحش لأي حاجة إنها تعقيني في حياتي –ولا مؤسسة، قانون، أو حواجز. لما وزني بقى حاجز بيني وبين نشاطاتي، قررت أدوّر حلول علشان يبقى جسمي صحي أكتر ولائق بدنياً. الهدف هو جسم صحي. مش جسم مثير.
إيه النصيحة اللي عايزة تقدميها لستات الـcurvy؟ وتحبي تقولي إيه للبنات الـ curvyاللي عايزين يدخلوا المجال الفنّي؟
من أهم أساسيات الثقة بالنفس هي حُبك لنفسِك. لازم تتعلمي تحترمي وتقدري كل جزء في جسمك مهما كان شكله. كل ما هاتتعاملي مع جسمك بلطف، كل ما هاتحسي بحُب وراحة نفسية من جواكي. انبسطي بجسمك لإنه مرّ بحاجات كتير جداً معاكي طول حياتك واستحمل. قوة جسمك وطاقتك هي الأهم، لازم تحتفلي بيه وتقدريه مهما كانت حالته. كوني حريصة إنك ماتقعيش في دوامة رفضك لجسمك والخجل منه.
الستات عايزين إيه؟
الست مابتعوزش، الست بتروح تاخد اللي هي عايزاه بنفسها.
