الطلاق من اصعب التجارب اللي ممكن تمر بيها الأسرة، القرار ده بياخده اتنين ناضجين فاهمين ان ده احسن اختيار في الموقف ده، لكن اطفالنا مابيبقوش فاهمين ده، اكتر حاجة الاطفال بتكون محتاجاها في الوقت ده هو التوازن العاطفي، وده صعب بعد الطلاق لأن احنا نفسنا بناخد وقت لحد ما نوصل للتوازن ده، بس برضه عايزين نكون على الاقل على دراية بالاخطاء اللي ممكن نعملها ونحاول نتجنبها، مع الوقت هتوصلي للتوازن في حياتك وده هينعكس عليهم، لكن قبل ما نبتدي، عايزاكي تشوفي الحاجات من منظور طفلك.
الكلام بطريقة وحشة عن طليقك
دي من اصعب الحاجات، ساعات بتكوني عايزة تحكي لهم عشان يفهموا انتي بتمري بأيه، او عشان تقربيهم منك، بس لما بتتكلمي وحش عن طليقك، كل اللي بيفكر فيه طفلك هو “انتي بتتكلمي وحش عن بابا”، لما بتنتقدي طليقك قدام اطفالك، بيطبقوا الكلام ده على افعالهم هم، مثلاً “انا كمان بحب اخرج مع اصحابي، ده معناه اني مش مسؤول زي بابا؟” او “انا بعيط لما بزعل، ده معناه اني نكدية زي ماما؟” مع الوقت بيبتدوا يصنفوا نفسهم او يعكسوا تصرفاتهم عشان “مايبقوش زي ماما او بابا.”
الكلام عن الفلوس
ماتدخليش طفلك في المعارك دي، الأب اللي دايما بيقول انه “دفع” المصاريف كأن الفلوس دي بتروح لحد غريب، والأم اللي بتقول انه مش كفاية أو ان الأب مش بيصرف كفاية، ماتجيبيش السيرة دي قدامهم، فهميهم وضعك المادي واديهم اختيارات بكمية الفلوس اللي متوفرة ليكي، ولما يكبروا هيقدروا اللي مريتي بيه.
قلة التواصل
كل الأمهات بيوصلوا لمرحلة انهم يفقدوا السيطرة على مشاعرهم ويبدأوا يصرخوا، انتي مش لوحدك، تواصلي مع اطفالك وفهميهم مشاعرك، قولي لهم امتى احسن وقت يكلموكي فيه، مثلاً “اطلب مني اللي انت عايزه بعد ما اروح وارتاح، مش على التليفون او وانا تعبانة.”
انك تخليهم يختاروا بينك و بين طليقك
اطفالك بيحبوكم انتوا الاتنين بطرق مختلفة، انك تحطيهم في موقف انهم لازم يختاروا بينكم ده بيخليهم حاسين انهم هيغدروا بحد فيكم! انتي متخيلة قد ايه ده ممكن يأثر على طفل نفسياً؟
انك تحاولي تغيريهم
اوقات بتكوني مصدومة من بعض تصرفات طليقك، فما تشوفي طفلك بيعمل نفس التصرف بتتجنني! بس افتكري ان الجينات ليها دور كبير فماتحاوليش تغيريهم، ممكن تزودي حاجات على التصرفات دي، مثلاً لو طفلك بيحب المغامرة زي باباه، ماتخليهوش يبطل، بس علميه انه يكون مسؤول.
انك تخليهم يتجسسوا ويكذبوا
اوقات بتبقي عايزة تعرفي طليقك بيعمل ايه، بس اوعي تعرضي اطفالك لمواقف تخليهم يكذبوا او يتجسسوا! ماتربيش كذابين وغدارين.
الفضفضة على السوشيال ميديا
خليكي عارفة ان اطفالك هيربطوا كل اللي بيشوفوكي بتحطيه على السوشيال ميديا بحياتكم، لما بتعملي شير لحاجات بتتكلم عن الرجالة والعلاقات بطريقة سلبية انتي بتديهم رسالة سلبية غير مباشرة.
السماح بحاجات عشان تكسبيهم
بطلي تحاولي انك تكوني المفضلة عندهم، لما بتسمحي بتحاجات طليقك منعها عشان تكسبيهم في صفك انتي كدة بتربيهم على انهم يبقوا متدلعين وانانيين ومتلاعبين لما يكبروا.
ماحدش غلطان هنا
زي ما انتي حاسة بالذنب، الاطفال برضه بيحسوا ان اللي حصل ده غلطتهم، بس هي مش غلطة حد، انتي محتاجة تفهمي انك عملتي كل اللي تقدري عليه ومحتاجة تخلي اطفالك يفهموا ده كمان، حاجات مختلفة بتحصل لعائلات مختلفة، في ناس بتمرض وفي ناس بتخسر فلوسها وفي ناس ممكن يخسروا ابوهم او امهم وفي ناس بتتطلق.
انك تهملي صحتك الجسدية والنفسية
اوعي تنسي تاخدي كام ساعة كل اسبوع تعملي فيهم حاجة انتي بتحبيها، بعد الطلاق انتي محتاجة تحبي نفسك تاني وتفهمي نفسك من جديد، اختاري هواية او رياضة او اي حاجة طول عمرك كنتي عايزة تعمليها.
شيماء اشتغلت في الإدارة والتدريب ودلوقتي هي بتعمل ماجستير في علم نفس الأعمال، بتمارس الغطس والسفر، قررت انها تسيب شغلها وتجري ورا شغفها في مساعدة الناس والبيئة عن طريق تقديم جلسات لنشر الوعي والتطوع في الخارج، عايزة توصل لابنها تقي وتعلمه عن طريق التدوين والكتابة.