ترجمة: تسنيم عبدالله
الكاميرا بتحبها بدون شك! إنجي المقدم بتستمر في مفاجئتنا بأدوارها المذهلة، وبكل دور جديد بتقدمه بتثبتلنا إنها موهبة إستثنائية. التقينا بالفنانة الموهبة جداً إنجي المقدم واتكلمنا معاها عن مشاريعها الجاية، ودور الست في السينما. وكان من حظنا إننا قدرنا نعرف أكتر عن شخصيتها.
الأدوار القيادية الناجحة والقوية قد بدأت تتلاشى تدريجيا من الشاشة الفضية، وده خلّى المرأة تلعب عدد صغير جداً من الأدوار القيادية في صناعات التليفزيون المصري وصناعة السينما. زي ما إنجي بتقول”للأسف ، فضلت أدوار الستات تتدهور من بداية الستينات، بسبب التطرف الديني اللي يقمع الستات، ويحد من أدوارهن، ومشاركتهن، في المجتمع. وده انعكس على الأدوار النسائية الرائدة في السينما. أعتقد دلوقتي إن التغيير بدأ يشق طريقه تدريجيا لمجتمعنا، زي ما بنشوف مع كل التغييرات اللي حصلت في السعودية”.
أما بالنسبة لتصوير دور الست في السينما، فغالباً ما بيشخصها كتّاب السيناريو والمنتجيين على إنها حاجة حلوة تشوفها العين أو كائنات ضعيفة ومعتمدة على الراجل. “السينما العربية بتجسّد شخصيات الستات من سنين. ومع ذلك في عدد محدود جداً من الأفلام اللي بتتمتع بتمثيل إيجابي للستات، لكن التيار الرئيسي هو إظهار عيوبنا وضعفنا بشكل كبير”. من وجهة نظرها.
إنجي مش بس ممثلة موهوبة، هي كمان أم جميلة لطفلين. إنجي بتقول “أنا بربي إبني على مبادئ منها إنه مفيش فرق بين الولد والبنت؛ كلنا بشر”.
كونها فيمينست بشكل كبير، إنجي بتربي بنتها علشان لما تكبر تكون مستقلة بذاتها، معتمدة على نفسها، وواثقة في قدراتها. وبتحكيلنا موقف عن شخصية بنتها بتقول”أنا فاكرة مرة بنتي جات قالتلي ليه كل أميرات ديزني مملين كدة، ليه لازم يستنوا لحد ما الأمير يجي ينقذهم. وسألتني “ليه مابينقذوش نفسهم؟””
دور إنجي أسر قلوبنا كلنا في مسلسل “ليالي أوجيني” اللي اتعرض في رمضان السنة دي، وحقق نجاح باهر. إنجي بذلت مجهود كبير في الدور ده؛ أخدت حصص إيطالي علشان تجسّد الشخصية بكل تفاصيلها. وعن الدور إنجي بتقول “شخصية مختلفة تماماً عن كل الشخصيات اللي لعبتها قبل كدة. وكنت متفائلة إن المشاهدين هايتفاجئوا وهاينبسطوا”.
اوصفي نفسِك في ثلاث كلمات:
طموحة، فيمنيست، وروحانية
إيه هو فيلمك المفضل؟
Vicky Cristina Barcelona و Love Actually
إيه أكتر ماركة محلية بتحبيها؟
أنا بقالي فترة مهووسة بالماركات المحلية دلوقتي. ومنبهرة جداً بالماركات الفظيعة دي وبمصممينها؛ لإنهم موهوبين فعلاً. صعب فعلاً أختار اسم ماركة واحدة، بس بحب منهم طبعاً شروال، Soriel، وعزة فهمي.
إيه أكتر دور حبتيه في الأدوار اللي مثلتيها؟
حبيت ديجا جداً، في حكايات بنات.
لو هاتختاري تمثلي شخصية ست من الستات المؤثرين في العالم، تختاري مين؟
شجرة الدر، ست مثيرة للإهتمام، وقوية جداً
إيه البلد اللي نفسِك تسافريها؟
بالي، لإنها روحانية جداً.
تفتكري الستات عايزين إيه؟
السؤال ده بمليون دولار. أظن الستات عايزين كل حاجة. أنا بشوف إن الست هي الحياة بكل تناقضتها. إحنا عايزين الحُب، الشغف، الحرية، السعادة، الحنية، والأمان.