طول عمرها نور إمام كانت عايزة تبقى دولا او قابلة، ولما لقت نفسها بتعاني من اكتئاب ما بعد الولادة، قررت انها تجري ورا حلمها ده عشان تساعد أكبر عدد من الستات، اتدربت مع بيبو ميا اللي مقرهم في كندا، وكمان اخدت تدريب اونلاين على التعامل مع اكتئاب ما بعد الولادة من خلال جامعة اكسيتر، وأسست ماذر بيينج عشان توفر خدمات الرعاية بالأم، ومن ساعتها وهي بتساعد الستات من خلالها، نور بتشتغل كقابلة للولادة وكمان للخصوبة والحمل وما بعد الولادة.
احنا قعدنا مع نور عشان نعرف اكتر عن ماذر بيينج وازاي بتخدم الستات.
ايه تعريفك ل Maternal Support Practitioner او ممارس دعم الأمومة للناس اللي مايعرفوش ايه ده؟
ال Maternal Support Practitioner او الدولا او القابلة، بتكون شخص متدرب بشكل مهني على توفير المعلومات والنصيحة والدعم العاطفي والجسدي للستات والأسر قبل وخلال وبعد الولادة.
هل أسستي ماذر بيينج بعد ما خلصتي تدريب على طول؟ لو ده اللي حصل هل ده كان صعب مع وجود بنتك؟
انا بدأت أخطط لماذر بيينج وانا لسة بتدرب وكنت بشتغل على الموقع الالكتروني والخدمات خلال التدريب، الموضوع كان صعب جداً، بنتي كان لسة عندها تسع شهور وماكانتش بتنام كويس، كنت لسة مكتئبة وقلقانة بس كان عندي حاجة اتطلع لها.
قولي لنا على الخدمات اللي بتوفريها من خلال ماذر بيينج.
انا حالياً بقدم خدمات للعملاء اللي يا اما عايزين يخلفوا وعايزين يعرفوا ازاي يزودوا فرصهم بطرق طبيعية، او بيستخدموا حاجات زي التلقيح الصناعي او حصل لهم اجهاض او ولادة جنين ميت ومحتاجين دعم، كمان بساعد الأسر خلال الحمل وببقى معاهم وقت الولادة، وبقدم دعم ما بعد الولادة للأمهات الجدد، وبوفر برنامج لدعم الستات المصابة باكتئاب ما بعد الولادة، بس ده مش علاج نفسي هو خطوة قبل العلاج النفسي، وكمان بقدم دروس لنشر التوعية عن الدورة الشهرية مقدمة لكل الستات في سنين الخصوبة.
جسم الست في مصر دايما حواليه وصمة، هل بتلاقيه صعب انك تقنعي الستات يستكشفوا اجسامهم؟
الوقت اتغير دلوقتي والستات مبتديين يحسوا ان ليهم الحق انهم يتعلموا عن اجسامهم، بيكون صعب لما ببقى بشتغل مع عملاء او حتى بدي درس الدورة الشهرية وبحاول اقنعهم ان مافيش مشكلة انهم يستخدموا مراية ويبصوا على الفالفا عندهم مثلاً.
هل بيشارك الرجالة في الدروس؟ بييجوا مع مراتاتهم عشان يقابلوكي؟
الرجالة بييجوا مع مراتاتهم في مقابلات الحمل والولادة واوقات كمان بيبقوا موجودين في الزيارات المنزلية بعد الولادة.
انتي بتقدمي درس عن الدورة الشهرية للستات اللي عمرهم ما وصل لهم المعلومات دي. ايه اللي بتقترحيه عشان ننشر المعلومات دي اكتر؟ تفتكري لازم نبتدي من المدارس؟
انا هدفي اني اعمل برنامج ممكن يتقدم للمدارس الخاصة والحكومة لتعليم التلاميذ عن الحاجات دي، انا كمان نفسي اني اعمل درس مخصوص للاهالي اللي عندهم اطفال قربوا من سن البلوغ عشان يتعلموا يتكلموا عن المواضيع دي مع اطفالهم.
في رأيك ايه اللي محتاج يتغير عشان حقوق الستات الانجابية تتقدم؟
افتكر الستات محتاجين يعرفوا ان السيطرة في ايدهم هم، انا مؤمنة ان اول لما الستات يدركوا انهم ليهم الاختيار انهم يقولوا لا للتدخلات الطبية وانهم يطلبوا اختيارات واسباب بدل ما ياخدوا اوامر الدكتور كأنها امر واقع، هيضطروا الدكاترة اللي رافضين التقدم انهم يغيروا طريقتهم.
انتي شايفة ان ماذر بيينج ممكن تساهم في تقدم حقوق الستات الانجابية؟
انا عايزة ماذر بيينج تفضل دايما مساحة آمنة للستات، دايما بكون مبسوطة اني اوصل الفولوورز بدكاترة وممارسين معروفين بطريقتهم الحديثة وقادرين على دعم الستات دول بالطريقة اللي هما عايزين يتدعموا بيها.
الجمهور المصري استقبل ماذر بيينج ازاي؟
بطريقة ايجابية جداً، بيجيلي دايما رسايل من ستات بس عايزين يشكروني اني موجودة وعملت المنصة دي.
ايه نصيحتك للستات عشان يقدروا يتعاملوا مع الحمل والولادة وفترة ما بعد الحمل؟
هاتي دولا! لو مش عايزة دولا ممكن تاخدي درس تجهيزي للولادة مع جوزك وده هيساعده انه يشاركك ويتعلم ازاي يدعمك، و دوري على دكتور شاطر جداً – وانا دايماً مستعدة ارشح دكاترة ليكي، اشتغلي كويس على خطة لبعد الولادة واعملي لنفسك منظومة دعم.
ايه اكتر خدمة بتحبي تقدميها وايه اصعب واحدة؟
بحب ادي درس الدورة الشهرية عشان انا صممته بطريقة مسلية ومنفتحة، اصعب حاجة هي دعم العملاء اللي بيعانوا مع الخصوبة وفقدان الحمل، وكمان صعب اوي دعم العملاء اللي حصل لهم اجهاض او ولادة جنين ميت، لان ده نوع تاني من الحزن.
ايه خططك المستقبلية لماذر بيينج؟
احب انها تبقى مكان بيدرب او بيدعم الناس اللي عايزين يتدربوا على انهم يبقوا دولا مادياً، واني اعمل فريق من القابلات والدولا يشتغلوا معايا، واحب اننا نبتدي نعمل اعمال خيرية.