اتعلمنا من مدربة اليوجا ديانا فابرج عن روتينها وعاداتها في رمضان، وإزاي بتقدر تحقق لايف ستايل صحي وتفضل محافظة عليه خلال شهر رمضان، كل ده وهي بتدلع نفسها كل فترة.
إيه أنسب وقت للتمرين في رمضان؟
بالنسبالي أنسب وقت هو قبل الفطار، الموضوع بيبقى صعب في أول كام يوم، بس أول ما تتعود عليه، هاتلاقي إن طاقتك بتزيد ومعدل جسمك في الحرق بيبقى أعلى في الصيام، وكمان بتستغل الوقت الفاضي قبل الفطار. في ناس بتشوف صعوبة كبيرة في التمرين في الصيام، فلازم دائما تسمع جسمك وتعمل اللي يناسبه.
في ناس مابيبقاش عندها وقت تتمرن، إيه أحسن تمارين تنصحي بيها ممكن تتعمل في البيت؟
بنصح بتمارين رفع الأوزان، وأكيد اليوجا!
إيه البدائل المفضلة عندك لأكلات رمضان الغير صحية؟
أنا نفسي بتروح جداً لحلويات رمضان، البديل اللي بحبه هو عصير التمر والأفوكادو، ثلاث تمرات، نص ثمرة أفوكادو، كوباية لبن (لبن بقري أو جوز هند) وعسل علشان يحليه.
إيه أحسن تمرين لرمضان؟
ده بيعتمد على الهدف اللي عايز توصله، بالنسبالي أنا بحب اليوجا جداً، وبتمرن يوجا كتير في رمضان، لإنها مريحة جداً للأعصاب وبتظبط الجسم، وده المطلوب.
إزاي بتحافظي على نظام الأكل الصحي في رمضان، مع كل إغراءات الأكل الموجودة؟
اسمع جسمك، في مرات كتير كوباية مياه بتقفل شهيتي عن الحاجات الغير صحية. شرب مياه كتير بيخليك دائماً شبعان. ودائماً خلي في متناولك وجبات خفيفة صحية علشان ماتكسلش وتأكل أكل مش صحي.
إيه نصائحك علشان الجسم يفضل محتفظ بالمياه في رمضان؟
دائماً بخلي معايا إزازة مياه باخدها معايا في كل حتة، لإننا بننسى أصلاً نشرب مياه. وبحب الكركديه كمان لما بزهق من المياه بشربه كبديل.
إيه روتينك في الأكل في رمضان؟
بأكل اللي نفسي فيه في أول يومين، علشان ماحرمش نفسي من حاجة، وبعدين ببدأ آكل أكل صحي تاني بالتدريج. ببدأ فطاري بكوبايتين مياه، بعدين طبق سلطة، ببعد تماماً عن الأكل المقلي والحلويات التقيلة، ببدلهم بخضار وفاكهة.