البخيل في فلوسه بخيل في مشاعره، دي جملة كلنا كستات متفقين عليها تقريباً؛ أصعب راجل ممكن تتعاملي معاه هو الراجل البخيل اللي بنسباله الفلوس جزء مهم جداً في حياته وصعب يصرفها على أي حد غير نفسه. مش لإنه فقير والمسألة مش مسألة فلوس، الموضوع كله في إنه معاه فلوس بس بيستخسر. الراجل البخيل هايخليكي تشيلي هم الفلوس لا إرادياً، في معظم الخروجات هاتبقي مش مرتاحة، وماتتوقعيش منه يجيبلك أي هدايا ولا حتى ورد، ولو فكرتي تتجوزيه ماتحطيش أمل إنه ممكن يتغير وابدأي اقنعي نفسك بمبدأ الكماليات والضروريات اللي هايبقى هو ماشي عليه.
العلامة الأولى: العشا عليكي المرة دي يا حبيبتي.
بيخليكي تدفعي الحساب، أو بيقوم يدخل الحمام لما الشيك يجي، أو بيتوتر جداً ووشه بيتغير وموده بيقلب قدام الشيك، وبيطلع محفظته ببطئ وبتوتر ومابيطلعش فلوس غير لما تبدأي إنتي تاخدي بالك وتطلعي محفظتك. الراجل من الطبيعي إنه هو اللي يدفع لحبيبته أو اللي محتمل تبقى حبيبته مهما اختلفنا في النقطة دي بتفضل دي صفة للراجل الجنتل الكريم، اللي بيبقى عايز يعمل أي حاجة علشان يعلى في نظرك ويثبتلك إنه بيحبك فمهما كانت طلباتك مكلفة هايحققهالك لإنك تستحقي.
العلامة الثانية: بيلبس نفس الطقم
اتقابلتوا أكتر من 7 مرات وجالك بنفس الطقم، نفس الجزمة، نفس الشراب؛ مش لازم يكون بيلبس من أغلى أماكن لكن مهم إنه يكون عنده لبس أنيق يغير فيه ويلبسه ولو على الأقل في بداية العلاقة وبعد كدة اللبس ممكن يتكرر بس أكيد مش كل يوم.
العلامة الثالثة: متلازمة ال ATM
بيستلف منك في كل مرة تخرجوا فيها مع بعض، وكل مرة بحجة إنه نسي ياخد فلوس وماعهوش غير 30 جنيه بس في محفظته. وكل مرة يقولك “أنا بس لازم أعدي على ال ATM اسحب فلوس” وهو من جواه نفسه تقولي لأ خلاص أنا معايا هادفع أنا المرة دي.”
العلامة الرابعة: كفاية عليكي أنا في عيد ميلادك
المناسبات أفضل فرصة لأي حد إنه يعبر عن حبه ليكي، وخصوصاً في عيد ميلادك لازم يعملك حاجة مختلفة تحسسك قد إيه إنتي مهمة وإنه فعلاً بيحبك وعايز يبسطك ويجيبلك كل حاجة نفسك فيها؛ لكن لو لقيتيه جايبلك تي شيرت قديم بتاعه، أو قالك “كفاية يا حبيبتي إن إحنا سوا” أو جابلك دبدوب؛ أو حتى وداكي مكان حلو تتعشوا فيه. لازم تعرفي إنه مش مهتم يستثمر في علاقتكوا أو يبذل فيها أي مجهود.
العلامة الخامسة: “ماتتوقعيش مني أكتر من كدة”
هايفتح معاكي موضوع الفلوس، بإنه يقولك قد إيه كل حاجة بقت غالية دلوقتي، وإنه مابيحبش الحاجات أو الأماكن الغالية وعمره ما هايتهور ويروحها أو يدفع فيها فلوس؛ أو هايقولك إنه لسة مسلف واحد صاحبه وده هايخليه يضطر يوفّر شوية في الفلوس الفترة دي. لو بقالكوا فترة مع بعض، وكان كريم جداً معاكي لكن جه عليه وقت بدأ يتغير فده عادي، كلنا بيجي علينا أوقات صعبة مادياً.
لو في كل الصفات دي عمره ما هايتغير، ولو بتفكري إن بخله مش هايعملك مشاكل وهاتعرفي تتعاملي فكري تاني، لإن البخل ممكن يحوّل حياتك لجحيم ويحرمك من حاجات كتير إنتي تستحقيها.
ترجمة: تسنيم عبدالله