ورد أيه.. طلّع كيس الزبالة يا بيه! 

احتاروا معانا الرجالة.. وجابولنا ورد مع أن لو كانوا خدوا رآيّنا، والله هنطلب نص كيلو كباب أبرك.

قالولنا خسيتي علشان عرفوا فرحتنا بالكلمة دي كبيرة ازاي،بس عيطنا برضه لأننا تخنانين يبقى هو فعلاً مش مهتم ومش مركز معانا.

حقيقي كلنا بنحب الرومانسية وبنحب الكلام الحلو.
إحنا أصلاً بنبص لناس ما يتبصلهاش بالعين المجردة، علشان بس بيعرفوا يقولوا كلام حلو، بيخلينا نغض البصر عن عيوب فادحة.

بس للأسف مرمطة الدنيا النهاردة خلتنا خلاص ما تنفعش معانا حنية الوز، اللي ما بتآكلش عيش دي.

واحدة صاحبتي كانت قاعدة بتحكيلي أنها  دايماً بتطلب من جوزها الطلبات الروتينية الرجالية؛ يعني طلع كيس الزبالة علشان أنا لابسة قميص النوم، غيّر اللمبة، افتحلي القفل اللي معلّق ده،
حاجات بسيطة اللي بتثبت قوامته وفحولته وغضنفريته.

هو حبيبي ذوق ومتربي وحنين حنية “الوز”، ودايماً يرد عليها بحاضر يا روح قلبي، حالاً يا عمري؛ وطبعاً كل هذه الميني طلبات لا ترى النور بتاتاً.

وجه الزبال ومشي، والطفل استحمى في الضلمة الصبح علشان مكنش فيه وقت هي تغير اللمبة، والباب أبو قفل معلق فضل معلق وهي بتفضل تخبط فيه علشان تطلع حسرتها وإحباطها والهم اللي هي فيه.

ليه ما يقولهاش أنا مش قادر النهاردة أغير لمبة.. استني الصبح.. فهي ما تصحاش الصبح محبطة تاني من حاجة جديدة صغيرة، ساهمت في انفجار الوحش؟

أنا أكاد أجزم إني مرة حسيت بعواطف جياشة من ناحية واحد صاحبي كلمني مرة وأنا عربيتي عطلانة وكنت محتاسة، وقال لي خليكي عندك هابعتلك سواق يروحّك وميكانيكي ياخد العربية، أنا السترونج إندبندت زفت على دماغي عمري ما حد عملي حاجة، قلتله بجد؟!
ربع ساعة وكل اللي قاله حصل!! سواق جه وميكانيكي جه، راجل وعدني يحل مشكلة وحلها بسرعة. أنا بحبك يا أحمد من يوميها، استنى أنا بجد بحبك!

المشكلة يا رجالة أن أنتم مخدتوش بالكم، أن أحنا مركزين في مسئولياتنا بس علشان بنحب.
بنحبكم وبنحب ولادنا وبنحب بيتنا.

وأقولكم بنحب أيه أوي؟ بنحب الدلع.. أوي. بنحب اللي يقولنا عنك إنتي، إنتي تعبتي النهاردة يا حبيبتي،
هأمشي أنا الكلب في الحر ده أو في المطر ده؛ مش اللي يقولي أنا قلت مليش دعوة بالكلب من أول يوم، عيالك اللي عايزينه مش أنا.

بنحب اللي فكرة إني أفتح الباب للمكوجي وهو موجود؛ فكرة منعدمة عنده، بنحب اللي يقوم مرة من عشر مرات أبننا قام فيها قلقان يهديه وينيمه.

العلاقات شراكة طويلة المدى، وإيقاع حياتنا النهاردة خلى الست شايلة جزء كبير أوي.شيل من عليها، علشان تبقى الراجل الضهر، الراجل السند.

أحنا كنّا متدلعين في بيوت أهالينا، وشيلنا أشغال شاقة مؤبدة بكل حب في بيوتكم والله، بس من حين للتاني، شيل من عليها.  وقولها عنك أنتي، وفعلاً أوفي بوعدك.

لا تكن دكر وز.. فنحن لا نقدر حنيته.