“إلى كل روح تعشق الحياة .. إلى هؤلاء الذين فقدوا شغفهم فمضوا ببريق خافت .. ينتظر من يشعل فتيله…إليك أنت.” ده كان إهداء هبة السواح لقرائها في كتابها الأول اللي كان أكتر مبيعاً “سندريلا سيكريت” اللي اتنشر في 2017.
هبة السواح باحثة ومدربة متخصصة (life coach) في مجال العلاقات الزوجية والاسرية وتنمية الذات. اتشهرت بالتدريبات اللي بتقدمها اللي منها كورس Living On Purpose وورشة Soulmates وأكتر! بعد ما درست إدارة الأعمال في الجامعة الأمريكية والأكاديمية البحرية دخلت عالم التدريب وأخدت شهادة معتمدة من دكتور ريتشارد بولستاد، جون جراي، جون جوتمان، وجين نيسلون، من الولايات المتحدة الأمريكية وكندا. في يناير 2020 هبة السواح نشرت كتابها التاني شهرزاد اون فاير اللي حالياً في الطبعة العاشرة! اتكلمنا معاها عشان نعرف اكتر عنها وعن كتابتها.
احكيلنا عن الكورسات اللي بتقدميها
انا بدي كورسات اونلاين و بعمل جلسات life coaching للأفراد.
عندي كورس اسمه Living On Purpose وده فيه منه مرحلتين 1 و 2. كل واحد 3 شهور بنعمل فيهم نقلة نوعية في علاقتك بنفسك ووعيك بقيمتك ومشاعرك واهتماماتك وقدراتك والناس اللي حواليكي.
وكورس اسمه Soulmates بيحضره ستات ورجالة في مراحل مختلفة في علاقتهم سواء لسه سينجلز وعايزين يتعلموا صح، او في اول العلاقة او بينهم مشاكل او علاقتهم كويسة بس عايزين يحسنوها او اتطلقوا وعايزين يفهموا ممكن يتفادوا اخطائهم ازاي.
وفيه كورس Intimacy مدته تقريباً ٣ شهور للستات بس عن العلاقة الحميمية وبيتكلم عن وعينا بنفسنا وجسمنا والثقافة والتربية والمفاهيم حوالين الموضوع ده لأنه طبعا تابوو وإيه اللي بيبسط الست والراجل وازاي نجدد في العلاقة نفسها.
وكورس اسمه Glow عن تقدير الذات ونظرة البني آدم لنفسه وشعوره بقيمته لأن دي اهم حاجة نبدأ بيها اي اصلاح في حياتنا.
مين اللي بيقدم على الكورسات؟ وايه التحديات اللي بتواجههم؟
الستات في الأساس واكتر ناس بتحضر لي من نص العشرينات لنص الاربعينات بس طبعا في اعمار اكتر واقل.
اكبر تحدي هو التوهان، علاقتهم مع نفسهم. انا مين وعايزة اعمل ايه في حياتي؟ وازاي علاقتي بنفسي دي بتأثر على علاقتي باللي حواليا.
إزاي رحلتك مع الكتابة بدأت؟
انا بحب الكتابة من وانا طفلة بس عمري ما فكرت اكتب كتاب. كان اخري ممكن اكتب مقال في مجلة او بوست على فيسبوك.
في 2014 لما بدأت أدي كورس living on purpose و شفت اد ايه فرق في حياة ناس كتير فكرت ازاي ممكن اعمم النفع ده لناس مش بتقدر تحضر كورسات لأسباب مادية او غيرها. فكانت الكتابة هي أفضل طريقة خاصةً اني عمري ما كنت بعرف ارشح لحد بثقة كتاب لتنمية الذات بالعربي لشعوري اننا عندنا نقص في الجانب ده في الكتابة.
فكرت ازاي ممكن اكتب في تنمية الذات بس يكون كتاب سهل وخفيف وعملي و يوصل للناس اللي بتحب القراية و اللي مش بتحبها.
ليه قررتي تكتبي شهرزاد أون فاير بعد سندريلا سيكريت؟ وإيه الفرق بين الاتنين؟
شهرزاد اون فاير اعمق بكتير وبينقاش جوانب مختلفة في تنمية الذات عن سيندريلا سيكريت. بعد سندريلا سيكريت عملت survey (دراسة استقصائية / إستبيان) عشان اسأل الناس محتاجة مساعدة فإيه؟ ايه المواضيع اللي لسه مانقشنهاش؟ ايه الأسئلة اللي عندهم ومن اجوبتهم قررت مواضيع الكتاب الجديد.
الكتابين بيناقشوا مواضيع من مجالات مختلفة. هل بتعملي دراسة قبل الكتابة؟
دراسة عميقة جدا جدا وعملية جدا جدا. عشان كده ماقدرش انزل كتاب كل سنة لأن الدراسة دي بتاخد وقت! بختار المواضيع واقعد اقرا عنها كتير واحضر محتوى واديه في دورة تدريبية عشان اكون جربته عملياً على ناس وبعدين اعدّل فيه بناءا على اقتراحاتهم واديه لمجموعة تانية وبعد ما اتطمن ان المحتوى ده فعلا عملي وبيساعد الناس وبيفرق معاهم بشوف ابسطه ازاي في كتاب يوصل للناس كلها
في الكتابين إنتي بتتكلمي مع القارئ و بتديله فرصة يضيف له. ليه كان مهم بالنسبالك إن الكتاب يكون فيه تفاعل كده؟
عشان انا شخصية عملية جدا واي كلام تنظيري بيضايقني. لو المعلومة اللي هتقولهالي انا مش هعرف اطبقها عمليا، يبقى انا استفدت ايه؟
كان مهم جدا بالنسبة لي الكتاب ده مايكونش مجرد كلام نظري او روشتة فيها نصايح عامة لأننا مختلفين عن بعض!
وكان يهمني ان الكتاب يساعدك انت تدور جواك وتحط الخطة بتاعتك المناسبة لك انت.
الرسومات اللي في الكتب مدياهم بعد تاني. مين اللي رسمهم؟
محمد سامي صاحب سامي ستوديو. الرسومات كانت عشان الناس البصرية وعشان تضيف بعد فكاهي وتخفف من تقل الكلام شوية
لغة الكتب سهلة وبسيطة. مين الجمهور الي بتستهدفيه؟
الولاد والبنات اللي بدأوا يشيلوا مسئولية حياتهم ومش عايزين يبقو مجرد نُسخ من الناس اللي حواليهم.
والرجالة والستات اللي تاهوا في قوالب المجتمع ونفسهم يوصلوا لنفسهم ويحسوا بوضوح وسكينة وسعادة في حياتهم
الكتب حققت نجاح كبير في وقت قليل. إيه شعورك بالنجاح ده وإيه اللي نفسك أعمالك تحققه؟
مبسوطة جداً طبعا! نفسي كتبي تساعد كل شخص يقراها انه يعرف قيمته ويدوّر على نفسه فعلا ويحقق مراد ربنا منه.
نفسي كل حد بعد مايخلص الكتاب يبقى فهم هو مين وعايز يعمل ايه. يبقى فهم يتعامل ازاي مع مشاعره ومع نفسه ومع الناس اللي حواليه.
يبقى فهم اهمية دوره في الدنيا وعرف نقاط القوة والضعف اللي عنده وفهم الحياة اكتر. ونفسي ان الشخص بكل الوعي ده يقدر يساعد غيره ويربي ولاده بطريقة مختلفة.
هل فيه خطط لكتاب تالت؟
ان شاء الله!
دوسوا هنا عشان تعرفوا اكتر عن الخدمات اللي بتقدمها هبة السواح وهنا عشان تعرفوا اكتر عن كتبها.