سواء كنتي أم قاعدة في البيت، أو على مكتب في الشغل لمدة ثمان ساعات في اليوم، أو دايماً واقفة على رجلك، كلنا في آخر اليوم بنعاني من آلام مختلفة في الضهر. اليوجا من الأساليب اللي بتعالج آلام الضهر بقالها عقود ودايماً من الحاجات اللي الأطباء بتنصح بيها. بس إحنا مش دايماً عندنا الوقت والطاقة إننا نحضر حصة يوجا، علشان كدة كتبتلك بعض وضعيات اليوجا اللي تقدري تعمليها قبل ما تدخلي تنامي بعد يوم طويل. كل وضعية فيهم بتتعمل لمدة خمسة لعشرة مرات أنفاس (شهيق وزفير)
مواجهة الكلب السفلي أو Downward Facing Dog
الوضعية دي من أكتر الوضعيات المعروفة في اليوجا، وده لإن ليها فوايد كتير؛ منها تساعد على تقوية الكتفين والذراعين والساقين، و بتمدد العمود الفقري وتساعد على تخفيف الألم في الجزء العلوي والمتوسط والسفلي من الظهر، ومن جهة ثانية فهي بتعكس تدفق الدم في الجسم، وده بيفيد نظام الدورة الدموية والنظام اللمفاوي ويكافح تأثير الجاذبية على الجسم. وفي الوضعية دي لازم تخلي رقبتك مسترخية في الوضعية دي، وترفعي أوراكك لفوق، لحد ما تحسي بكتفك وضهرك إنهم بيتفردوا وبيتمددوا.
وضعية القطة – البقرة
الوضعيتين دول تقريباً هما السر للشفاء من كل أنواع آلام الظهر. هاتدّي عمودك الفقري فرصة لطيفة إنه يسترخي من خلال تحريك وتقويس الظهر. كل ما تعملي الوضعية أكتر كل ما هاتحسي إنك أحسن.
وضعية الجرادة
الوضعية مش بس بتساعدك على الإسترخاء والتمدد، لكن كمان بتقوّي الظهر. وضعية تني الضهر دي مفيدة جداً خصوصاً لآلام أسفل الظهر.
وضعية الجسر
الوضعية دي بتريّح آلام الظهر في ساعتها، حتى الصداع. ارفعي أوراكك لفوق علشان تحسي باسترخاء وتمدد أكتر. لما تخلصي الوضعية دي نامي على الأرض، واحضني ركبتك واتحركي بالراحة من جنب للتاني.
وضعية الجلوس وتدوير الظهر
تعتبر الوضعية دي طريقة ممتازة لتجديد شباب جسمك وإعادة عامودك الفقري لوضعه الطبيعي، وخصوصاً لو كنتي من اللي بيقعدوا قدّام الكمبيوتر طول اليوم، من خلال حركة تدوير الظهر في وضعية الجلوس، بيكون الورك ثابت، بحيث يكون هناك فرصة أقل لدوران الوركين، مما يترك الدوران منحصراً في الفقرات الصدرية وأعلاها. هاتحسّي إن ضهرك مسترخي ومرتاح بعد يوم طويل في الشغل.
وضعية الطفل
الوضعية دي هي أحسن طريقة تنهي بيها تمرينات اليوجا بتاعتك، لإنها أكتر وضعية فيها إسترخاء. أنا شخصياً بحب الوضعية دي جداً لإني بقدر أحس إن جسمي كله مرتاح وهادي ومسترخي.
