حوار : ريم جميل
كريم فهمي يا بيمكن الست بطريقة ذكية وظريفة في فيلم “هاتولى راجل” يا بيتريق علي بعض النماذج النسويه في فيلم “على بابا” أو عامل “قعدة رجالة” فى التليفزيون، بس طول الوقت هو أب هايل لبنتين، وعشان كده قررنا نقعد مع كريم ونفهم بالظبط هو عايز يقول إيه للستات ورأيه في قضايا مختلفة.
مش شايف إن فى إختلاف فى نظرتك للمرأة مابين “هاتولى راجل” وما بين “على بابا”؟
“على بابا” مكنش فيه تعارض مع حقوق المرأة، دى كانت لعبة من ضمن المشهد الهدف منها إنهم يتعرفوا على واحده، أنا لما باجى أعمل أفلام بيبقى همى الوحيد إنى أسلى الناس، بس أكيد بيبقى فى وجهة نظر، وأكيد وجهة النظر مبتبقاش مختلفة عن الفيلم. بس إنتوا بقى ليكوا أكتر من المُطالب بيه، بقى الراجل هو اللى المفروض يعمل حقوق الرجل (يضحك).
السوشيال ميديا ايه مميزاتها وعيوبها بالنسبة للممثل ؟
العيوب انك متواجد طول الوقت وده مش المفروض يحصل، والعيب والميزه انك تقدر تعرف رأى الناس بشكل مباشر من ناس متعرفهاش، لكن فى نفس الوقت ناس تانية ممكن تغلط عشان إنت مش قدامهم فيستغلوا فرصة انك مش هتعرف ترد، وده ساعد ناس إنها تقدر تتطاول فى أى وقت .
إيه معنى الرجولة من وجهة نظرك؟
الرجولة حياة، إنك تحافظ على بيتك واهلك وتصونهم رجولة، الإنسانيات والجدعنة مع صحابك رجولة، كلمتك رجولة، وكمان إلتزامك بكلمتك فى شغلك رجولة.
هتقول لبنتك تختار إيه فى الراجل ؟
أهم حاجة عندى يبقى بيحبها وبيصونها ويخاف عليها وأنا أشوف ده فى شخصيته.
بتحضر لإيه خلال الفترة اللى جاية ؟
دلوقتى مركز فى السينما وشغال على فيلمين منهم واحد أكشن رومانسى، والأتنين هيكونوا من إنتاح أحمد السبكى.
إنت واخد استراحه من الطب ولا سيبته؟
واخد بريك بس معرفش لحد امتى.
إيه النصيحة اللى تنصحها للستات ؟
الستات لازم تعرف إن قوتها فى أنوثتها، مش فى إنها تحط نفسها فى مقارنة مع الراجل، لأنها ممكن تبقى أجمد منه بكتير لو فكرت فى التراك بتاعها.
فى أى ست أثرت فى حياتك ؟
أمى، علمتنى الإلتزام بالمذاكرة والقرايه ودى حاجة فادتنى إنى ادخل كلية كويسه واكتب، ومراتى لأنها وقفت جنبى وعملتلى دعم من وانا لسه محدش يعرفنى، ده غير إنها علطول فى ظهرى ومشجعانى، وهي اللى مخليانى اقوى.
الستات عايزين إيه ؟
الستات عايزين إيه عموما، صعب أجاوب على السؤال ده ، لكن الستات عايزين من الراجل الآمان وإنه يحبهم ويحافظ عليهم.