في أوقات بيبقى لازم تبعدي فيها عن كل حاجة وكل الناس، تاخدي فيها جنب وتقعدي لوحدك ترتبي كل الكركبة اللي حصلت في حياتك، وخصوصاً بعد ما تطلعي من علاقة عاطفية. لسة جروحك مفتوحة، وكل مكان بيفكرك بذكرى عشتيها، وصحابك وأهلك مش عارفين يتعاملوا مع زعلك وحالتك النفسية. فلو عايزة تتجاوزي وتخفي وتبقي أحسن لازم تفصلي، وتبني اللي إتكسر جواكي.
سيبي الشوكلاتة اللي في إيدك، وبطلي تطلعي همّك في الأكل، إقفلي كل الأفلام الرومانسية، وإرمي المناديل اللي مسحتي بيها دموعك في الزبالة، وقومي من الكنبة دي، وجهزي شنطة سفرك، وإستعدي لأجمل تجربة هاتعيشيها في حياتك.
آخر بلد ممكن تفكري تروحيها هي البلاد المعروف إنها بتتراح في شهر العسل، ولا الأماكن اللي بيروح فيها اتنين مع بعض، ولا النشاطات اللي لازم حد يعملها معاكي. اختاري مكان فيه مغامرة، مكان تعملي فيه حاجات عمرك ما عملتيها قبل كدة، اطلعي جبل، نقطي في المياه من فوق مكان عالي، جازفي واتعلمي مهارة جديدة.
سافري للتأمل، روحي الأماكن اللي معروفة بالروحانيات زي المعابد الموجوة في الهند ونيبال، هناك هاتصفي ذهنك وتكتشفي روحك وتعرفي تتصالحي مع كل اللي حصلك.
أرقصي، الرقص معروف إنه بيعالج الحُزن وبيظبط المود وأحسن بلد تتعلمي فيها الرقص الشرقي هو تركيا، ده إلى جانب الحمام التركي اللي هايخليكي تسترخي وتنسي كل همومك.
بلاش تتعاملي مع بني آدمين، وجرّبي تتعاملي مع الحيوانات سافري مكان تتواصلي فيه مع الحيوانات أكتر زي رحلة مع الغوريلات في رواندا أو أوغاندا، التجربة دي هاتخليكي أشجع وساعتها هاتقدري تتعاملي مع الناس من غير خوف وبقوة.
دايماً بيقولوا علشان تتغلبي على حُزنك إشغلي نفسك، فأيه أحسن من إنك تسافري وتشتغلي في حاجة حلوة في نفس الوقت؟ السفر للعمل التطوعي زي إنك تبني أسقف وبيوت لناس محتاجة، أو تعلمي أطفال في القرى، أو تقعدي مع أيتام في ملجأ وتونسيهم؛ كل الحاجات دي هاتغير جواكي حاجة وهاتخليكي تحسي إن مفيش حاجة مستاهلة تزعلي علشانها، وهاتحسي بقيمة نفسك وأهميتك.
الأكل، لو سافرتي إيطاليا ممكن تتخني 10 كيلو بس هاتنبسطي أضعاف اللي تخنتيه وهاتقعي في حُب الأكل ومش هاتفكري تحبي بعده حد تاني، بالذات لو روحتي عاصمة الايس كريم “بولونجا” وهناك هاتعملي نكهة الأيس كريم بتاعتك.
الدنيا كبيرة وواسعة ومليانة تجارب هاتسحرك وتنسيكي كل حاجة وحشة عدت عليكي، بس لما تقومي من على الكنبة!