حوار : ريم جميل
كل واحد فى مهنته أدواتة بتختلف، ومن أدوات العظيمة سلوى محمد على ركوب الميكروباص وتأمل الناس اللى بتعتبر هوايتها الأولى والأهم، لإنها ببساطة مش مؤمنة ان العزلة عن اللى بتشوفه فى الشارع من خلال المواصلات العامة ممكن يخلق منها ممثلة متميزة، ده غير إنها فاجأتنا كمان برغبتها فى تمثيل الأدوار اللى بيتم تجاهل أصحابها زى دور الدوبلاج أو الكومبارس، لإنها مقتنعة بأهمية الأتنين بالرغم من انهم دايما مش واخدين حقهم، وعلشان سلوى عندها تفاصيل مختلفة عن ناس كتير الحوار معاها فعلا كان مختلف.
إيه المرحلة اللى فى حياتك اللى نفسك ترجعيلها تانى ؟
المراهقة علشان كنت عاملة فيها مثاليه وبدور أعمل إيه شبه المثاليات فكان دمى تقيل أوى، ده غير إنى قفلت على نفسى وصدقت كلام الكبار، زى إنى أضحك من غير ما ابين سنانى، وأنا سمعت الكلام ده، لكن بعد ما خلصت مراهقه الوضع اتغير تماما، وصلحت غلطتهم فى طريقة تربيتى لبناتى. إحنا كان غير مسموح نقول لحد كبير غير حضرتك، وممنوع نحط رجل على رجل، فى ناس شايفنها تربيه، بس انا بشوفها بداية قهر وإنها اول كلمة بتعلم الاطفال ان فى مسافه او ان فى حد اعلى كتير، وده كان ممنوع عندى ده غير حاجات تانية كتير.
شايفة إيه الفرق بين محتوى التليفزيون دلوقتى ومن ٢٠ سنة ؟
فى حاجات زمان كانت مليانة خطابة والتمثيل فيها مكنش عظيم ، اللى بيحصل النهاردة احسن كتير، روحنا مواضيع جديدة وبقى عندنا ممثلين اكتر احسن.
إزاى بتمكنى بناتك وتساعديهم يكون عندهم ثقة فى نفسهم ؟
أنا طول عمرى مش بعاملهم على إنهم أطفال، لكن بعاملهم على إنهم بنى آدمين، وده من وهما صغيرين، وحتى الأسئلة اللى الأمهات كانت بتخاف تجاوب عليها كنت أنا بجاوب عليها.
الدوبلاج ساعدك فى التمثيل؟
تقريبا علمنى تمثيل، أنا بشوف ان الوقت اللى ما بين الإنجاز والإنجاز هى دى الحياة وهى دى الخبرة، علشان كده انا بحاول استمتع فى الأماكن اللى بروحها، لان هى دى الحياة، وهو ده الفرق ما بين الجدية والتجهم، وانتى جد ممكن تستمتعى، لكن فى ناس بتربط الجدية بالتجهم.
الدوبلاج المصرى فى الكرتون أضاف إيه للاطفال المصريين وخصوصا إنهم بقوا بيتكلموا إنجليزى معظم الوقت ؟
الأغلبية بتعرف عربى لإنهم مدارس عربى، والكرتون بيتوجه للإتنين، إحنا عندنا ثروة فى اللهجة المصرية، وده واضح من شعر صلاح جاهين وفؤاد حداد وغيرهم، ولغتنا من اكتر اللغات اللى بيحصل فيها تطور ومن اكتر اللغات اللى بيدخل فيها كلمات جديدة معبرة عن لغة العصر، والبلاغة هى إنك تعرفى تلاقى كلمة تعبر عن جملة طويله، واالشعب المصرى من أذكى الشعوب اللى بتعرف تعمل ده.
لسه بتركبى ميكروباصات؟
أنا جيتلكوا النهارده بميكروباص، ومبسوطة جدا لإنى بكتشف من خلاله حاجات كتير زى أسامى المناطق اللى معرفهاش، ده غير لغة الجسد، إحنا لو اقتصاديا عايزين نعرف حال البلد لازم نركب الميكروباص، ده غير الموضوعات اللى الناس بتتكلم فيها، حاجة غنية جدا، بالإضافة انه منجز، وانا ادواتى هى نفسى والناس علشان كده مش عايزه انعزل.
ايه اللى يخلى الست عندها سلام داخلى ؟
الست معندهاش سلام داخلى، عندنا خريطة صعبة جدا، فلازم الرجالة تعرف ده.
إيه هواياتك الغير مُعلنة ؟
القراءة، إلى جانب تأمل الناس واللى تعتبر من أهم هواياتى، ومبسوطة لإنها فعلا حاجة جميلة، لدرجة إنى اكتشفت نوع تمثيل جديد من خلال نغمة صوت وحركة جسم لشحاته فى المترو.
بتحضرى لإيه خلال الفترة اللى جاية؟
فيلم لسه بيتكتب اسمه ” الأصدقاء” ، وهيكون معظمه ستات، وأنا مستنياه بفارغ الصبر لإنه رائع.
الستات عايزين إيه ؟
القليل من التقدير.