كل واحد فينا بيتعامل مع السوشيال ميديا بطريقة، ناس بتستخدمها عشان تتواصل مع الناس أكتر وناس بتتابع أخبار وناس بتنزل وتشوف صور. بس في ناس كان السوشيال ميديا ليه تأثير مختلف جدًا عليهم واستخدموه استخدام تاني عشان ينشروا مبدأ معين أو يبدأوا حاجة جديدة. دي مجموعة من الستات اللي خدوا السوشيال ميديا في اتجاه تاني لحياتهم.
ندى الأشموني
كان جوزها شايف إنها بطلة العالم في الشوبينج ودايمًا لما بيسافروا برة بتجيب حاجات كتير وتملا الباسكت على آخره فطلع عليها اسم Miss Basket. بعد فترة ندى عملت جروب Miss Basket من نفس الإسم عشان يبقى مكان تتجمع فيه كل الستات والبنات اللي بيحبوا الشوبينج زيها وياخدوا آراء بعض. الجروب النهاردة عليه 166 ألف ست وندى بقت متحدثة رسمية في ايفنتات كتير بعد ما أسست الجروب وبقت بتمثل براندات كتير منهم أديداس.
زينب العشري
بعد الجواز حست بخضة وصدمة ولقت إن في حاجات كتير في الجواز بتحصل ماحدش بيتكلم عنها. بالصدفة في مرة كانت قاعدة مع صاحباتها ولقت إن المشاكل دي عندهم كلهم بس ماحدش بيتكلم فيها مع حد، ومن هنا قررت إنها تأسس جروب Confessions of a Married Woman عشان تدي المساحة لكل الستات إنهم يتكلموا في المشاكل دي حتى لو بشكل مجهول ومن غير ما يبينوا هويتهم. الجروب كان بداية لمبادرات كتير زينب تاخدها للتوعية عن مشاكل الجواز وتربية الأطفال وغيره، وبدأ يبقى أكتر من مجرد جروب اعترافات.
دعاء جاويش
هي طول عمرها بتحب تهتم بشعرها وتجرب وصفات مختلفة عشان تحافظ عليه ولما لقت إن الناس بتتجمع على جروبات وتشارك اهتماماتها اللي زي بعض، قررت تعمل جروب للاهتمام بالشعر الكيرلي وبقى دلوقتي المحطة الأولى لأي بنت عايزة نصايح أو مقترحات لشعرها.
زينة عمرو
بنت عندها 19 سنة جالها الإلهام من أكاونت Catcalls of NYC اللي بينشر قصص تحرش في شوارع نيويورك وحست إن لازم يبقى في حاجة زي كدة في مصر عشان الناس تعرف إن دي حاجة منتشرة فعملت أكاونت @catcallsofcairo على انستجرام وبينشر قصص الناس مع التحرش والمعاكسات.