ترجمة: تسنيم عبدالله
الطلاق قرار هايغير حياتك كلها، فلما تكوني راسمة خطة واضحة لحياتك بعد الطلاق، وحاطة توقعات واحتمالات لحاجات كتير ممكن تحصل لما تاخدي القرار ده، لإن ده هايساعدك تقرري بحكمة وتقرري صح. وتكوني محضرّة نفسِك لإن الطلاق عملية بتاخد وقت فلازم تكوني صبورة، وهادية، ومتماسكة.
إيه بقى الحاجات اللي لازم تتوقعيها لما تقرري تُقدمي على الطلاق؟
هايكون فيه تهديدات
لما المشاعر تتجرح، لازم هايكون فيه تهديدات. زي: “هاتندمي على اللي إنتي بتعمليه ده.” و “عيالك دول مش هاخليكي تشوفيهم تاني.” وتهديدات تانية كلها نابعة من الغضب والكراهية.
لازم تكوني مُدركة إن كل دي تهديدات على الفاضي، علشان بس يخليكي تخافي وترجعي في كلامك، هايفضل يقولك كدة لفترة، لكن في النهاية هو نفسه مش هاتبقي في باله أو إهتماماته علشان يهددك.
كل الناس عايزة تعرف إيه اللي حصل
الطلاق بالنسبة للناس موضوع شيّق، وبيبقوا عايزين يرغوا فيه للصبح وينمّوا, هاتلاقي صحابك ومعارفك بيسمعوكي بانصات وكأنهم ملهوفين عليكي، علشان يقوموا ويروحوا لقعدة تانية يحكوا عنك وعن قد إيه إنتي غلبانة ومضطهدة. إنتي مش مُجبرة تحكي لحد قصتك، وتعيديها لكل حد يسألك إيه اللي حصل، ده مش هايخليكي أحسن، بالعكس ده هايزوّد من زعلك وضيقتك.
الانبساط والزعل هاييجوا مع بعض في وقت واحد
أهلاً بيك في مرحلة خلاّط المشاعر. يوم هاتحسي إنك مبسوطة وطايرة من الفرحة علشان خلاص بقيتي حرّة، وبعدها بثلاث ساعات لما تشوفي زوجين ومعاهم ابنهم بيلعبوا في النادي ومبسوطين مع بعض هاتحسي إنك مخنوقة وزعلانة لإن الحلم ده إنتهى بالنسبالك. عن تجربة، بنصحك ماتقاوميش أي شعور سواء فرح أو حزن. عمرك ما هاتقدري تكوني مبسوطة طول الوقت وإنتي جواكي كل مشاعر الحزن دي، فـ لو حسيتي إنك محتاجة تعيطي، عيطي لحد ما تحسي إنك خلاص مفيش جواكي دموع تاني؛ ده هايساعدك تكوني أحسن في وقت أسرع.
أهلك مش هايوافقوا
ماتخديش الموضوع على قلبك لما تلاقيهم بيتكلموا عن قد إيه إنتي حظك قليل ومالكيش بخت. وماتستغربيش لو لاقيتيهم بيخططوا وبيحاولوا بكل الطرق علشان يخلوكي ترجعي في قرارك. ممكن يخوفوكي، أو يجادلوكي كتير، أو حتى يتحايلوا عليكي حتى لو عارفين إنك مش هاتعيشي مرتاحة. بس بعدين لما تتجاوزي المرحلة الصعبة دي، وتقفي على رجليكي تاني، هايكونوا فخورين بيكي جداً، وكأنهم كانوا دايماً بيشجعوكي على الخطوة دي.
شغلك أهم حاجة في حياتك
خلال الانفصال، نادر جداً لما تلاقي طليقك بيدفعلك نفس المبلغ اللي كان بيدفعه لما كنتوا متجوزين. وحتى لو كان بيدفع مبلغ كويس، لازم ماتعتمديش عليه هو بس. لإنك برضه هاتفضلي محتاجة فلوس أكتر، وكمان حاجة تشغلك بشكل دائم عن مشاكلك؛ علشان ماتكتأبيش، وتقعي، وتبقى حالتك أسوأ من الأول. انغمسي في الشغل لإنه هايساعدك تفكري في نفسك أكتر، وتكوني مستقلة ماديا.
أي ست “مكتأبة” بتبقى فريسة سهلة
قبل ما تنهاري تاني، هاتلاقيه بيظهر في حياتك، علشان يبقى الكتف اللي تميلي عليه وتشيليه همومك، هاتلاقيه فيه كل الحاجات اللي ماكنتش موجودة في طليقك، ودي حاجة كويسة وهاترضي غرورك. لكن كل ما تتطور العلاقة كل ما هاتبان نواياه اللي احتمال كبير جداً ماتكنش كويسة. وحتى لو كان قصده خير، ماينفعش تخرجي من علاقة وتدخلي في علاقة تانية على طول وإنتي لسة مشاعرك مش مستقرة.