صانع المزيكا اللي بتفرحنا، وتزعلنا في نفس الوقت، الدرامر الأوحد، الأكثر موهبة، والمفضل لينا في مصر، وعضو فريق كايروكي: تامر هاشم؛ اللي قدر بمشاركاته مع فريقه كايروكي إنه يغير مشهد الموسيقى المستقلة في مصر.
إيه تعريفك للرجولة؟
الرجولة هي الأخلاق والمبادئ اللي بنتعامل بيها في علاقتنا مع الناس.
إيه هي الرجولة بالنسبة للمجتمع؟
في الغالب بتنحصر في انت مسيطر قد إيه وسط أهلك، صحابك، أو في شغلك. راجل يعني إنك تبقى صاحب نفوذ وسلطة على اللي حواليك، ولازم كل الناس تنفذ اللي انت بتطلبه، علشان إنت الراجل.
هل في أي مفاهيم غلط ورثناها عن الرجولة؟
لما كنت صغير في حاجات كتير فهمتها غلط بسبب المجتمع، ولما كبرت وفهمت إني كنت غلطان. مثلا كنت فاكر إن في حاجات أقدر أعملها لإني راجل، بس لو ست عملت الحاجات دي تبقى غلطة كبيرة في حقها، وعيب، ومايصحش.
“مجتمعنا علمنا إن العياط للستات بس، مع إن كلنا بشر وعندنا مشاعر ومفيش أي حاجة تكسف.”
في رجالة بتعيط؟
عن نفسي، بقدر أعيط لما أتفرج على فيلم، أو لما تحط في موقف يضايقني. مجتمعنا علمنا إن العياط للستات بس، مع إن كلنا بشر وعندنا مشاعر ومفيش أي حاجة تكسف.
إزاي أهلك ساعدوك تكوّن فكرتك عن الرجولة؟
أهلي خلفوني وهما لسه شباب صغيرين، والدي كان بيضربني كتير علشان يخليني أقوى، وأنشف. وده خلاني أكبر بعقد ومشاكل في التحكم في الغضب. ده جانب أنا مش بحبه في شخصيتي، بس كمان علمني إزاي أحب وأتعاطف مع اللي حواليا.
إيه مدى تأثير مفاهيم المجتمع الخاطئة عن الرجولة على العائلات؟
إحنا مسيطرة علينا فكرة “البيت اللي ماسكه راجل” بمعنى إن راجل البيت هو اللي بياخد كل القرارات، ومابيفكرش في شريكة حياته، ولا في أراءها، أو في تأثير القرارت دي عليها.
ترجمة: تسنيم عبدالله