طول عمري كنت بخبي الموضوع. من غير سبب. محدش قاللي أعمل كدة، بس كنت بخبيه من نفسي. كنت حاسة إن دي حاجة مش طبيعية ومش مفروض أي حد يعرفها، القريبين مني بس هم اللي مسموح لهم يعرفوا حاجة زي دي عني ولو عرفوا مش هيعرفوا ده على طول برضو. بس ليه الموضوع حساس إني أتكلم فيه؟ معنديش فكرة.
بس هي دي الحقيقة، أنا أهلي مُطلقين!
من ساعة ما الطلاق حصل من كام سنة والكل بيتعامل معاه على إنه سر مش مفروض يتقال بسهولة. يمكن ده بسبب الصورة المرسومة للطلاق في مجتمعنا. دايمًا كنت بسمع كلام من نوعية إن الأولاد هيتربوا تربية مش سليمة لو الأهل اتطلقوا. أو ازاي البنات هتتجوز لما تكبر؟ وأكيد هيبقى طلاق الأهل عائق في جواز الأولاد. ده غير مشاعر الشفقة أو العطف اللي بتبان على وش أي حد أول ما تقول إن أهلك منفصلين. كل الأسباب دي، وغيرها كتير، خلتني أخبي الموضوع لسنين كتير. لحد ما فكرت إن إيه المشكلة؟ ليه لازم اخبي حاجة زي دي؟ الموضوع عادي جدًا اني أتكلم فيه.
فأنا بقى البنت اللي عايشة بين بيتين!
وفي الحقيقة، الموضوع في أوقات كتير بيبقى ليه مميزات. بيتين مختلفين، أوضتين، روح وجو مختلف في كل بيت، حياتين بمعنى أصح.
تفاصيل الحياة مختلفة أكيد. مش حاجة عادية إن الشخص يقسم حياته لاتنين. مش بقول ان ده الحل الأمثل أو أحسن سيناريو الواحد يتعامل معاه، بس مش دايمًا ده بيبقى حل وحش.
المشكلة ان الناس بتحط صور معينة لكل حاجة ومستنيين أشكال مطابقة بالميللي للصور اللي في دماغهم، والعيلة المصرية واحدة من الصور دي. أب وأم وأطفال. أي شكل من أشكال العيلة مختلف عن كده يعتبر غريب وساعات مرفوض وبالتالي مينفعش نتكلم عنه.
الحياة مع الأب بس أو الأم بس دي حياة مش طبيعية في نظر ناس كتير وده السبب اللي كان بيخلي أقارب كتير ينصحوا أهلي يتراجعوا عن قرار الطلاق عشان ببساطة منخرجش عن “الصورة” النمطية اللي المجتمع رسمها.
بس الحقيقة ان الصور دي مش دايماً حقيقية. أنا واحدة من الأولاد اللي أهلها بيشاركوا في حياتها وتربيتها بنفس النسبة رغم طلاقهم. أنا البنت اللي بتشارك بيتين مختلفين مع باباها ومامتها. أنا واحدة من اللي بيشوفوا الطلاق حل لمشاكل كتير واختيار أفضل من جواز فاشل.
ساعات الموضوع بيبقى مش منطقي، مش مريح أو غريب…بس مش هي الغرابة طبيعية في أوقات كتير؟
