ترجمة: تسنيم عبدالله
تجربة اختيار أوضة ابنك أو بنتك، وتصميم الديكور بتاعها، من التجارب الجميلة، والمبهجة اللي هاتعدي بيها في حياتك. وفي رأيي الأوضة دي بالذات لازم تكون كل تفاصيلها من إختيار الأب والأم، ورؤيتهم، وروحهم هما، مش إختيار مهندس الديكور. ومع إنها ممكن تبان مهمة سهلة، لكن في حاجات لازم تكوني عارفاها، وواخدة بالك منها قبل ما تبدأي تصممي ديكور أوضة أطفالك.
مكان الأوضة:
مبدئياً، لازم مكان أوضتهم يكون قريب من أوضتك، تحسباً لحالات الكوابيس الوحشة، أو الخوف من الدولاب؛ ماتخليهمش يمشوا كتير لحد ما يوصلوا لأوضتك وهما خايفين.
خليها شبههم وفيها من تفاصيلهم:
أوضة إبنك أو بنتك هي أكتر مكان هايقضوا وقت فيه، علشان كدة لازم تكون تفاصيلها شخصية جداً، ومعمولة مظبوط علشانهم. ومفيش حاجة بتخلي الأوضة شخصية زي الصور، أو رسمة هما رسموها وعليها اسمهم.
اختاري ألوان هادي، وكوني مبدعة في اختياراتك:
الأوضة المفروض تعكس اختيارات، وشخصية طفلك. مهم جداً إن ابنك أو بنتك يكونوا حاسين بالراحة، والأمان في أوضتهم. الألوان اللي بتختاريها للأوضة بتأثر على مزاج طفلك وحالته النفسية، فكوني حريصة إنك تختاري ألوان هادية بتبعث على الإسترخاء، والطمأنينة، والراحة. وكمان الأفكار والرسومات على الحيطة دايماً بتكون فكرة كويسة.
نقطة تركيز الأوضة:
اختاري حاجة زي السرير، أو برواز على الحيطة، أو الجزء اللي في ألعابه؛ تكون الجزء الأهم في الأوضة، وكل حاجة موجودة في الأوضة تكون متحمورة حواليها، وتكون أحلى حاجة في الأوضة، وباقي الديكور يكون بسيط وهادي.
فكري على المدى البعيد:
لما تيجي تعملي تصميم أوضة الأطفال لازم تفكري على المدى البعيد، علشان إنتي أكيد مش هاتحبي ترمي كل الحاجات الموجودة في الأوضة بعد فترة قليلة. استخدمي الحاجات الموجودة عندك، وضيفي عليها سرير للأطفال مثلاً. التفكير في المستقبل هايساعدك تختاري ديكور ملائم لمزانيتك واحتياجاتك، وتوفري فلوس أكتر.
ركزي إن يكون عندك مساحات كتير لتخزين الألعاب، وزيني الاوضة بحاجات ممكن تستبدل بسهولة زي المخدات، او الرسومات، أو إضاءات مختلفة، بحيث إنك تقدري تغيريها بسهولة كل ما أطفالك يكبروا.
ماتستغنيش عن وجود الشبابيك:
خليكي حريصة إن يكون في مجال لنور الشمس إنه يدخل أوضتهم، علشان تضمني أكبر قدر ممكن من الإضاءة، وده كمان كويس لنظر أولادك.
هيئي الأوضة لطفلك Childproof :
اتجنبي الأرضيات الرخامية؛ استبدليها بسجاجيد سميكة. علقي براويز الصور على ارتفاع عالي علشان مايبقاش سهل إنه يوصلها وتقع عليه؛ بدلي الإزاز بالبلاستيك. لو بتخططي إنك تحطي تليفزيون اتأكدي إنه يكون ملزوق كويس على الحيطة علشان مايسببش أي حوادث. ماتخليش أي فيشة مش متغطية. خلي بالك من زوايا الترابيزة والسنون بتاعتها.
اتجنبي الإضاءات القوية:
اتأكدي إن يكون في إضاءة هادية وخفيفة، بجانب الإضاء القوية، ويكون في زرار لتخفيف الإضاء في أي وقت.