إسراء عوض اكتشفت شغفها بكرة القدم من وهي في الحضانة، كانت بتلعب بالكرة مع ولد والكرة خبطتها في وشها ومناخيرها بدأت تنزف، المدرسين كانوا بيغسلوا لها وشها وكل اللي كانت بتفكر فيه انها عايزة ترجع تكمل لعب بالكرة بسرعة، ومن ساعتها وهي بتلعب، بتلعب بشكل احترافي من 2002، إسراء كسبت كاس مصر والدوري المصري كذا مرة، وكسبت بطولات دولية في المانيا ولبنان، ومثلت المنتخب من 2007 لحد 2016، ودلوقتي وهي عندها 33 سنة، إسراء ما زالت بتلعب وكمان بتدرب فريق واعد من بنات اعمارهم تتراوح ما بين 11 و13 سنة.
قعدنا مع إسراء عشان نكلمها عن مشوارها الكروي المدهش.
كان صعب اللعب في فريق كله من الولاد؟ و ازاي؟
لما كان عندي 12 سنة بقيت كابتن فريق الأولاد في مدرستي في الكويت، قدمت عشان ادخل الفريق مع بنتين تانيين وانا كنت الوحيدة اللي اتقبلت وبقيت كابتن الفريق، في البداية الموضوع كان صعب عشان الأولاد ماقبلونيش، كنت عايزة اسيب الفريق بس بابايا والمدرب ماسابونيش اعمل كدة، كان لازم احارب عشان يحترموني، بعد كام ماتش ابتدت الدنيا تتحسن، في تقليد ان قبل ماتش الكرة كابتن الفريقين بيسلموا على بعض قبل الماتش، الولد اللي كان كابتن الفريق التاني مارضيش يسلم عليا، واتفاجأت بأن زملائي في الفريق اللي كانوا مش راضيين بيا في الأول بيصالحوني وبيدعموني، كان احساس جميل لما كسبت الماتش ده ولاقيت الدعم من فريقي.
شايفة الكرة النسائية في مصر عاملة ازاي مقارنة بمن عشر سنين؟
من عشر سنين المنافسة كانت اقوى بكتير، جودة اللعبة نفسها كانت احسن كمان، وبرضه واضح ان مافيش تخطيط من الإتحاد في كرة السيدات، بس انا شايفة ان في أمل لأنهم ابتدوا يركزا اكتر على الشباب وهيرجعوا المنتخب من ساعة ما اتلغى في 2016.
ايه اكتر انجاز انتي فخورة بيه؟
وصولنا لكاس الأمم الإفريقية برغم كل الصعوبات لأول مرة من 18 سنة في 2016، بسبب حجم جسمي الصغير عمري ما جاتلي فرصة اني أبدأ للمنتخب، لكن في الماتش ده انا اللي بدأت، وماكنتش حتى بلعب في مكاني المعتاد، بس لعبت احسن ماتش في حياتي واخدت لقب احسن لاعب في الماتش في القاهرة، كسبنا 1 – 0 و خسرنا في ابيدجان 2 – 1 وكانت نتيجتنا النهائية 2-2 لكن الجون الخارج الديار ده هو اللي وصلنا لكاس الأمم الإفريقية 2016، وجاتلي الفرصة اني اثبت للكل ان الصعوبات اللي عملوهالي كانوا وهم في خيالهم.
اثرت فيكي الكرة ازاي على المستوى الشخصي؟
علمتني اني احارب وعمري ما استسلم، واني اؤمن بنفسي حتى لما مايبقاش في حد تاني مؤمن بيا عشان انجح، وانت الشغف بيدي دافع، علمتني قيم كتير ومهارات حياتية بتمنى اعلمها للبنات اللي بدربهم واللي بقول عليهم “بناتي”.
ليه تفتكري شعبية فرق كرة قدم السيدات مش قوية زي كرة الرجالة؟
اعتقد انه عشان الكرة بيتبص لها على انها “رياضة رجالة”، بس هي موهبة والموهبة مابتفرقش مابين راجل وست، هو بس الرجالة بطبيعتهم اقوى واسرع من الستات، وكمان في سبب تاني وهو ان الأهلي والزمالك مالهمش فرق سيدات، لو ده حصل عدد المشجعين هيزيد ومعاهم الدعم.
شايفة ان التحيز ضد المرأة موجود في الكرة؟ احكي لنا اي قصص انتي واجهتيها.
موجود، انا واجهته وانا عندي 12 سنة ولسة بواجهه لحد دلوقتي، تخيلي انك تحققي احسن حاجة ممكن تحققيها في شغلك وتشوفي رد الجمهور على السوشيال ميديا ويكون مخزي، كذا صفحة اتكلمت عن الخبر لكن 90% من التعليقات كانت عن شكلنا او اننا لازم نرجع المطبخ، الردود كانت مخيبة للآمال.
هل التحديات اللي بتواجهها لاعبات الكرة هي هي في كل حتة في العالم؟ ولا بتختلف على حسب المجتمعات؟
التحديات اللي الستات بتواجهها هي هي في كل حتة في العالم، بس طبعاً بتختلف من ثقافة لثقافة، في مصر انا شايفة انها اصعب عشان في كمان صعوبات اقتصادية وثقافية وغيرها كتير، تخيلي كدة ان في 2015 كاس العالم للسيدات اتلعب على ملعب صناعي مع انه معروف ان ده بيزود الاصابات، لكن الرجالة عمرهم ما هيلعبوا على ملعب زي ده.