من كام شهر كنت معزومة على عيد ميلاد بنت واحدة صاحبتي عندها 8 سنين. جبت ولادي، واشتريتلها هدية وروحنا الحفلة. كل حاجة كانت مثالية؛ لحد ما بنتي جاتلي وقالتلي إنها مش عارفة تندمج مع الولاد التانيين –علشان ببساطة مش عارفة تفهم هما بيقولوا إيه. تنحت شوية وسألتها ليه فكرت كدة. فقالتلي: أنا مش متأكدة إيه اللغة اللي بيتكلموا بيها. طلبت منها تحاول تاني، لحد ما جه وقت تقطيع التورتة. وكأم قائدة خدت دور تقطيع الكيكة لقطع صغيرة وكل الولاد اتجمعوا حواليا علشان ياخدوا حتة. وقتها بس فهمت ليه بنتي اللي عندها 6 سنين كانت عايزة تقولي إيه.
- ? Tante, may I have a vanilla slice
- Tante, nooo I don’t like chocolate
- Tante, I would like apple juice, please
كل طفل من الأطفال اللي في العيد ميلاد بيتكلم إنجليزي. مفيش ولا واحد منهم بيتكلم عربي. وقفت هناك مصدومة، وقررت أعلمهم كلهم درس يمكن ماينسهوش. “ماحدش هاياخد من التورتة غير لما يطلب بالعربي،” قلت كدة بكل فخر. ولقيت عيونهم كلهم خوف وصدمة واستغراب.
فقال واحد من الأطفال بقرف: “يعني إيه عربي” رديت: “يعني عربي، اللغة اللي لازم تتكلموها.” اللي حصل بعد كدة كان أصعب عشرين دقيقة عشتهم في حياتي. بعض الأطفال قعدوا دقيقتين تقريباً علشان يكوّنوا جملة نحوية مظبوطة –كلهم نطقوا معظم الحروف غلط. كل الأمهات بدأوا يضحكوا. شيء محزن.
افتكرت أول مرة قابلت صاحبة الحضانة الفرنسية اللي ولادي بيروحوها. سألتها إيه اللي ممكن أعمله علشان أخليهم يتكلموا فرنساوي صح. ردت: “ده مش شغلك. شغلك إنك تتكلمي معاهم عربي صح. واتجنبي تتكلمي بالإنجليزي، أو أي لغة تانية، في البيت. هما محتاجينك تعلميهم لغتهم الأم، وإحنا هانعلمهم فرنساوي.” وده اللي أنا عملته فعلاً. في بيتي مابستعملي كلمات زي “shoes” أو “no” أو “cake” أو حتى “good night” أو أي كلمة أجنبية تانية. أصريت أن أولادي يقولوا لي “ماما” مش “مامي”، وينادوا أبوهم “بابا” مش “بابي”. إحنا بنهزر بالعربي، وبنتخانق بالعربي، مع إن أولادي بيتكلموا إنجليزي وفرنساوي في المدرسة. ابني، 8 سنين، عنده ثلاث صحاب ولاد معاه في الفصل –بيتكلموا عربي مع بعض.
بس عند مرحلة معينة كنت قلقانة: هل أولادي بيعرفوا يتكلموا إنجليزي وفرنساوي فعلاً؟ أنا بدفع دم قلبي على تعليمهم، بس عمري ما بشوفهم بيتكلموا مع بعض أو مع صحابهم غير بالعربي. طلبت اجتماع مع أستاتذتهم (لغتهم الأم الفرنسية) وسألتهم، وأكدولي إن أولادي شاطرين جداً، الحقيقة واحدة من المُدرسات شكرتني إني علمتهم عربي صح –لأنه ساعدهم في النطق ومخارج الحروف في اللغات التانية. زي ما قالت.
أنا نشأت في مجتمع أمريكي، ومدرستي كانت أمريكية، واتخرجت من جامعة دولية. وعانيت لسنين بسبب ضعف لغتي العربية كتير. أنا فاكرة الحاجات اللي ساعدتني أقوي العربي بتاعي تاني كانت أغاني أم كلثوم، والدي كان بيشغلها كتير في العربية، لما كنت في ثانوي كنت بقرأ جرائد بالعربي من أولها لآخرها، وأحاول أفهم الجمل. ولما دخلت الجامعة، بدأت أقرأ روايات نجيب محفوظ، يوسف السباعي، يوسف ادريس، أحمد خالد فارق، نبيل فاروق، وطه حسين. خطي بالعربي كان كارثة، ومابعرفش أعبر عن نفسي غير لما احشر كلمتين إنجليزي في نص الجمل. فماكنتش عايزة أولادي يعانوا زيي.
لكن بلاش نخلط الأمور: اللغات الأجنبية نعمة. هايخلي وضع المستوى الإجتماعي لأولادك أفضل، وهايمهدلهم الطريق لمهنة ناجحة ومرموقة أكثر؛ ومع كدة لو كان أطفالك مايقدروش يطلبوا وجبة بالعربي، أو يتصلوا بالسوبر ماركت باللغة العربية، حياتهم هاتبقى صعبة بردو.
اللي قاتلني هي حقيقة أن اللغة العربية لغة جميلة. مليانة بالكلمات الوصفية الرائعة والتشبيهات البليغة. اللي بيتكلموا باللغة العربية بيتقنوا جميع أنواع الأصوات، وبيقدروا يتكلموا جميع أنواع اللغات – عندنا كل الحروف وكل الصوتيات اللي ممكن تتوجد. اللغة اللي بتتكلمها مالهاش علاقة مباشرة بمعاييرك الاجتماعية، -باستثناء مصر ، وده شيء حزين.
المجتمع بتاعنا بقى بيقولب اللي بيتكلموا بالعربي على إنهم من طبقة إجتماعية أقل. وده، أكيد، مرتبط بإننا مابقيناش نلبس غير من ماركات عالمية، وحرصين إن في كل مرة نخرج فيها يبان إننا طالعين من إعلان براندات. الناس كل مدى، بيتحولوا لحاجات مزيفة، وغير حقيقية، واللي بيحزنني إننا بنعلم أولادنا يكونوا شبهنا. أنا مؤمنة إن لو التريند فضل مستمر، أولادنا مش هايعرفوا يتواصلوا مع المواطنين التانيين، والبلد هاتتقسم نصين –اللي بيعرفوا يتكلموا عربي، واللي مابيعرفوش.
اتكلمي عربي مع أولادك. ماتجبيش مربيات أجانب علشان يتعلموا لغة تانية. لو عايزاهم يتقنوا اللغات استعملي اللغة صح. أسمها عايز حتة تورتة مشI want a piece of cake .
سلاموا عليكوا –
مش باي!
تابعي الفاتونيستا نورا مصطفى على صفحتها على إنستاجرام @fat_o_nista
ترجمة: تسنيم عبدالله