“طب بس هناكل فين؟” دي الجملة المعروفة اللي لازم تتقال واحنا بنقرر على أي خروجة. دايمًا بنفكر في مكان كل اللي خارجين يتبسطوا فيه، من طعم وجودة وأسعار. بس حاجة كمان بتخلي المكان اللي هنقعد فيه مميز هي الديكور!
في الفترة الأخيرة، ظهرت مطاعم وكافيهات اختارت ديكور مختلف عشان يدي للناس تجربة مميزة وهم قاعدين، ومن اللي احنا شفناه، دي مجموعة من الأماكن اللي نجحت في ده.
تراك برجر
المكان قايم على فكرة العربيات. وده هتحسوه من اسمه ومن الكاوتشات اللي مستخدمة في ديكور المكان، بس مش ده المُلفت. اللي هتلاقوه مختلف في تراك برجر هو إنكوا بدل ما تقعدوا على كرسي عادي أو كنبة، الكنبة هي جزء من عربية فولكس Beetle فأنت ببقى قاعد في عربية قديمة وانت بتاكل. لو انتوا بتحبوا العربيات ومهتمين بيها هيعجبكوا جدًا مود المكان.
تراك برجر موجود في شارع 9 في المقطم وتقدروا تعرفوا أكتر عنه من لينك الصفحة بتاعته.
الكوخ
هو كافيه في وسط البلد ديكوره مختلف من كذا ناحية وده اللي هتلاحظوه من أول ما تدخلوه. المكان كله يُفط وصور مبهجة وتخليك تسرح كتير معاهم. كمان هو ليه كذا قعدة ففي قعدة عربي وفي بلكونة. ده غير التفاصيل اللي حواليكوا من أشغال يدوية وخوص ومود مختلف تمامًا.
الكوخ موجود في شارع سكة الفضل متفرع من طلعت حرب وهتلاقوا تفاصيل أكتر عنه هنا.
سوشيال كافيه
هو كافيه هتبقى عايز تروح تتصور بس فيه. من أول المدخل بتاعه لحد الكافيه جوة هو عبارة عن أماكن تصوير مغرية لأن الحيطان مرسوم عليها رسومات وجرافيتي مُلفتين جدًا وديكور المكان من جوة والمرايات اللي فيه تخليكوا عايزين تتصوروا فيه طول اليوم. لو عندكوا الصاحب اللي بيخرج بس عشان يتصور فأكيد لازم تاخدوه وتروحوا سوشيال كافيه اللي موجود في شارع 9 في المعادي وتفاصيله على الصفحة بتاعته من هنا.
استيدج
هو كان بيت مهجور مليان أنتيكات واتحول لآرت كافيه ومكان كله مزيكا فتقدروا تتوقعوا انتوا الديكور بتاعه عامل ازاي. المكان ليه كذا قعدة وموود منهم القعدة العربي والمسرح أو الاستيدج نفسه اللي بيتقدم عليه عروض مزيكا وحفلات كاريوكي وفي أماكن لعب بلاي ستيشن وبيبي فووت. الكلام ده في فرع استيدج الزمالك اللي تفاصيله في الصفحة دي بس استيدج ليه فرع تاني في المنيل تقدروا تعرفوا عنه أكتر من هنا.