حوار : ريم جميل
كتبت : حنان الهمشرى
مرحلة إكتشاف الحاجة اللى إنت بتحبها مش سهلة، وده خد وقت من آسر ياسين علشان يعرف من خلال مسرح الجامعة إن التمثيل هو الحاجة اللى بيحبها وعاوز يكمل فيها، وعلشان كده بيشوف إن المسرح بصفة خاصة مهم جداً، بالذات فى تكوين شخصية الأطفال، ده غير إننا إتكلمنا معاه فى مواضيع مختلفة، وعرفنا منه معنى الرجولة بالنسبة له.
تفتكر إزاى ممكن نحقق معادلة إن الفيلم يبقى على نفس مستوى الرواية زى ما حصل فى “تراب الماس”؟
أنا شايف إنها ميزه إن اللى كتب السيناريو هو نفسه اللى كتب الروايه، وبالرغم من كده أحمد مراد قعد كتير جدا يشتغل على السيناريو وعلى تطوير المعالجة السينمائية ، وإنه يتحول من رواية لفيلم وده مش أى حد يعرف يعمله، ده غير إن مروان حامد هو مخرج واعى جدا و’’تراب الماس‘‘ هو واحد من أحلى أفلامه، وفكرنى جداً بعمارة يعقوبيان، لإنه كان فيلم مميز وتقيل وفيه عمق، وكان لازم يتعامل معاه بشكل ناضج، وأنا سعيد إن الناس اتبسطت من الفيلم زى ما اتبسطت من الرواية، بالرغم من إن أنا بالنسبالى الإتنين مختلفين عن بعض فى شوية تفاصيل واللى منها وجود شخصية فى الرواية مش موجودة فى الفيلم.
إيه المرحلة اللى نفسك ترجع تعيش فيها ؟
مرحلة الجامعة، علشان ده الوقت اللى عملت فيه كل حاجة عايز أعملها، لعبت أنواع كتير من الرياضة زى التجديف والتايكوندو، ده غير إنى مثلت مسرح وده اللى خلانى أكتشف إنى بحب التمثيل، أنا لو مكنتش عملت كل ده عمرى ما كنت هابقى ممثل.
إيه الدور اللى بتعتبره نقلة فى مسيرتك الفنية ؟
كل مرحلة بتبقى من أهم المراحل فى حياتى، كل يوم فى حياتى سواء بصوّر أو مش بصوّر بتعلم حاجة جديدة، بس دايما بيكون فى محطات، زى إنك تكون بتعمل أدوار صغيرة الأول لحد ما تاخد أدوار أكبر تبين إمكانياتك، وبعد كده فى مراحلة إثبات إنك موهوب، ده غير فكرة إنك تقوم ببطولة فيلم ودى من أصعب المراحل، علشان كدة ’’الوعد‘‘ و’’رسائل البحر‘‘ بالنسبالى كانوا محطة مهمة جداً.
فى أى عمل ليك لما بتشوفه بتسأل نفسك إيه اللى أنا عملته ده ؟
آه طبعا، أوقات بسأل نفسى مثلاً إزاى أنا عملت المشهد ده، وده طبيعى لإنك بتتطور وبتتفرج على نفسك وعلى ناس تانية ومدارس السينما والتمثيل المختلفة، بس عامة أنا مبحبش أتفرج على نفسى كتير، وبالرغم من كده ’’تراب الماس‘‘ و ’’رسائل البحر‘‘ يعتبروا من الأفلام الخاصة جداً بالنسبالى.
مين الست اللى أثرت فى حياتك ؟
أمى أثرت جدا فى نشأتى، وكمان والدى، وربونى بشكل كوّن شخصيتى على مدار عمرى، علشان كده أنا وأخويا كل واحد فينا عنده شخصية منفرده بعيداً عن باباه.
’’أنا مؤمن جدا بالمسرح للأطفال لأنه بينمى عندهم الثقة بالنفس وبيعمل عندهم وعى إجتماعى غير طبيعى باللى حواليهم بسبب إختلاف الأدوار اللى ممكن يأديها على المسرح كونه بيحط نفسه مكان الشخصيات دى.‘‘
Photography : Ramy Badran
إزاى بتربى ولادك على مفهوم الرجولة ؟
أهم حاجة فى بناء الشخصية إنك تسيبله مساحة إنه يفكر ويغلط، أكتر حاجة بركز فيها معاهم ان يكون عندهم شخصية وعشان تبنى شخصية لازم تسيبله مساحة إنه يكوّنها، لازم دايماً يكون عنده سبب بيعمل ده ليه، لو عمله من غير ما يكون عارف السبب هنا تبقى المشكلة، أنا إبنى من وهو عنده سنة ونص بسيبه يختار لبسه ويختار عاوز يروح فين، علشان لما ييجى يعاندنى يعرف إن فى أسلوب تانى، ورد فعل على إختيارة، ده غير إنى بشركهم فى أنشطة أو رياضة أو مسرح، لإنى مؤمن جدا بالمسرح للأطفال لأنه بينمى عندهم الثقة بالنفس وبيعمل عندهم وعى إجتماعى غير طبيعى باللى حواليهم بسبب إختلاف الأدوار اللى ممكن يأديها على المسرح كونه بيحط نفسه مكان الشخصيات دى .
’’أنا مش ضد العياط، المشاعر حاجة مهمة ومفيش راجل معندوش مشاعر.‘‘
تفتكر الراجل ممكن يعيط ؟
أنا مؤمن إن الراجل يعبر عن نفسه بأى شكل، أنا مش ضد العياط، المشاعر حاجة مهمة ومفيش راجل معندوش مشاعر، بس فى فرق بين إستسهال طريقة التعبير، وبين التعبير بطريقة مختلفة، علشان كده أنا بشجع إن الأول يكون فى طريقة تانية للتعبير.
بتحضر لإيه خلال الفترة اللى جاية ؟
دلوقتى بحضر لمسلسل كوميدى رومانسى إسمه ’’شبر ميه‘‘، وده هيكون حاجة مفضلة بالنسبالى لإنى بحب جداً الكوميدى، وإحتمال يبقى فى مشروع سينمائى كمان خلال الفترة اللى جاية.
’’أفراد العيلة كلهم مستنين من بعض الحب، علشان كدة إدى للأطفال الحب وهما يطلعوا ناس كويسة.‘‘
تفتكر الستات عايزين إيه ؟
بالنسبة للستات اللى فى حياتى، فأكيد والدتى عايزانى أفضل إبنها البار، وتشوفنى مبسوط وفى صحة كويسة، ومراتى أكيد عايزه الإحتواء وإنى أبقى بالنسبالها الضهر زى ما كان بباها بيعمل ده، وده مش سهل وبيحتاج لمجهود معين، فى إحتواء معين لازم يتبنى على مر السنين، وهى كمان عليها واجبات بتعملها بشكل تانى، أفراد العيلة كلهم مستنين من بعض الحب، علشان كدة إدى للأطفال الحب وهما يطلعوا ناس كويسة.