‘Coushies’ ماركة مصرية بصناعة سيدات غير مقتدرات مادياً

ترجمة: تسنيم عبدالله

 

ياسمين المهيري، مؤسسة موقع سوبر ماما –واحد من أفضل مواقع العربية المهتمة بكل حاجة تخص الأمهات والعيلة- ياسمين بتفاجئنا بمشروع تاني ناجح، واللي من المؤكد إنه هايعمل فرق في بيوتنا. Coushies  هي ماركة محلية لتصميم المخدات والمساند بتصاميم بسيطة، عصرية، وأنيقة.

ياسمين كانت حابة تقدم مساعدة للستات الغير مقتدرات مادياً، عن طريق توفير مكان وأدوات يستغلوا فيه مهاراتهم في الخياطة، وفي نفس الوقت يكون مصدر دخل ليهم. ياسمين بتقول: “مش لازم تستنى لحد ما يبقى عندك شركة كبيرة ورأس مال ضخم علشان تبدأ تفكر تساعد غيرك، المسؤولية الإجتماعية حاجة لازم تبقى جزء من كل business  حتى لو كان في بدايته.”

Coushies  بتعتمد على شغل، وموهبة الستات اللي مقدرتهم المادية كانت عائق قدام إظهار موهبتهم وشغفهم في اللي هما بيعملوه. المشروع ده فرصة علشان نسلط الضوء على شغل الستات دول، وندعمهم، ونقويهم علشان ينمّوا مواهبهم ومهاراتهم، ويعرفوا إزاي يستفيدوا بيها. وبتوضح ياسمين الهدف من المشروع ده: “كان من هدف مهم جداً بالنسبالنا إننا نتعاون مع مؤسسات خيرية زي مؤسسة تواصل للتنمية، ومؤسسة رومانة، علشان نظهر مواهب الستات العظيمة دي. في النهاية إنتي بتوفيرلهم مصدر دخل، مش بتديلهم صدقة هايصرفوها وبعد أيام يرجعوا يحتاجوا تاني، وده في حد ذاته له معنى كبير بالنسبالنا وبالنسبالهم.”

ياسمين قررت تعمل شِفت كارير، وتبدأ في مشروع Coushies، لكن القرار ماكنش سهل بالنسبالها. بتقول: “كان قرار متهور جداً بدأت في المشروع قبل ما أفكر، وسبت التفكير لبعدين. وفي المشوار، بدأت اقلق واحس بخوف، وكنت بقول جوايا إيه اللي أنا عملته في نفسي ده!.” لكن ياسمين كانت قد التحدي، واكتشفت إنه الموضوع ماكانش مستاهل الخوف ده كله.

تخيلوا لو كل شركة كبيرة أو صغيرة قررت تساهم بمشروع يساعد ويدعم الفئات المحتاجة في مجتمعنا، حياتنا وحياة غيرنا هاتختلف، وهاتبقى مليانة إنجازات، ونجاحات، وفن.

 

 

No Comments Yet

Leave a Reply

Your email address will not be published.