عمرك سألتي نفسك ليه في ناس لما بتدخل أي مكان كل الموجودين فيه بيبصوا عليهم؟ وبيبقى حواليهم هالة كدة غريبة وغير مفهومة، ليه بيدخلوا قلوب الناس بسرعة وبيخطفوا الأضواء والأنظار، حتى لو ملامحهم مفهاش حاجة مميزة أو جميلة لكن دايماً بيجذبوا الانتباه، ليه بيتحبوا من أول نظرة؟ إيه سر الجاذبية دي كلها؟ السر هو “لغة الجسد”!
لغة الجسد هي شكل من أشكال التواصل الغير لفظي، وهي عبارة عن حركات ووضعيات الجسم، تعابير الوش، نظرات العين؛ وإحنا كبني آدمين بنعبر بلغة الجسد بطريقة لا إرادية من غير ما نحس، لغة الجسد بتعكس اللي جوانا على شكلنا الخارجي، يعني بتنقلي للعالم الخارجي إنتي بتشوفي نفسك إزاي وحاسة بإيه من غير ما تاخدي بالك.
التواصل بالعين
العين مرآة الروح، اتواصلي بعينيكي، في عدد كبير جداً من الدراسات أثبتت إن التواصل الصحي بالعين بيعزز الإحساس بالثقة. ماتبحلقيش لحد بس برضه ماتبصيش في الأرض، اتكلمي وإنتي باصة في عين اللي بتكلميه علشان يكون حضورك أقوى، وده هايخلي كل اللي حواليكي يعرفوا إنك عايزة تتواصلي معاهم وتعرفيهم أكتر.
السلام بالإيد:
السلام عموماً للناس الموجودين في المكان بيخليكي محبوبة ومألوفة ليهم، وبالذات الكام ثاني اللي هاتسلمي فيهم بالإيد مع ابتسامة ونظرة عين بتقولي بيها إنك سعيدة بلقاء الشخص اللي بتسلمي عليه، السلام أو المصافحة يقدروا يقووا أو يضعفوا العلاقة.
وضعية الجسد:
من أكتر الحاجات اللي الناس بتجذب إهتمام الناس هي المظهر الخارجي وإزاي الواحد بيقدم نفسه، هل بتقفي بثقة؟ ولا بتتعاملي وبتتحركي بطريقة بتقول للناس إنك بتتمني ماتبقي موجودة هنا؟ وضعية جسمك بتقول عنك كتير أوي، وهي دي اللي بتفرق بشكل كبير جداً. يعني لو إنتي بتقعدي كاشة في نفسك راسك لتحت وضهرك محني وبطنك متطبقة على بعض كدة إنتي بتقولي للناس إنك مش واثقة في نفسك ولا في شكلك، ومش عايزة حد يقرب منك أو يتكلم معاكي لإنك ماعندكيش أي حاجة تثير الإهتمام؛ إنما لو قاعدة ضهرك مفرود وبطنك مشدودة لجوا وراسك مرفوعة وقاعدة في كرسيكِ مرتاحة وواخدة مساحتك، كل الناس هاتفهم قد إيه إنتي واثقة في نفسك وجمالك وهايحبوا يتعرفوا عليكي.
المشية:
من التحديات اللي الست بتواجهها في شغلها هي المشي بالكعب العالي، ومع إنه ممكن يبقى متعب لكنه شيء مهم جداً لإثبات حضورك وتقوية ثقتك بنفسك. مش مهم تمشي بيه كأنك بتعملي عرض أزياء، لكن مهم تمشي بيه من غير ما تبقي حاسة إنك هاتقعي كل شوية وخطوتك ثابتة وراسك فوق مش باصة على الأرض وخايفة؛ مابيبقاش حلو لما تكوني لابسة فورمال شيك وعليه باليرينا دايماً في الشغل إلبسي كعب هايديكي ثقة بنفسك أكتر وحضور أقوى.
الإبتسامة:
سلاحك لاقتحام قلب أي حد مهما كان هو ابتسامتك، الابتسامة تقدر تحلّ مشاكل الكون، تقدر تقربك من أي حد حتى لو كان بيكرهك، وتقدر تخليكي أكتر واحدة محبوبة في شغلك ووسط صحابك؛ الشخصية المبتسمة دايماً بتبقى مريحة نفسياً ودايماً كل الناس بيبقوا حابين يتعرفوا عليها. ابتسامتك بتعبر عن تعاطفك، تفاهمك، محبتك، امتنانك، رضاكي. وصدقيني بابتسامة واحدة بس تقدري تخطفي قلوب كل الموجودين.
علشان تتقني لغة الجسد محتاجة تمرين، مش سهل إنك تغيري حركاتك وطريقتك، لكن المهم من كل ده إنك تكوني واثقة من نفسك جواكي، وحاسة إنك جميلة فعلاً، وقتها مش هاتواجهك مشاكل في التحكم في لغة جسدك.
كتبت: ريجينا عناني
ترجمة: تسنيم عبدالله
