كل حاجة في الدنيا ليها جانبين، جانب حلو ومشرق، وجانب صعب ومظلم. في ناس بتختار تشوف الوحش ودايماً مركزين مع الصعوبات اللي بيعيشوها، متجاهلين تماماً الجانب الحلو، ومش قادرين يشوفوا نص الكوباية المليان.
في شيء جميل ومريح في الأطفال ذوي الاحتياجات الخاصة، بس مفيش حد بيقدر يحسّ بالجمال ده غير أهلهم، أصحابهم، أو مدرسينهم، أو الناس اللي بيتعاملوا معاهم بشكل يومي. حبيت أكتبلكوا وأعرفكوا أكتر عن الصفات اللي بتميزهم:
يقدّروا يعرفوا معادن الناس، ويميزوا لو الشخص ده كويس أو وحش
عندهم حاسة مش موجودة عند أي حد تاني، وهي إنهم بيعرفوا يحسّوا باللي حواليهم، ويفهموا مشاعرهم، وبيقدروا يستشفوا معادن الناس الحلو والوحش منها.
بيطلّعوا الطفل اللي جواك
لما تلعب مع أي طفل عادي بتحسّ إنك رجعت طفل تاني زيه، تخيّل بقا لما تلعب مع طفل عنده قدرات خاصة، هاتفضل حاسس بطفولتك مهما كان سنّك أو سنّه.
حضنهم أدفى وأحن حضن في العالم
يمكن حضن الأم هو أدفى حضن بالنسبالنا، لكن لما تحضن طفل من ذوي الاحتياجات الخاصة هاتحس إن حضنه مليان حُب، وحنية، ولطف، زي حضن مامتك بالظبط.
يمكن حضن الأم هو أدفى حضن بالنسبالنا، لكن لما تحضن طفل من ذوي الاحتياجات الخاصة هاتحس إن حضنه مليان حُب، وحنية، ولطف، زي حضن مامتك بالظبط.
هايخافوا عليك أكتر من نفسهم
أي حد عايش مع طفل أو شخص عنده قدّرات خاصة، عارف قد إيه هما بيكون عندهم غريزة الخوف والإهتمام بكل الناس اللي حواليهم، هايهتموا بيك زي ما انت بتهتم بيهم وأكتر، ودايماً هاتكون أولوية عندهم، دايماً هاتلاقيهم بيسألوا عنك كل شوية ويطمنوا على أخبارك.
موهوبين جداً
دايماً هاتلاقي ذوي القدّرات الخاصة متميزين بمواهب وقدّرات مش عند ناس كتير، وفي مجالات مختلفة؛ منهم اللي متفوق في الرياضيات، ومنهم اللي بيعرف يحفظ ويفتكر كل حاجة، ومنهم اللي بيلعب رياضة وبياخد فيها ميداليات ذهبية!
عاطفيين جداً
شخصياتهم طيّبة جداً، ومُحِبّة. نفوسهم دايماً صافية، مابيشيلوش من حد، ولا بيفكروا أبداً يأذووا أي حد.
خلوقين جداً
من بين كل صفاتهم المميزة، دي أجمل صفة فيهم. الأطفال ذوي القدرات الخاصة بيكونوا مؤدبين جداً، وبيحترموا كل الناس الصغير والكبير. أحياناً كتير ممكن تلاقي الأطفال العاديين بيتكلموا مع أهلهم بقلة ذوق، أو تلاقيهم بيتكلموا بلؤم وسخافة مع بعض. لكن عمرك ما هاتلاقي طفل من ذوي القدّرات الخاصة بيتكلم مع أهله أو مع أصحابه بطريقة غير لائقة.
مابيعرفوش يكشروا
هاتلاقيهم مبسوطين أغلب الوقت، ولو حصلت حاجة ضايقتهم مابيعرفوش يكشّروا أو يزعلوا أكتر من نص ساعة!
هاتلاقيهم مبسوطين أغلب الوقت، ولو حصلت حاجة ضايقتهم مابيعرفوش يكشّروا أو يزعلوا أكتر من نص ساعة!
صادقين جداً
بكل بساطة، الأطفال ذوي القدرات الخاصة عمرهم ما بيكذبوا أبداً!
مرتبين جداً
حاجتهم دايماً مترتبة، ومنظمين في كل حاجة تخصهم.
كلنا كبني آدميين، فينا الحلو وفينا الوحش؛ لكن بالنسبالي الأطفال ذوي القدرات الخاصة كلهم على بعضهم حلوين!
ترجمة: تسنيم عبدالله
