زهقتي من لبسك كله؟ عايزة تغيّري وتلبسي حاجة جديدة وفي نفس الوقت تكون مريحة ممكن تروحي بيها النادي وفي نفس الوقت تروحي بيها المكتب؟ عليكي وعلى دولاب أخوكي!
لو أخوكي بيسافر على طول أو بيسمحلك تستخدمي حاجته فإنتي محظوظة ولازم تستغلي الفرصة دي لأنها مابتجيش كتير.
تعالي بقى نقولك تستغليها أحسن استغلال ازاي:
السويت بانتس
كل السويت بانتس بتاعته هتليق عليكي لأن أصلا السويت بانتس ستايلها واسع فالمقاس مش هيبقى مشكلة خالص. ولو لبستي عليها تيشيرت وخرجتي مع أصحابك وممكن تزودي عليهم جاكت دينيم جينز مع شنطة وجزمة شيك وتروحي بيه الشغل الصبح.
الجاكت الدينيم الجينز
ده كمان قلبيه من دولابه لأن ستايل الجاكت الدينيم الجينز الواسع هو الموضة دلوقتي أكتر من اللي مقاسه مظبوط عليكي.
ال hoodies والسويت شيرتس
تروحي بيه التمرين على اليوجا أو السويت بانتس أو تروحي بيه الشغل على جينز وشنطة وجزمة شيك يعني في كل الأحوال هاينفع.
الكاب
أي كاب تلاقيها في دولاب أخوكي البسيها على طول من غير تفكير لأن أي كاب هتليق عليكي وكلهم موضة وممكن تلبسيهم في النادي أو في الجامعة وبينقذوكي دايما لو شعرك مش متظبط وعايزة شكلك يبقى حلو.
القصمان
قمصان أخوكي هي أنسب كاش مايوه في الساحل ولو مش واسعين عليكي أوي ممكن تلبسيهم وتروحي الشغل، النادي، تخرجي مع أصحابك..
تيشرتات الكُرة
كل تيشرتات الكُرة بتاعته هتناسبك وهتبقى حلوة عليكي في أي وقت وعمرها ما بطلت تبقى موضة أو حلوة علينا كبنات.
الجاكت والبالطو
عادي جداً لو انتي بردانة في الشتا بدل ما تنزلي من غير جاكت وتستني صاحبك يديكي الجاكت بتاعه، خُدي جاكت أو بالطو أخوكي وشكله هيبقى حلو عليكي وممكن تقولي قدام صاحباتك إنه جاكت أو بالطو صاحبك اللي ادهولك عشان كنتي بردانة من باب الرومانسية وكدة.
البلوفرات
ماهو الشتا مش بس جواكت، والبلوفرات في دولاب أخوكي هتلاقيهم أكتر من الجواكت وبالتالي فرصة أكبر إنك تلاقي اختيارات أكتر تختاري منهم اللي تحبيه ويليق عليكي أكتر وده بقى هتلبسيه فعلا في كل حتة مالوش مكان ودايما هيبقى شكله حلو عليكي ولو قررتي تسافري هيبقى مهم معاكي في شنطة سفرك في الشتا.
الكوتشي
صحيح إن مقاس الولاد بيبقى دايماً أكبر من مقاساتنا في الجزم، بس لو أخوكي أصغر منك ممكن مقاسكم يبقى واحد. وده هيبقى مناسب جدا في الكوتشي أو الكونفيرس لأن دول شكلهم وموضتهم واحدة سواء للولاد أو البنات.
البيجاما
أوقات كتير بيجامة أخوكي بتبقى أريّح حاجة ممكن تلبسيها في البيت وبالذات بقى لو احنا في الشتا، مقاسها الكبير هيديكي إحساس إنها بتدفي أكتر وعايزة تفضلي لابساها طول اليوموأهم حاجة، ماتنسيش دايماً تكسبي أخوكي علشان يرضى يسيبك تاخدي كل ده من دولابه.
