وسط زحمة المعرض…في كتب لازم ننقيها مخصوص قبل ما نمشي

طول عمر معرض الكتاب محطة أساسية في أجازة نص السنة ومع تغيير المكان وزيادة عدد الكتب والكُتّاب كل سنة، بنروح كذا مرة ونتوه وسط الكتب ونحتار في الحاجات اللي هنجيبها. عشان كدة، جمعنا مجموعة من الكتب اللي مينفعش تفوتوها في معرض الكتاب 2020.

 

إذما – محمد صادق

بقالنا تلات سنين مستنيين والسنة دي أخيراً محمد صادق أعلن عن روايته السادسة “إذما” واللي هتنزل في معرض الكتاب 2020. روايات محمد صادق كانت دايمًا بتحقق نجاح كبير عشان أسلوبه المميز وأفكاره اللي عمرها ما كانت تقليدية. من أكتر الروايات اللي كتبها صادق وعجبت الناس كانت رواية “هيبتا” واللي اتحولت لفيلم سينما بعد نجاحها. رواياته التانية كانت دايمًا بيقراها الشباب بالأخص وبيتناقشوا في تفاصيلها زي أنت، انستا حياة، بضع ساعات في يوم ما، وطه الغريب. مافيش تفاصيل كتير نزلت عن الرواية لحد دلوقتي غير الغلاف وشوية مقتبسات نزلها صادق على صفحته وده بيحمسنا أكتر إننا نقراها ونعرف تفاصيلها.

 

كونداليني – ميرنا الهلباوي

“مر مثل القهوة حلو مثل الشوكولا” كان الكتاب اللي عرفنا بميرنا الهلباوي و قراه الكتير وانتشرت حتت منه على الفيسبوك والمواقع التانية لأنه كان واقعي وبسيط فحست الناس إنه بيعبر عنهم في مواقف كتير. ميرنا السنة دي كتبت رواية جديدة وهتبقى موجودة في المعرض وهي “كونداليني”. ماحدش عارف ميرنا مجهزة إيه في “كونداليني” ولو هتكون شبه روايتها الأولى ولا لأ بس اللي ممكن يساعدنا أكتر إن ميرنا هتكون موجودة في المعرض يوم الجمعة 24 يناير في حفل توقيع الكتاب اللي هيحصل في جناح دار الكرمة، صالة 2 جناح B12 الساعة 5 بالليل.

ما رواه البحر – ساندرا سراج

رواية مش هيرويها شخص المرة دي بس البحر هو اللي هيرويها. غريبة؟ ده كمان اللي احنا حسيناه لما شفنا جزء من رواية “ما رواه البحر” اللي بيقول إن البحر هو اللي بيحكي القصة من منظروه. التعريف بالكتاب شدنا وحمسنا إننا نقراه بالذات إن أعمال ساندرا اللي فاتت زي “ما لا نبوح به” و “إلى ما لا نهاية” و “سأرحل” يشجعوا أكتر ويخلونا نتأكد إن الرواية هتبقى مختلفة.

ساعتين وداع – أحمد مهنى

من كام سنة نزلت رواية “سوف أحكي عنك” وسمعنا أغنية هحكي عنك اللي كانت معمولة للرواية والرواية مخادتش وقت عشان الناس يجيبوها ويقروها ويتناقشوا فيها. كاتب الرواية، أحمد مهنى، السنة دي مجهز رواية تانية متوقعين لها نجاح شبه كده لأن النبذة عن الكتاب محمسة ومختلفة وسهل إن أي حد يتأثر بيها ويحسها.

 

سبع سنبلات / اطمني – محمد إبراهيم 

السنة دي محمد إبراهيم قرر يتكلم عن تجارب شخصية ويحكي عن حاجات كتير محدش معداش بيها زي الفقد والعوض اللي بيجي بعده والخذلان والتعافي منه وقال إنه فتح قلبه بكل الكلام اللي مبيتقالش. إبراهيم عمل كدة من خلال حاجتين وهما كتاب سبع سنبلات وديوان اطمني اللي قال إن الاتنين مرتبطين ببعض وبيكملوا بعض. خبرة محمد إبراهيم بتأكدلنا إن الكتاب والديوان هيقدموا حاجة مختلفة لأن ده سابع ديوان لإبراهيم وتالت كتاب ليه. إبراهيم كمان كتب على صفحته إنه هيكون متواجد في المعرض يوم الخميس 23 يناير من الساعة 12 الضهر لحد آخر اليوم في قاعة 1 جناح رقم B31، دار دوّن.

 

ترتيبات عشوائية – دنيا كمال 

رسايل بتبعتها بطلة الرواية لأشخاص أثروا فيها وبتعبر فيهم عن مشاعر مختلفة بتخلينا نعرف إيه القصص ورا الرسايل دي وإيه اللي بييجي في دماغ البطلة وبتفكر فيه في “ترتيبات عشوائية” كتبتها دنيا كمال، الكاتبة اللي كسبت جايزة ساويرس لشباب الكُتّاب عن روايتها “سيجارة سابعة”.

 

التئام – أحمد مدحت

في الأساس، عرفنا أحمد مدحت من كتاباته على الفيسبوك لأنه كان بيكتب حاجات حقيقية وقصص من الناس ومواضيع يا عدينا بيها يا نعرف حد مر بيها وده اللي خلاه ينتشر بشكل أساسي. السنة دي، مدحت بينزل روايته الأولى “التئام” وشعارها “رحلة من انكسار الروح حتى التئامها” عشان تكون هي نتيجة لكل الحاجات اللي كتبها في الفترة اللي فاتت وسمعها من الناس. مدحت كتب إنه مش كاتب على مكتب وإن كتباته بتبقى من الشارع للناس وعشان كدة قال إنه مش هيعمل حفل توقيع بس هيكون متواجد على مدار 8 أيام من الجمعة 24 ل 31 يناير عشان يقابل الناس ويسمع منهم في جناح دار المصري، قاعة 2 من الساعة 12 للساعة 5.

 

12 شهر اعترافات – غادة كريم

اعترافات عن قصص حب ووجع اتجمعت في كتاب عشان تكون حلقة الوصل بين صاحب الاعترافات والقارئ وده اللي عملته غادة كريم في “12 شهر اعترافات” من منطلق أهمية التعبير والبوح اللي مش دايمًا بنقدر نعمله. غادة كان ليها كتب قبل كدة منها كتاب “كتالوج الحب” و “رسائل حريمي جدًا”.

 

إعلان عن قلب وحيد – محمد حسن خليفة 

مجموعة قصصية اتجمعت في كتاب واحد عشان تبقى تجربة النشر الأولى لخليفة رغم إنه نزل قصص قصيرة كتير في جرايد ومجلات مختلفة لكن “إعلان عن قلب وحيد” هو الكتاب الأول ليه. اللي بيميز مجموعة خليفة هو تنوعها ففي منها رومانسي واجتماعي وتاريخي وواقعي وبتطرح أسئلة كتير عن الماضي والحاضر وحاجات تانية. أعمال خليفة اللي فاتت تحمسنا إننا نقرا المجموعة بتاعته ونعرف أكتر هيقدملنا إيه فيها.