ورشة ليلي: تصميمات فنية على قطعتك المفضلة

ترجمة: نوران العشري

لو بتفكروا تغيروا شكل لبس عندكوا، شنطة أو جزمة، فكروا في شكل الرسمة اللي حابينها عليها وليلي هتصممها! مش فنانة خيالية ولا ساحرة، بس خدمة أونلاين بيطلب فيها العملاء تصميمات فنية مخصوصة عشان تترسم على حاجتهم. بسبب قصتها الملهمة وسنها الصغير، اتكلمنا مع ليلي حلمي، 16 سنة، وكلمتنا عن خدمة ليلي اللي بتقدمها.

 

إيه اللي ألهمك عشان تبدأي ورشة ليلي؟

صاحبتي رنا مرة نسيت شنطتها في البيت عندي. فكرت مع نفسي إن الشنطة دي ممكن يبقى شكلها مختلف جدًا لو اترسم عليها حاجة وهتبقى أحلى بكتير. فسألتها لو ممكن أرسم عليها حاجة ورسمت وعجبتنا احنا الاتنين النتيجة. حسيت ساعتها إن دي الحاجة اللي بحبها وممكن أشتغل فيها.

 

إزاي اكتشفتي إنك بتحبي الرسم؟
من وأنا في الحضانة وأنا بحب الرسم. كنت بحبه أكتر من أي مادة دراسية تانية. بدأت أخد كورسات عشان أطور نفسي وبعدها اكتشفت إن دي الحاجة اللي عايزة أكمل فيها.

 

إيه اللي ألهمك عشان تحولي ده لشغل/خدمة أونلاين؟

صاحبتي، نادية عويس، واللي هي مديرة اعمالي  دلوقتي، ادتني الدفعة الأخيرة عشان أبدأ وأحقق ده. كمان مامتي لما لقتني بحب أصمم حاجات بنفسي فرجتني على حاجات جنان ستوديو، ولقيت إنها فنانة موهوبة وأنا بحبها.

احكيلنا أكتر عن ورشة ليلي

ورشة ليلي هو مشروع صغير بصمم فيه لبس أو أي حاجة ممكن أرسم عليها، وكمان ببيع لوح وقطع فنية بعملها بنفسي.

 

ازاي بتقدري توازني بين الدراسة وورشة ليلي؟

أنا بشوف نفسي منظمة بطريقة بتخليني أحط أولوية دايمًا للدراسة فببقى حريصة على إني أخلص واجبات المدرسة في الأول.

 

إيه أصعب حاجة في الشغل؟

أصعب جزء بيبقى إني ألاقي الفكرة نفسها، عشان في ناس مبيبقوش عارفين هما عايزين إيه بالظبط فبنحتاج نفكر في إيه اللي بيحبوه وبيعجبهم.

 

إيه نوع الرسومات اللي بترسميها عادةً؟ 

أكتر نوع رسومات بحب أعمله هو الرسم بالزيت أو الأكريليك ودايمًا بفضل رسم البورتريه أو الرسومات الانطباعية.

 

مين أكتر الفنانين والرسامين اللي بتحبيهم؟

أكتر حد مفضل عندي هو فان جوخ ولوحته ليلة النجوم، Starry Night و يمكن لوحة الصرخة، The Scream، لإدوارد مونش.

 

حابة تكملي دراسة الفن وتاخديه كوظيفة قدام ولا تخليه مجرد هواية؟

عايزة أدرس رسم في الجامعة عشان أنا بحب ده جدًا ومهم عندي إني أختار وظيفة أنا بحبها.

 

تقدروا تتواصلوا مع ورشة ليلي على حسابها على انستجرام: @lillysworkshopp

No Comments Yet

Leave a Reply

Your email address will not be published.