هنا جودة – المصنفة دوليًا في تنس الطاولة “نفسي أرفع علم مصر في الأولمبياد”

هنا جودة، الطفلة اللي عمرها لسة ماتجاوزش 12سنة، بطلة التنس اللي ابهرتنا لما اتصنفت في المركز السادس على العالم في تنس الطاولة، و في 2018 فرحتنا تاني لما كسبت بطولة Africa Hopes تحت 12 سنة – وبقت أصغر بطلة في عالم تنس الطاولة تكسب البطولة دي.

كتير من النجاحات كانت مستنية هنا، بداية من الميداليات الذهبية في 2016 في تونس و الجزائر و ميدالية فضية في السويد في 2017، لحد أنها تبقى في المركز الأول في مصر في لعبة تنس الطاولة تحت 12 سنة.

نفسي أرفع علم مصر في أولمبياد تنس الطاولة

هنا بدأت لعبة تنس الطاولة لما كان عندها أربع سنين بس، و وقتها عملولها طاولة تنس بحجم يناسبها لأنها كانت صغيرة جدًا، و مع ان أخوها كان عايز يبدأ يلعب وهو عنده 6 سنين و كتير قالوله انه لسه صغير، نفس الناس تقبلوها و هي عندها 4 سنين.

هنا مابتعتبرش تنس الطاولة مجرد لعبة، بالعكس هي اخداها بشكل احترافي و نفسها ترفع علم مصر لما تفوز بميدالية أوليمبية.

بحاول أتدرب كل يوم، بس في نفس الوقت محتاجة وقت للمذاكرة

زيها زي كل الأبطال في سنها، لازم يحافظوا على التوازن في حياتهم بين المذاكرة و بين الرياضة، دا اللي بتحاول تعمله هنا، “بتمرن كل يوم، بس دايمًا بحس ان ده مش كفاية، و اني عايزة اتدرب أكتر، بس في نفس الوقت لازم اذاكر عشان بتوتر قبل الإمتحانات، عكس اللي بيحصل قبل أي بطولة،” قالت هنا.

No Comments Yet

Leave a Reply

Your email address will not be published.