نصيحة 3 بنات لفّوا العالم لوحدهم: ماتستنيش تتجوزي علشان تسافري

ترجمة: تسنيم عبدالله

 

المجتمع العربي عموماً والمجتمع المصري تحديداً، بيحكم لا إرادياً على أي حاجة بتعملها الست اللي مش مرتبطة، وخصوصاً لما تقرر تسافر. وبما إن السفر بقى حاجة منتشرة مؤخراً وبتجذب انتباه كل الناس رجالة وستات، كبار أو صغيرين؛ فالمجتمع بقى يوجّه أنظاره كلها لأي ست مش مرتبطة بتسافر لوحدها. وفي اعتقاد مشهور إن الست اللي بتقرر تسافر بتعمل كدة علشان هي حاسة بالوحدة ومفيش حد معاها، وبالتالي بتبقى الفكرة مرفوضة ومش محبذة لبعض الناس. حبينا إن إحنا نغير المفهوم ده ونفهم أكتر عن السبب من ستات بيسافروا لوحدهم:

بسنت عاصم:

بعد رحلتها لجنوب أفريقيا في 2008، بسنت أُغرمت بالسفر. استقالت من شغلها في 2014 وبدأت تتجه للكتابة كمهنة هي شغوفة بيها بشكل أكبر وبجدية أكتر. بسنت بتقول: “لما تغلبت على مخاوفي وسافرت أول مرة، حسيت إن جه الوقت المناسب إني أرمي كل حاجة ورا ضهري، وأعمل اللي نفسي أعمله وبيبسطني.”

وعن رأيها في نظرة المجتمع المصري للست اللي بتسافر لوحدها، بسنت بتشوف إن مجتمعنا بيفكّر في أي بنت مش مرتبطة بتسافر لوحدها، على إنها واحدة عايزة تقيم علاقات جنسية وخلاص؛ مع إنها هي بالنسبالها السفر نشاطات بتعملها طول اليوم الصبح زي تسلق الجبال والرياضات المختلفة. ومابتحبش الحياة الليلة ولا السهر.

لينا المنشاوي:

لينا رجعت تعيش في مصر في 2010، وقتها مكانش عندها صحاب؛ كان معاها ناس في الشغل بينظموا رحلات سفر، فسافرت معاهم لسانت كاتيرن، ومنها وقعت في غرام السفر والاستكشاف. ولما رجعت القاهرة جهزت معدات السفر علشان تسافر تاني بس لوحدها.

دينا بتقول: “معظم الناس اللي بيسافروا بيبقوا لوحدهم، لكن في أكيد في رحلتهم بيتعرفوا على الناس، فـ في الواقع مفيش حد بيكون لوحده في السفر.” لينا شايفة إن المجتمع بقى متقبل لفكرة سفر البنات لوحدهم أكتر من زمان، زمان كانوا الأمهات بيقولوا “ابقي سافري لما تتجوزي” بس دلوقتي المجتمع بقى متفهم أكتر إن الجواز مالوش علاقة بالسفر.

سارة فاروق:

في 2013 سارة ومجموعة من أصحابها، سافروا بالعجلة من القاهرة، لسيناء، للبتراء في الأردن. راحوا يستكشوا الأماكن دي بالعجل بتاعهم؛ وكرروا التجربة تاني بس في دول أوروبا. بعد كدة سارة سابت العجلة بتاعتها وحضرت شنطتها علشان تستكشف أماكن تانية مختلفة لوحدها.

بالنسبة لسارة، كونها مرتبطة، او مش مرتبطة، بتشتغل شغل بدوام كامل، أو مابتشتغلش خالص؛ كل ده مابيأثرش على رغبتها وإصرارها على السفر. في كل مرة بيبقى عندها أجازة طويلة بتسافر. سارة بتقول “بتمنى يكون معايا حد يشاركني التجربة دي” ، وبالرغم إن أهلها كانوا دايماً بيشجعوها، المجتمع حواليها ماكنتش متقبل أوي فكرة إنها بتسافر لوحدها. لكن دلوقتي سارة بقت ملاحظة الفرق، وإن بقى في تقبل بشكل كبير للسفر الستات لوحدهم.

السفر لوحدك تجربة لازم تجربيها على الأقل مرة في حياتك، وأكيد مش هاتندمي عليها.

 

No Comments Yet

Leave a Reply

Your email address will not be published.