أيامك مش منظمة، جدولك متلخبط ، على طول مكسلة و مش قادرة تعملي حاجة، شبه مش بتتعاملي مع ناس؟
كل الحاجات دي بنعاني منها من بداية انتشار كورونا لمدة 3 شهور و مش عارفين الوضع ده هينتهي أمتى.
ماجي بلبع و هي مدربة حياة معتمدة من معهد المدربين الدوليين وصفت الفترة دي بالصدمة، واستعانت في وصفها ده بكتاب
“On Death and Dying” للكاتبة إليزابيث كوبلر روس، اللي لخصت المراحل اللي بيمر بيها أي شخص في حالات الصدمة ل 5 مراحل (الإنكار، الغضب، الإكتئاب، المساومة، التقبل)، و في الأغلب بسبب عدم الإتزان احنا مش بنعدي بالمراحل دي ورا بعض، عشان نساعدك تعدي الفترة دي ماجي هتقولك نصايح تعمليها الأيام دي في قعدتك في البيت عشان تحافظي على سلامتك النفسية.
نصيحة 1
غيري من روتين حياتك، ممكن تكوني شايفاها نصيحة تقليدية بس الحقيقة انها هتفرق معاكي و هتساعدك ان يبقى عندك نظام في وسط لخبطة اليوم، زي مثلا انك يكون عندك وقت محدد للشغل، لتحضير الأكل، وغيرهم.
نصيحة 2
شوفي هواية جديدة و ابدأي اعمليها كل يوم.
نصيحة 3
ابدأي اعرفي أكتر عن نفسك، الفرصة دي مش هتكرر تاني، أعرفي بتحبي ايه وبتكرهي ايه.
نصيحة 4
لو شايفة انك متوترة وقلقانة زيادة في الوقت ده، ممكن تلعبي رياضة في البيت أو تنزلي تمشي أو تجري برا البيت، الدراسات أثبتت أن التغييرات اللي بتعمليها جسديًا في الرياضة بتساعد بشكل إيجابي في أنها تحسن حالتك النفسية.
نصيحة 5
لو حاسّة أن الأخبار بتوترك أكتر متتفرجيش عليها و اختاري راحتك.
نصيحة 6
نفس النصيحة اللي فاتت ممكن نطبقها على السوشيال ميديا، ممكن تبطلي تستخدميها لو بتسببلك قلق، أو تمسحي كل التطبيقات لمدة اسبوع، هتفرق كتير في نفسيتك.
نصيحة 7
لمصابين كورونا، حاولوا تكونوا هاديين و انكم تهيئوا حالتكم النفسية بشكل إيجابي إن كل ده هيعدي لإن ده هيأثر على صحتكم.
نصيحة 8
سلامة جهازك المناعي مرتبطة بحالتك النفسية، فحاولي تبعدي عن أن أي توتر يؤثر على نفسيتك لإنه هيضعف مناعتك.
